മാൻഹോളിൽ വാഹനം വീഴാതിരിക്കാൻ 54കാരി റോഡിൽ നിന്നത്​ ഏഴ്​ മണിക്കൂർ; കയ്യടിച്ച്​ ലോകം

മുംബൈ: മനുഷ്യരുടെ ചില പ്രവർത്തികൾ വിസ്​മയമുണർത്തുന്നതാണ്​. ചിലനേരം അവർ മാലാഖ​മാരെപ്പോലെ ആർദ്രഹൃദയമുള്ളവരും മറ്റുചിലപ്പോൾ പിശാചിനെപ്പോലെ ക്രൗര്യമുള്ളവരുമാകും. മുംബൈ മഹാനഗരത്തിൽ നിന്നുള്ള ഒരു വീട്ടമ്മയുടെ പ്രവർത്തിയുടെ പേരിലാണ്​ ലോകം ഇപ്പോൾ കയ്യടിക്കുന്നത്​.

മുംബൈ, മാട്ടുംഗ വെസ്​റ്റിലെ തുളസി പൈപ്പ്​ റോഡി​െൻറ ഒാരത്താണ് 54കാരിയായ കാന്ത മാരുതി കലൻ താമസിക്കുന്നത്​. പൂക്കച്ചവടമാണ്​ കാന്തയുടെ തൊഴിൽ. ഭർത്താവ്​ ശരീരം തളർന്നുകിടക്കുന്നു. എട്ട്​ കുട്ടികളിൽ അഞ്ചുപേർ വിവാഹിതരായി. മൂന്നുപേർ പഠിക്കുകയും ഒപ്പം കാന്തയെ പൂ കച്ചവടത്തിൽ സഹായിക്കുകയും ചെയ്യുന്നു.

ഒാഗസ്​റ്റ്​ മൂന്നിന്​ പെയ്​ത മഴയാണ്​ ഇവരുടെ ജീവിതം മാറ്റമറിച്ചത്​. മഴയിൽ റോഡ്​ മുഴുവൻ വെള്ളക്കെട്ടായി. പതിയെ പതിയെ റോഡ്​വക്കിലെ കാന്തയുടെ കുടിലിലേക്കും വെള്ളം കയറിത്തുടങ്ങി. ​ഇൗ സമയമൊന്നും ബി.എം.സി (ബ്രിഹൻ മുംബൈ മുനിസിപ്പൽ കോർപറേഷൻ) അധികൃതർ അങ്ങോട്ട്​ തിരിഞ്ഞു നോക്കിയില്ല.

മഴ തുടരുകയും വെള്ളം ഉയരുകയും ചെയ്​തുകൊണ്ടിരുന്നു. വീട്ടിൽ വെള്ളംകയറി കുട്ടികളു​െട പാഠപുസ്​തകങ്ങൾ ഉൾപ്പടെ നശിച്ചു. അവസാനം കാന്ത തന്നെ അതിന്​ മുന്നിട്ടിറങ്ങി. റോഡിന്​​ നടുവിലെ മാൻഹോളി​െൻറ മൂടി തുറന്ന കാന്ത വെള്ളം ഒഴുക്കി കളയാൻ ആരംഭിച്ചു. ഇൗ സമയമെല്ലാം വാഹനങ്ങൾ തുരുതുരെ വരുന്നുണ്ടായിരുന്നു.

മാൻഹോളിന്​ മുന്നിൽ നിന്ന കാന്ത വാഹനങ്ങളെ വഴിതിരിച്ചു​വിട്ടുകൊണ്ടിരുന്നു. ഒന്നുംരണ്ടുമല്ല. ഏഴ്​ മണിക്കൂറാണ്​ ഇങ്ങി​െന നടുറോഡിൽ കാന്ത നിന്നത്​. അവസാനം വെള്ളം ഏറെക്കുറെ ഒലിച്ചുപോയ ശേഷമാണ്​ ഇവർ തിരികെ വീട്ടിലെത്തിയത്​. സമീപത്ത കെട്ടിടത്തിൽ നിന്നുള്ള ആ​െരാ എടുത്ത വീഡിയൊ വൈറലായതൊടെയാണ്​ വിവരം പുറംലോകമറിഞ്ഞത്​.

'ബി.എം.സിക്കാർ വന്ന്​ റോഡിന്​ നടുവിൽ നിന്നതിന്​ ധാരാളം വഴക്കുപറഞ്ഞു. പക്ഷെ ഇതെല്ലാം സംഭവിച്ചപ്പോൾ നിങ്ങളെവിടെയായിരുന്നെന്ന്​ ഞാൻ ചോദിച്ചു. എനിക്ക്​ വേറെ വഴിയില്ലായിരുന്നു. വെള്ളം ഉയരുകയായിരുന്നു. ഞങ്ങളുടെ പണവും വസ്​ത്രങ്ങളും കുട്ടികളുടെ പാഠപുസ്​തകങ്ങളും എല്ലാം നശിച്ചു. ആരും ഞങ്ങളെ തിരിഞ്ഞുനോക്കാനുണ്ടായിരുന്നില്ല.'-കാന്ത പറയുന്നു.

സംഭവം പുറംലോകം അറിഞ്ഞതോടെ ധാരാളംപേർ കാന്തക്ക്​ അഭിനന്ദനവുമായി രംഗത്ത്​ വന്നിട്ടുണ്ട്​. 'എ​െൻറ വീഡിയൊ പുറത്തുവന്നെന്ന്​ ചിലരെല്ലാം പറഞ്ഞു. ഒരു പൊലീസുകാരൻ വന്ന്​ എന്നെ അഭിനന്ദിച്ചു'-കാന്ത നിഷ്​കളങ്കമായി ചിരിച്ചുകൊണ്ട്​ പറയുന്നു.