ഇനിയെങ്കിലും സമഭാവനയുടെ ആഘോഷകാലമാകട്ടെ

അര നൂറ്റാണ്ടിന്‍റെ ഓണ ഓർമകളുമായി കെ.എസ്​ പ്രസാദ്​

‘മലയാളികൾക്കെല്ലാം ഓണം ആഘോഷത്തിന്‍റെ കാലമാണ്​. എന്നാൽ, ചില കലാകാരൻമാർക്ക്​ ഇത്​ വേദനയുടെയും അവഗണനയുടെയും ഓർമകൾ കൂടിയാണ്​. ഇപ്പോഴും പ്രാഥമിക സൗകര്യങ്ങൾ പോലും ലഭിക്കാതെ തഴയപ്പെടുന്ന കലാകാരൻമാർ ഉണ്ട്​.

ഐതിഹ്യത്തിലെ പോലെ ഈ ഓണക്കാലം മുതലെങ്കിലും ആഘോഷം സമഭാവനയുടേതും കൂടിയാകട്ടെ’ മലയാളികളെ അഞ്ച്​ പതിറ്റാണ്ടായി നിറഞ്ഞുചിരിപ്പിക്കുന്ന കെ.എസ്​. പ്രസാദിന്‍റേതാണ്​ ഈ വാക്കുകൾ. അരനൂറ്റാണ്ടിന്‍റെ ഓണം ഓർമകൾ പങ്കുവെക്കുന്നതിനിടെയാണ്​ പല കലാകാരൻമാരും ഇന്നും അനുഭവിക്കുന്ന ‘അയിത്തവും അവഗണനയും’ കെ.എസ്​ പ്രസാദ്​ തുറന്നുപറഞ്ഞത്​.

പണ്ട്​ തങ്ങ​​ളെ പോലുള്ള മിമിക്രി കലാകാരൻമാർ അനുഭവിച്ചിരുന്ന അവഗണന ഇന്ന്​ വാദ്യമേളക്കാരും കലാസമിതികളുടെ ഡ്രൈവർമാരും അടക്കം അനുഭവിക്കുകയാണെന്ന്​ അദ്ദേഹം പറയുന്നു.

തുല്യവേതനം, തുല്യ പരിഗണന എന്നിവ പ്രായോഗികമായി നടപ്പാക്കാൻ കഴിയാത്തതാണെന്ന്​ വ്യക്​തമാണെങ്കിലും പ്രാഥമിക സൗകര്യങ്ങൾ കലാലോകത്തെ എല്ലാവർക്കും ഉറപ്പാക്കൽ ഓരോരുത്തരുടെയും കടമയാണെന്ന്​ അദ്ദേഹം പറയുന്നു.

പലപ്പോഴും ചെണ്ടമേളക്കാർ അടക്കം ഹാളുകളുടെ വരാന്തയിലും മറ്റും കിടന്നുറങ്ങുന്നത്​ വേദനയോടെ കണ്ടുനിൽക്കേണ്ടി വന്നിട്ടുണ്ട്​. പ്രാഥമികാവശ്യങ്ങൾ നിർവഹിക്കാനോ സ്വസ്ഥമായി ഉറങ്ങാനോ സൗകര്യം ലഭിക്കാത്തവരാണ്​ നല്ലൊരു ശതമാനം കലാകാരൻമാരും. ഓണം പോലുള്ള സമഭാവനയുടെ ആ​ഘോഷ കാലത്ത്​ ഇത്തരത്തിലുള്ള പ്രവൃത്തികൾക്ക്​ മാറ്റം വരുത്താൻ കൂട്ടായ ശ്രമമുണ്ടാകേണ്ടത്​ അത്യാവശ്യമാണെന്ന്​ അദ്ദേഹം പറയുന്നു.

വേദിക്കായുള്ള കാത്തിരിപ്പ്​; ഭൂഖണ്ഡങ്ങൾ താണ്ടിയ കല

1975ൽ മിമിക്രിയിലേക്ക്​ കടന്നുവരുമ്പോൾ ഒരു വേദി ലഭിക്കുകയെന്നതായിരുന്നു ഏറ്റവും വലിയ ആഗ്രഹമെന്ന്​ കെ.എസ്​ പ്രസാദ്​ പറയുന്നു. അന്ന്​ സർവകലാശാല ക​ലോത്സവങ്ങളിൽ സമ്മാനാർഹരാകുന്നവരെ ചില ക്ലബുകാർ പരിപാടിക്ക്​ വിളിച്ചുകൊണ്ടുപോകുമായിരുന്നു.

