ബംഗാളിൽ ബി.ജെ.പി 100 കടക്കില്ല, ധൈര്യമുണ്ടെങ്കിൽ വിവാദ ഓഡിയോ ക്ലിപ്പ്​ മുഴുവൻ പുറത്തു വിടണം -പ്രശാന്ത്​ കിഷോർ

കൊൽക്കത്ത: ബംഗാൾ നിയമസഭ തെരഞ്ഞെടുപ്പിൽ ബി.ജെ.പി വിജയിക്കുമെന്ന്​ മുഖ്യമന്ത്രി മമത ബാനർജിയുടെ തെരഞ്ഞെടുപ്പ്​ തന്ത്രജ്ഞൻ പ്രശാന്ത്​ കിഷോർ പറയു​ന്ന ഓഡിയോ ക്ലിപ്പ്​ കഴിഞ്ഞ ദിവസം ബി.ജെ.പി പുറത്തു​വിട്ടിരുന്നു.

പ്രധാനമന്ത്രി നരേന്ദ്ര മോദി മമതയെ​പോലെ തന്നെ ജനകീയനാണെന്നായിരുന്നു സാമൂഹിക മാധ്യമമായ ക്ലബ്​ഹൗസിൽ മാധ്യമ​പ്രവർത്തകരുമായി നടത്തിയ​ ചാറ്റിൽ പ്രശാന്ത്​ കിഷോർ പറഞ്ഞത്​. ബി.ജെ.പി ഐ.ടി സെൽ മേധാവിയായ അമിത്​ മാളവ്യയാണ്​ ഓഡിയോ ക്ലിപ്പ്​ പുറത്തുവിട്ടത്​. എന്നാൽ വിവാദമായ ചാറ്റിന്‍റെ പൂർണ്ണരൂപം പുറത്തുവിടാൻ ബി.ജെ.പിയെ വെല്ലുവിളിച്ചിരിക്കുകയാണ്​ പ്രശാന്ത്​ കിഷോർ.

'എന്‍റെ ചാറ്റ് ബി.ജെ.പി അവരുടെ നേതാക്കളുടെ വാക്കുകളേക്കാള്‍ ഗൗരവമായി എടുക്കുന്നുണ്ടെന്നറിഞ്ഞതില്‍ സന്തോഷം. അവര്‍ക്ക് താല്‍പര്യമുള്ള ഭാഗങ്ങള്‍ മാത്രമാണ് പുറത്തുവിട്ടത്. ചില ഭാഗങ്ങള്‍ മാത്രം പുറത്തുവിടാതെ മുഴുവന്‍ ഭാഗങ്ങളും പുറത്തുവിടാന്‍ വെല്ലുവിളിക്കുന്നു. ഞാൻ ഒരിക്കൽ കൂടി ആവർത്തിക്കുന്നു ബി.ജെ.പി ബംഗാളിൽ നൂറ്​ കടക്കില്ല' പ്രശാന്ത്​ ട്വിറ്ററിലൂടെ വ്യക്തമാക്കി.

തൃണമൂൽ കോൺഗ്രസ്​ സര്‍ക്കാറിനെതിരെയുള്ള ധ്രുവീകരണം, രോഷം എന്നിവക്കൊപ്പം ദലിത് വോട്ടുകളും ബി.ജെ.പിക്ക് അനുകൂലമായി മാറുമെന്നും കിഷോര്‍ ക്ലിപ്പിൽ പറയുന്നുണ്ട്​. തൃണമൂൽ നടത്തിയ സർവേയിലും ബംഗാളിൽ ബി.ജെ.പി ഭരണത്തിലേറുമെന്നാണ്​ ​പ്രവചിക്കുന്നതെന്നാണ്​ ബി.ജെ.പി പറയുന്നത്​.

ക്ലിപ്പിൽ കേന്ദ്ര സർക്കാറിനെതിരെയല്ല മറിച്ച്​ സംസ്​ഥാന സർക്കാറിനെതിരെയാണ്​ ബംഗാളിൽ ജനവികാരമെന്ന്​ അദ്ദേഹം സമ്മതിക്കുന്നു​. 'ആദ്ദേഹത്തെ രാജ്യമെമ്പാടും ആരാധിക്കുന്നുണ്ട്​. നേതാക്കളുടെ ഒരു സർവേ എടുക്കുകയാണെങ്കിൽ മോദിയും മമതയും ഒരേ തരത്തിൽ ജനകീയരാണ്​. അദ്ദേഹത്തെ ദൈവതു​ല്യനായി കാണുന്ന നിരവധിയാളുകളുണ്ട്​. ബംഗാളിലെ ഹിന്ദി സംസാരിക്കുന്ന ജനവിഭാഗത്തിന്‍റെ പിന്തുണയും മോദിക്കാണ്​' -മോദി ബംഗാളിൽ എങ്ങനെയാണ്​ ജനകീയനാകുന്നത്​ എന്ന ചോദ്യത്തിന്​ പ്രശാന്ത്​ കിഷോർ മറുപടി പറഞ്ഞു.

ബംഗാളിൽ ശനിയാഴ്ചയായിരുന്നു നാലാം ഘട്ട വോ​ട്ടെടുപ്പ്​. കൂച്​ ബിഹാറിൽ വോ​ട്ടെടുപ്പിനിടെയുണ്ടായ വെടിവെപ്പിൽ അഞ്ചു പേർ കൊല്ലപ്പെട്ടിരുന്നു. വോട്ടുചെയ്യാൻ കാത്തുനിന്നയാൾക്കു നേരെയുണ്ടായ വെടിവെപ്പിൽ ഒരാൾ മരിച്ചപ്പോൾ സംഘർഷ സ്​ഥലത്ത്​ കേ​ന്ദ്ര സേന നടത്തിയ വെടിവെപ്പിൽ നാലു പേരും കൊല്ലപ്പെട്ടു.