രാജീവ് മാമ്പുള്ളിയുടെ കവിതകൾ...

വേട്ട - കവിത

പത്തായം നിറച്ച് സ്നേഹമായിരുന്നെങ്കിലും,

കരണ്ടത് കരളായിരുന്നു!

കെണി വെച്ച് പിടിക്കാതെ, ഇല്ലം ചുടാതെ

പൊത്തിൻ വാലറ്റം വരെ പോയെങ്കിലും

വാലു പോലും കിട്ടാതെ പുലിവാലായി

കൈയ്യിൽ പിടി തരാതൊളിക്കുന്നു.

തുടരുന്നു ഞാൻ

മാർജ്ജാര മനസ്സുമായി അവിശ്രമം!

തേടൽ -കവിത

മൂക്കുത്തിപ്പൂമേലെ കാവ്യക്കാറ്റിഴയുന്നു

എഴുത്തുലയുന്നു കൺകോണുകളിൽ

വാക്കുറ്റു നോക്കുന്നു കണ്ണിൽ

വരികൾ വിരിയാതെ കവിളിൽ തിങ്ങിവിങ്ങുന്നു

നെറ്റിയിൽ മയങ്ങുന്നു ഉപമകൾ

വിക്കിലുറയ്ക്കാത്ത അക്ഷരങ്ങൾ കാതു വിട്ടിറങ്ങുന്നു

താളം തെറ്റി

വൃത്തം വിട്ട്

കളം മറന്നോരു കവിത

അലഞ്ഞുതിരിയുന്നു കവിയെ തേടി ......