അവിടെ നിന്നായിരുന്നു തന്നെപോലുള്ളവരുടെ തുടക്കം. 1970കളിൽ മിമിക്രിക്ക്​ വലിയ വിലയൊന്നും ആരും കൽപിച്ചിരുന്നില്ല. ഗാനമേളക്കോ ഡാൻസിനോ കഥാപ്രസംഗത്തിനോ ഇടയിലെ ‘ഫില്ലറു’കളായിരുന്നു ഞങ്ങളു​ടെ പരിപാടികൾ.

അന്ന്​ ഒരു വേദി കിട്ടാൻ വേണ്ടി ആ​ഗ്രഹിച്ച്​ നടന്ന സ്ഥാനത്ത്​ നിന്ന്​ മലയാളികൾ ഉള്ളിടത്തെല്ലാം മിമിക്രി എന്ന ഈ കല തന്നെ പോലുള്ളവരെ എത്തിച്ചതായി കെ.എസ്​. പ്രസാദ്​ ഓർത്തെടുക്കുന്നു. ഗൾഫ്​ രാജ്യങ്ങൾ, അമേരിക്ക, യൂറോപ്യൻ രാജ്യങ്ങൾ, സിങ്കപ്പൂർ, മലേഷ്യ അങ്ങനെ ലോകത്തിന്‍റെ പലയിടങ്ങളിലും പരിപാടി അവതരിപ്പിക്കാനായി.

റാന്തൽ വിളക്കിന്‍റെ വെളിച്ചത്തിൽ കോളാമ്പി മൈക്കുകളുടെ ശബ്​ദത്തിൽ പരിപാടികൾ അവതരിപ്പിച്ചിരുന്നത്​ മുതൽ അത്യാധുനിക ലൈറ്റിങ്​- സൗണ്ട്​ സംവിധാനങ്ങളുടെ അകമ്പടിയിൽ ശീതീകരിച്ച ഹാളിൽ ചിരിയുടെ പൂമാലകൾ തീർക്കുന്ന അനുഭവങ്ങളാണുള്ളത്​.

അമ്പലപ്പറമ്പുകളിലും പള്ളി മുറ്റങ്ങളിലും നാട്ടുമ്പുറത്തെ മൈതാനങ്ങളിലും തുടങ്ങി ഗൾഫിലെയും സിങ്കപ്പൂരിലെയും അമേരിക്കയിലെയും യൂറോപ്യൻ രാജ്യങ്ങളിലെയും വമ്പൻ സ്​റ്റേജുകൾ വരെ 1975 മുതൽ 2024 വരെയുള്ള കാലങ്ങൾ കൊണ്ട്​ അദ്ദേഹം ചിരിപ്പിച്ചു കഴിഞ്ഞു.

ഈ ഓണക്കാലത്തും ചിരിയുടെ മരുന്നൊരുക്കുകയാണ്​ ഈ കലാകാരൻ. മാറി വരുന്ന കാലത്തിനൊപ്പം നിലകൊള്ളുന്നുവെന്നത്​ തന്നെയാണ്​ കെ.എസ്​ ​പ്രസാദിനെ ഇന്നും മിമി​ക്രിയുടെ തലതൊട്ടപ്പനാക്കുന്നത്​.

ആദ്യ പ്രതിഫലം പത്ത്​ രൂപ; 1980ൽ കലാഭവനിലേക്ക്​

ഇന്ത്യ അടിയന്തരാവസ്ഥയുടെ ഇരുളിമയിലേക്ക്​ പോയ 1975ലാണ്​ മിമിക്രി വേദിയിലേക്ക്​ കെ.എസ്​. പ്രസാദ്​ എത്തുന്നത്​. ചെറിയ ചെറിയ പരിപാടികളാണ്​ അന്ന്​ നടത്തിയിരുന്നത്​. പത്ത്​ രൂപയായിരുന്നു പ്രതിഫലം. പരിപാടിയും പ്രതിഫലവും ചെറുതായിരുന്നെങ്കിലും അന്നും തങ്ങൾ പ്രഫഷനൽ തന്നെയായിരുന്നുവെന്ന്​ പ്രസാദ്​ ഓർത്തെടുക്കുന്നു.

