ശൈഖ്​ സായിദ് പുസ്തക അവാർഡ്​: പട്ടികയിൽ ഇടംപിടിച്ച്​ ഒമാനി എഴുത്തുകാരി ജോഖ അൽ ഹാർത്തി

മസ്കത്ത്​: പതിനെട്ടാമത് ശൈഖ്​ സായിദ് പുസ്തക അവാർഡിന്റെ പട്ടികയിൽ ഇടം പിടിച്ച്​ പ്രമുഖ ഒമാനി എഴുത്തുകാരി ജോഖ അൽ ഹാർത്തി. ജോഖ അൽ ഹാർത്തി രചിച്ചതും സുവൈന അൽ തുവിയ വിവർത്തനം ചെയ്തതുമായ ‘അൽ ജസദ് ഫി അൽ ഹസ്​ൽ അൽ ഹദ്​രി’ എന്ന പുസ്തകമാണ്​ പട്ടികയിൽ ഉൾപ്പെട്ടിരിക്കുന്നത്​.

അബൂദബി അറബിക് ലാംഗ്വേജ് സെന്റർ (എ.എൽ.സി) വിവർത്തനം, സാഹിത്യ-കലാ നിരൂപണം, രാജ്യങ്ങളുടെ വികസനത്തിനുള്ള സംഭാവനകൾ എന്നിവക്കാണ് അവാർഡ് നൽകുന്നത്. എല്ലാ എൻട്രികളുടെയും വിലയിരുത്തൽ ജഡ്ജിങ്​ കമ്മിറ്റികൾ ആരംഭിച്ചതോടെയാണ് പട്ടികകൾ പ്രഖ്യാപിച്ചത്.

ഈ വർഷം ശൈഖ്​ സായിദ് ബുക്ക് അവാർഡിന്, അതിന്റെ ചരിത്രത്തിൽ ഏറ്റവും വലിയ എൻട്രികളാണ്​ ലഭിച്ചത്​. 74 രാജ്യങ്ങളിൽ നിന്ന് 4,240 നോമിനേഷനുകളാണ്​ കിട്ടിയിട്ടുള്ളത്​. 19 അറബ് രാജ്യങ്ങളും 55 മറ്റ് രാജ്യങ്ങളും ഉൾപ്പെടെയാണിത്​. യുവ എഴുത്തുകാരുടെ വിഭാഗത്തിലാണ്​ ഏറ്റവും കൂടുതൽ നോമിനേഷനുകൾ ലഭിച്ചത്​. സാഹിത്യവും ബാലസാഹിത്യവുമാണ്​ തൊട്ടടുത്ത്​ നോമിനേഷനുകൾ ലഭിച്ച വിഭാഗം​.