'പിതാവില്ലാത്ത കുട്ടിയെ ​പ്രിയങ്ക ഗാന്ധി കഷ്ടപ്പെടുത്തുന്നു' ​-കോൺഗ്രസിനെ പരിഹസിച്ച് അദിതി സിങ്

ലഖ്നോ: കോൺഗ്രസ് ജനറൽ സെക്രട്ടറി പ്രിയങ്ക ഗാന്ധിയെ രൂക്ഷമായി വിമർശിച്ച് മുൻ കോൺഗ്രസ് എം.എൽ.എയും ബി.ജെ.പി നേതാവുമായ അദിതി സിങ്. പഞ്ചാബ് നിയമസഭ തെരഞ്ഞെടുപ്പിൽ ഭർത്താവ് അംഗത് സൈനിക്ക് കോൺഗ്രസ് സീറ്റ് നിഷേധിച്ചതിന് പിന്നാലെയായിരുന്നു പരാമർശം.

കോൺഗ്രസ് വിട്ട് ബി.ജെ.പി​യിലെത്തിയതിന് പിന്നാലെ തനിക്കെതിരെ പരാമർശം നടത്താൻ പ്രിയങ്ക ഗാന്ധി തന്റെ ഭർത്താവിൽ സമ്മർദം​ ചെലുത്തുന്നതായി അവർ ആരോപിച്ചു. പിതാവില്ലാത്ത കുട്ടിയെ ​പ്രിയങ്ക ഗാന്ധി കഷ്ടപ്പെടുത്തുകയാണെന്ന് കോൺഗ്രസിനെ പരിഹസിച്ചും അവർ രംഗത്തെത്തി.

യു.പിയിലെ കോൺഗ്രസിന്റെ കാമ്പയിനിലെ 'ഞാൻ പെൺകുട്ടിയാണ്, എനിക്ക് പോരാടാൻ കഴിയും' എന്ന മുദ്രാവാക്യത്തെ പരിഹസിച്ചും അവർ രംഗത്തെത്തി. ഞാൻ പെൺകുട്ടിയാണ്, തുടർച്ചയായി വഴക്കിട്ടുകൊണ്ടിരിക്കുന്നു' എന്നായിരുന്നു പരാമർശം.

​ജനുവരി 20നാണ് ഔദ്യോഗികമായി കോൺഗ്രസിൽനിന്ന് രാജിവെക്കുന്നുവെന്ന് അദിതി ട്വിറ്ററിലൂടെ അറിയിച്ചത്. റായ്ബറേലി എം.എൽ.എ സ്ഥാനവും അവർ രാജിവെച്ചിരുന്നു. ഒരു വർഷത്തോളമായി കോൺഗ്രസ് നേതൃത്വവുമായുള്ള അസ്വാരസ്യങ്ങൾക്ക് ശേഷമായിരുന്നു രാജി. പിന്നീട് അവർ ബി.ജെ.പിയിൽ ചേരുകയായിരുന്നു.