ഓണം വാരാഘോഷത്തിന് തലസ്ഥാനം ഒരുങ്ങി; 27ന് മുഖ്യമന്ത്രി ഉദ്ഘാടനം ചെയ്യും
text_fieldsതിരുവനന്തപുരം: ആഗസ്റ്റ് 27 മുതല് സെപ്റ്റംബര് രണ്ടു വരെ തലസ്ഥാനത്ത് നടക്കുന്ന ഓണം വാരാഘോഷത്തിനുള്ള ഒരുക്കങ്ങള് പൂര്ത്തിയായെന്ന് മന്ത്രിമാരായ വി. ശിവന്കുട്ടിയും പി. എ. മുഹമ്മദ് റിയാസും അറിയിച്ചു. ഓഗസ്റ്റ് 27ന് വൈകിട്ട് ആറ് മണിക്ക് നിശാഗന്ധിയില് മുഖ്യമന്ത്രി പിണറായി വിജയന് ഓണം വാരാഘോഷത്തിന്റെ ഉദ്ഘാടനം നിര്വഹിക്കുമെന്നും മന്ത്രിമാര് അറിയിച്ചു.
മാസ്കറ്റ് ഹോട്ടലില് നടന്ന വിവിധ ഓണാഘോഷ സംഘാടക സമിതികളുടെ യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു മന്ത്രിമാര്. ഉദ്ഘാടന ചടങ്ങില് നടന് ഫഹദ് ഫാസിലും നര്ത്തകി മല്ലിക സാരാഭായിയും മുഖ്യ അതിഥികള് ആകും. ഉദ്ഘാടന ചടങ്ങില്, സംസ്ഥാന സ്കൂള് കലോത്സവത്തിലെ ഒന്നാം സ്ഥാനക്കാരായ പട്ടാമ്പി പെരിങ്ങോട് സ്കൂളിലെ വിദ്യാര്ഥികളുടെ പഞ്ചവാദ്യം, കലാമണ്ഡലത്തിലെ നര്ത്തകര് അവതരിപ്പിക്കുന്ന നൃത്തശില്പം എന്നിവയും ഉണ്ടാകും.
ജില്ലയില് വിവിധ ഇടങ്ങളില് 30 വേദികളിലായി എണ്ണായിരത്തോളം കലാകാരന്മാര് പരിപാടികള് അവതരിപ്പിക്കുമെന്നും മന്ത്രിമാര് അറിയിച്ചു. കേരളത്തിന്റെ മതനിരപേക്ഷ മനസ്സ് ലോകത്തിനു മുന്നില് അവതരിപ്പിക്കുന്നതിന്റെ ഭാഗമായി 'ഓണം ഒരുമയുടെ ഈണം' എന്ന പ്രമേയത്തിലാണ് ഇത്തവണത്തെ ആഘോഷ പരിപാടികള് നടക്കുക. കനകക്കുന്ന്, സെന്ട്രല് സ്റ്റേഡിയം, പൂജപ്പുര, തൈക്കാട്, കാര്യവട്ടം ഗ്രീന്ഫീല്ഡ് സ്റ്റേഡിയം, എന്നിവിടങ്ങളാണ് പ്രധാന വേദികള്. ലേസര് ഷോ പ്രദര്ശനം ഇത്തവണത്തെ ആഘോഷത്തിന് മാറ്റു കൂട്ടും. കഴിഞ്ഞ രണ്ടു വര്ഷങ്ങളിലായി സംഘടിപ്പിച്ചു വരുന്ന വെര്ച്വല് ഓണപ്പൂക്കളം ഇത്തവണയും ഉണ്ട്. കനകക്കുന്നില് വാരാഘോഷ ദിവസങ്ങളില് ട്രേഡ് ഫെയറും ഫുഡ് ഫെസ്റ്റും ഉണ്ടാകുമെന്ന് മന്ത്രിമാർ പറഞ്ഞു.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.