1980 ആയപ്പോ​ഴേക്കും കേരള സർവകലാശാല യുവജനോത്സവത്തിൽ സമ്മാനം നേടി. ഇതോടെ കൂടുതൽ പരിപാടികൾ ആയിത്തുടങ്ങി. 1980 ജൂൺ 29 നാണ്​ കൊച്ചിൻ കലാഭവന്‍റെ ഭാഗമാകുന്നത്​. കലാഭവനും ആബേലച്ചനും അച്ചടക്കത്തിന്‍റെയും സമയനിഷ്ഠയുടെയും കാര്യത്തിൽ കർശനമായിരുന്നു. ഒരിടത്തും പരിപാടിക്ക്​ വൈകാൻ പോലും സമ്മതിച്ചിരുന്നില്ല. അവിടെ നിന്നുള്ള പിന്നീടുള്ള ജീവിതത്തിൽ ഏറെ ഗുണമായി.

കലാഭവനിൽ ഇന്ന്​ കലാലോകത്ത്​ തിളങ്ങി നിൽക്കുന്ന നിരവധി പേർക്കൊപ്പം പ്രവർത്തിക്കാൻ സാധിച്ചു. വിദേശത്ത്​ പരിപാടികൾ അവതരിപ്പിക്കാൻ ആരംഭിച്ചതും കലാഭവനിലൂടെയായിരുന്നു. കെ.എസ്​. പ്രസാദിനെ വളർത്തിയതിൽ കലാഭവന്​ നിർണായക പങ്കുണ്ട്​. കൊച്ചിൻ ഗിന്നസ്​ എന്ന ഗ്രൂപ്പുണ്ടാക്കി മുന്നോട്ടുപോയപ്പോഴും കലാഭവനുമായി സഹകരിച്ചു തന്നെയാണ്​ അദ്ദേഹത്തിന്‍റെ ​പ്രവർത്തനം.

ഓണവും പാസ്​പോർട്ടും

ഓണക്കാലം ഇപ്പോൾ ചിന്തിക്കുമ്പോൾ ഒരുപാട്​ രസകരമായ ഓർമകളാണ്​ സമ്മാനിക്കുന്നത്​. നാട്ടിലും വിദേശങ്ങളിലുമൊക്കെ പല പ്രാവശ്യം ഓണക്കാലത്ത്​ പരിപാടികൾ അവതരിപ്പിക്കാൻ പോയിട്ടുണ്ട്​. വിദേശ യാത്രക്ക്​ പോയപ്പോൾ നിരവധി പ്രാവശ്യം അബദ്ധങ്ങൾ സംഭവിച്ചിട്ടുണ്ട്​.

1997ൽ കലാഭവന്‍റെ അമേരിക്കൻ യാത്രക്കൊരുങ്ങുമ്പോൾ ഇത്തരത്തിൽ സംഭവമുണ്ടായി. ആബേലച്ചൻ അടക്കമായിരുന്നു യാത്ര ആസൂത്രണം ചെയ്തത്​. അമേരിക്കൻ വിസക്കായി ചെന്നൈ കോൺസുലേറ്റിൽ എത്തി. ആബേലച്ചന്‍റെ അടക്കം പാസ്​പോർട്ട്​ നൽകി. പല രാജ്യങ്ങളിലായി നിരവധി യാത്ര നടത്തിയ ആബേലച്ചന്‍റെ പാസ്​പോർട്ട്​ നിറയെ സീലുകളും വിസയുമായിരുന്നു. പഴയതും പുതിയതും അടക്കം രണ്ട്​ പാസ്​​പോർട്ടും ഒരുമിച്ചായിരുന്നു.

തെറ്റ്​ പറ്റില്ലെന്ന്​ വിശ്വാസമുള്ള അമേരിക്കൻ കോൺസുലേറ്റ്​ അധികൃതർ വിസ അടിച്ചപ്പോൾ അത്​ പഴയ പാസ്​പോർട്ടിലായി. എന്തോ ഭാഗ്യത്തിന്​ അവിടെ വെച്ച്​ തന്നെ തുറന്നുനോക്കുകയും വിസ പഴയ പാസ്​പോർട്ടിൽ അടിച്ചത്​ കാണുകയും ചെയ്തു. കോൺസുലേറ്റ്​ ഉദ്യോഗസ്ഥൻ സോറി പറഞ്ഞ്​ പുതിയ പാസ്​പോർട്ടിൽ വിസ അടിച്ചുനൽകുകയായിരുന്നു.

മറ്റൊരു സംഭവം സിങ്കപ്പൂർ യാത്രക്കായി ഗിന്നസ്​ മ​നോജും ഉണ്ണി എസ്​. നായരും ഒക്കെയായി വിസ അടിക്കാൻ പാസ്​പോർട്ട്​ അയച്ചുകൊടുത്തു. ഓണത്തിന്‍റെ ദിവസമാണ്​ വിസ അടിച്ച്​ പാസ്​​പോർട്ട്​ ട്രാവൽ ഏജൻസിക്കാർ കൊണ്ടുവന്നു തരുന്നത്​.

