ബി.എസ്​ നാല്​ വാഹനങ്ങൾക്ക്​ രജിസ്​ട്രേഷൻ അനുവദിച്ച്​ സുപ്രീം കോടതി

മാർച്ച്​ 31നു മുമ്പ്​ വിറ്റഴിഞ്ഞ ബിഎസ് നാല്​ വാഹനങ്ങൾ രജിസ്റ്റർ ചെയ്യാൻ സുപ്രീം കോടതി അനുമതി നൽകി. ലോക്​ഡൗൺ കാരണം ഇവയുടെ രജിസ്​ട്രേഷൻ നടത്താൻ കഴിഞ്ഞില്ലെന്ന വാദം പരിഗണിച്ചാണ്​ നടപടി. ഫെഡറേഷൻ ഒാഫ്​ ഒാ​േട്ടാമൊബൈൽ ഡീലേഴ്​സ്​ അസോസിയേഷൻ നൽകിയ ഹരജി പരിഗണിക്കുകയായിരുന്നു കോടതി.

ബി‌എസ് നാല്​ വാഹനങ്ങളുടെ രജിസ്ട്രേഷൻ അനുവദിക്കാത്ത ഡൽഹി-എൻ‌സി‌ആർ ഒഴികെയുള്ള പ്രദേശങ്ങളിലെ വാഹനങ്ങൾ ഇതോടെ രജിസ്​റ്റർ ചെയ്യാനാകും. ഇ-വഹാൻ പോർട്ടലിൽ നടത്തിയ താൽക്കാലിക രജിസ്ട്രേഷൻ ഉൾപ്പെടെയുള്ളവഅനുവദിക്കുമെന്ന് കോടതി വ്യക്തമാക്കി.

വിറ്റഴിക്കപ്പെടാത്ത ഏഴ്​ ലക്ഷത്തോളം ബി‌എസ് നാല്​ വാഹനങ്ങളുണ്ടെന്ന്‌ എഫ്​.എ.ഡി.എ 2020 മാർച്ചിൽ സുപ്രീംകോടതിയെ അറിയിച്ചിരുന്നു. അതിൽ 15,000 കാറുകളും 12,000 വാണിജ്യ വാഹനങ്ങളും ഉൾപ്പെടുന്നു. ഇതിൽ 39,000 വാഹനങ്ങളുടെ വിശദാംശങ്ങൾ ഇ-വഹാൻ പോർട്ടലിൽ അപ്‌ലോഡ് ചെയ്തിട്ടില്ല.

പുതിയ സാഹചര്യത്തിൽ ഇൗ വാഹനങ്ങളുടെ രജിസ്​ട്രേഷൻ പ്രതിസന്ധിയിലാകും. ലോക്​ഡൗൺ മാറ്റിയശേഷം 10 ദിവസത്തേക്ക്​ ബി.എസ്​ നാല്​ വാഹനങ്ങൾ വിൽക്കാൻ മാർച്ച്​ 27ന്​ ഡീലർമാർക്ക്​ സുപ്രീം കോടതി അനുമതി നൽകിയിരുന്നു. ഇതി​െൻറ മറവിൽ കൂടുതൽ വാഹനങ്ങൾ വിറ്റതായി കണ്ടെത്തിയതിനെതുടർന്ന്​ കോടതി ജൂൺ 15ന്​ അനുമതി റദ്ദാക്കുകയും രജിസ്​ട്രേഷൻ തടയുകയും ചെയ്​തു.