പുനലൂരിൽ യു.ഡി.എഫ് സ്വയം എരിഞ്ഞടങ്ങുന്നു

പുനലൂർ: എൽ.ഡി.എഫിന് തെക്കൻ കേരളത്തിൽ ഏറ്റവും കൂടുതൽ ഭൂരിപക്ഷം നേടിക്കൊടുത്ത പുനലൂർ ഇനി യു.ഡി.എഫിന് ബാലികേറാമലയാകും. ജില്ലയിൽ എൽ.ഡി.എഫിെൻറ മണ്ഡലങ്ങൾ യു.ഡി.എഫിന് അനുകൂലമാകു​േമ്പാഴും പുനലൂരിൽ കൈയെത്താ ദൂരത്താകുന്ന കാഴ്ചയാണ്​. അതേസമയം, ലോക്സഭ, തദ്ദേശ തെരഞ്ഞെടുപ്പുകളിൽ യു.ഡി.എഫ് എൽ.ഡി.എഫിനെ മറികടക്കുകയോ ഒപ്പമെങ്കിലും എത്തുകയോ ചെയ്യാറുമുണ്ട്.

ഇതിൽനിന്ന്​ പുനലൂർ യു.ഡി.എഫിന് ദുഷ്​കരമല്ലെന്ന്​ വ്യക്തമാണ്​. നിയമസഭ തെരഞ്ഞെടുപ്പിൽ ചില കോൺഗ്രസ് നേതാക്കൾ പിന്തുടർന്ന തെറ്റായ സമീപനം കാൽനൂറ്റാണ്ടായിട്ടും പിന്തുടരുകയാണ്. ഇത് ആദ്യം കോൺഗ്രസിലെ ഗ്രൂപ് പോരിലാ​െണങ്കിൽ പിന്നീടിത് സാമുദായികവും ഘടകകക്ഷി എന്ന നിലയിലേക്കും മാറി.

ഫലത്തിൽ കോൺഗ്രസായാലും ഘടകകക്ഷിയായാലും രക്ഷയില്ലെന്നാണ്​ അവസ്ഥ. കഴിഞ്ഞ രണ്ടുതവണയും സ്ഥാനാർഥികളെ ചൊല്ലി കോൺഗ്രസുകാർ വിവാദം കെട്ടഴിച്ചുവിട്ടു. ഇത്തവണ ഇത് സംസ്ഥാനതലത്തിൽ യു.ഡി.എഫിൽ ചർച്ചയായപ്പോൾ സാമുദായികതയിൽനിന്ന്​ മാറി ഘടകകക്ഷിക്ക്​ സീറ്റ്​ നൽകിയതിനാണെന്ന്​ വരുത്തി, തലയൂരുകയായിരുന്നു.

എല്ലാം പറഞ്ഞൊതുക്കി കളത്തിലിറങ്ങിയപ്പോഴേക്കും യു.ഡി.എഫിന് കിട്ടേണ്ട വോട്ടുകളിൽ ഭൂരിഭാഗവും എൽ.ഡി.എഫിെൻറ കൈയിലായി കഴിഞ്ഞു. അതോടെ ഭൂരിപക്ഷം കഴിഞ്ഞ 33582 ൽനിന്ന്​ 37007 ആയി ഉയർന്നു. കഴിഞ്ഞതവണയും ദയനീയ പരാജയം മുസ്​ലിംലീഗിനായിരുന്നു. പരമ്പരാഗത കോൺഗ്രസ് വോട്ടുകൾ ലീഗ് സ്ഥാനാർഥികൾക്ക് ലഭിക്കാത്തതാണ് വോട്ടുചോർച്ചക്ക് ഇടയാക്കുന്നത്. സ്ഥാനാർഥി മണ്ഡലംകാരനും കോൺഗ്രസുകാരനും അല്ലെന്ന പ്രചാരണവും ചില കോൺഗ്രസുകാരുടെ അനിഷ്​ടവും ദയനീയ തോൽവിയിലെത്തിച്ചു.

കഴിഞ്ഞ അഞ്ചു തെരഞ്ഞെടുപ്പുകളിലായി യു.ഡി.എഫി‍െൻറ ഹിദുർമുഹമ്മദ്, എം.വി. രാഘവൻ, ജോൺസൺ എബ്രഹാം, എ. യൂനുസ്​കുഞ്ഞ്​ തുടങ്ങി അവസാനം അബ്​ദുറഹുമാൻ രണ്ടത്താണിവരെയാണ് പുനലൂരിൽ കാലിടറിയത്.