പാസ്​പോർട്ട്​ തുറന്നുനോക്കുമ്പോഴാണ്​ മനോജിന്‍റെ പാസ്​​​പോർട്ടിൽ ഉണ്ണിയുടെയും ഉണ്ണിയുടെ പാസ്​പോർട്ടിൽ മനോജിന്‍റെയും വിസ അടിച്ചത്​ കണ്ടത്​. തൊട്ടടുത്ത ദിവസം തന്നെ പാസ്​പോർട്ടിൽ വിസ ശരിയായ രീതിയിൽ അടിച്ചുനൽകാൻ സാധിച്ചു. ഒരുപാട്​ ടെൻഷൻ അടിച്ചെങ്കിലും സിങ്കപ്പൂർ പരിപാടി അടിപൊളിയാക്കാൻ സാധിച്ചു.

ആദ്യ ഓഡിയോ-വിഡിയോ കാസറ്റുകൾ, ദൂരദർശനിലെ ആദ്യ മിമിക്രി പരിപാടി

1982-83 കാലഘട്ടം. എറണാകുളത്ത്​ മേനകയിലൂടെ സഞ്ചരിക്കുമ്പോൾ ഒരു റേഡിയോ കടക്ക്​ മുന്നിൽ ആളുകൾ കൂടി നിൽക്കുന്നു. എന്താണ്​ സംഭവം എന്ന്​ അന്വേഷിച്ചപ്പോഴാണ്​ ഞങ്ങൾ അവതരിപ്പിച്ച മിമിക്രി പരിപാടി റെക്കോഡ്​ ചെയ്തത്​ ആളുകൾ കേൾക്കുകയാണെന്ന്​ മനസ്സിലായത്​.

പലയിടത്തും ഇത്തരത്തിൽ കാസറ്റുകൾ വിറ്റഴിയുന്നുണ്ടെന്ന്​ അറിഞ്ഞതോടെയാണ്​ ഇത്തരത്തിൽ ഒരാലോചന നടക്കുന്നത്​. 1983-84 കാലഘട്ടത്തിൽ തന്നെ ഓഡിയോ കാസറ്റ്​ പുറത്തിറക്കുകയും ചെയ്തു. കലാഭവൻ മിമിക്സ്​ പരേഡ്​ എന്ന പേരിൽ പുറത്തിറക്കിയ ഈ കാസറ്റ്​ വൻ വിജയമായിരുന്നു.

ഇതോടെ കേരളത്തിൽ മിമിക്രി ഓഡിയോ കാസറ്റുകളുടെ പ്രളയമായിരുന്നു. ഓണക്കാലത്ത്​ മലയാളി ആഘോഷിച്ച കാസറ്റുകളുടെ തുടക്കവും ഇവിടെ നിന്നായിരുന്നു. യു.എ.ഇ സന്ദർശിച്ചപ്പോഴാണ്​ വിഡിയോ കാസറ്റ്​ ഇറക്കുന്നതിനെ കുറിച്ച്​ കെ.എസ്​. പ്രസാദ്​ ചിന്തിച്ചുതുടങ്ങുന്നത്​.

1988ലാണ്​ കലാഭവൻ അൻസാറിനൊപ്പം യു.എ.ഇക്ക്​ പോയത്​. അന്ന്​ അജ്​മാൻ ഇൻഡിപെൻഡൻസ്​ സ്​റ്റുഡിയോസിൽ വിഡിയോ കാസറ്റ്​ ഇറക്കുന്ന​തെല്ലാം കണ്ടു മനസ്സിലാക്കി. ഇതോടെ വിഡിയോ കാസറ്റ്​ എന്ന മോഹം ആരംഭിച്ചു. കലാഭവനിൽ ആബേലച്ചനുമായി സംസാരിച്ചെങ്കിലും സാമ്പത്തികം തടസ്സം നിന്നു. ഇതോടെ സ്വയം വിഡിയോ കാസറ്റ്​ ഇറക്കണമെന്ന മോഹമായി.

കേരളത്തിൽ വി.സി.ആർ സജീവമായ കാലമായിരുന്നു അത്​. കാസറ്റ്​ എത്ര സമയം വേണം, പരസ്യം എങ്ങനെ, മുടക്കുമുതൽ തിരിച്ചുകിട്ടുമോ എന്നൊന്നും അറിയില്ലായിരുന്നു. ഒടുവിൽ എറണാകുളം നഗരത്തിലുണ്ടായിരുന്ന അഞ്ച്​ സെന്‍റ്​ സ്ഥലം വിറ്റാണ്​ ആദ്യമായി വിഡിയോ കാസറ്റ്​ ഇറക്കിയത്​. ഇ​തുപോ​ലെ തന്നെ മറ്റൊരു അനുഭവമായിരുന്നു ദൂരദർശനിൽ ആദ്യമായി മി​മിക്രി പരിപാടി ചെയ്തത്​.

അന്ന്​ ദൂരദർശനിൽ മിമിക്രിക്കും മറ്റ്​ കോമഡി പരിപാടികൾക്കും യാതൊരു സ്ഥാനവും ഇല്ലായിരുന്നു. തിരുവനന്തപുരത്ത്​ ദൂരദർശൻ കേന്ദ്രത്തിലെത്തി സംസാരിച്ചതോടെയാണ്​ ആദ്യമായി മിമിക്രിക്ക്​ അവസരം ഒരുങ്ങുന്നത്. ഇന്നത്തെ സംവിധായകൻ ശ്യാമപ്രസാദ്​ അന്ന്​ ദൂരദർശനിൽ ജോലി ചെയ്തിരുന്നു.

അദ്ദേഹം എറണാകുളത്ത്​ വന്ന്​ പരിപാടി കണ്ട ശേഷമാണ്​ മിമിക്രി ദൂരദർശനിൽ സം​പ്രേഷണം ചെയ്യാൻ തീരുമാനിക്കുന്നത്​. അങ്ങനെ 1989 ആഗസ്റ്റ്​ ഒമ്പതിന്​ കൊച്ചിൻ ഗിന്നസിന്‍റെ പേരിൽ ദൂരദർശനിൽ മിമിക്രി അവതരിപ്പിക്കപ്പെട്ടു.

കലാകാരൻമാരുടെ ലോഞ്ച്​ പാഡ്​

50 വർഷത്തോളം നീണ്ട കലാജീവിതത്തിൽ നിരവധി റെക്കോഡുകളാണ്​ കെ.എസ്​. പ്രസാദിനെ ​തേടിയെത്തിയിട്ടുള്ളത്​. മിമിക്സ്​ പരേഡിന്‍റെ തുടക്കക്കാരിൽ ഒരാൾ, ഓഡിയോ- വിഡി​യോ കാസറ്റ്​ വിപ്ലവത്തിന്‍റെ അമരക്കാരൻ, ടെലിവിഷൻ ലോകത്തേക്ക്​ മിമിക്രിയെ എത്തിച്ചയാൾ തുടങ്ങിയ നിരവധി ബഹുമതികൾക്ക്​ അർഹനാണെങ്കിലും ഇന്ന്​ നിരവധി പേരെ കലാലോക​ത്തേ കൈപിടിച്ചുകൊണ്ടുവരുന്ന അധ്യാപകൻ എന്നതാണ്​ തനിക്ക്​ ഏറെ സന്തോഷം പകരുന്നതെന്ന്​ കെ.എസ്​ പ്രസാദ്​ പറയുന്നു. കലാഭവനിലൂടെ ഇന്നും നൂറുകണക്കിന്​ കുട്ടികൾക്കാണ്​ കലയുടെ വാതിൽ തുറന്നുകൊടുക്കുന്നത്​.

കെ.എസ്​ പ്രസാദിന്‍റെ ശിക്ഷണം നേടിയവർ ഇന്ന്​ സ്വദേശത്തും വിദേശ രാജ്യങ്ങളിലും കലാ മേഖലയിൽ വലിയ സാന്നിധ്യമാണ്​. മിമിക്രി, ടി.വി., സിനിമ തുടങ്ങിയ രംഗങ്ങളിലേക്ക്​ കെ.എസ്​. പ്രസാദിന്‍റെ കൈപിടിച്ച്​ നൂറുകണക്കിന്​ പേരാണ്​ കടന്നുവന്നത്​. കഴിവുള്ള കലാകാരൻമാരുടെ ഏറ്റവും മികച്ച ലോഞ്ച്​ പാഡായി ഇന്നും കെ.എസ്​ പ്രസാദ്​ സജീവമാണ്​. ഒപ്പം ഈ ഓണക്കാലത്തും ചിരിക്കുള്ള ഒരുക്കങ്ങളും നടത്തുന്നുണ്ട്​.