ആവശ്യം വന്നാൽ വീൽചെയറിലായാലും പ്രചാരണ രംഗത്തിറങ്ങും- മമത

കൊൽക്കത്ത: നന്ദിഗ്രാമിൽ തെരഞ്ഞെടുപ്പ്​ പരിപാടിക്കിടെ ആക്രമണത്തിനിരയായെങ്കിലും ഇനിയും പ്രചാരണ രംഗത്ത്​ സജീവമായുണ്ടാകുമെന്ന്​​ പശ്​ചിമ ബംഗാൾ മുഖ്യമന്ത്രി മമത ബാനർജി. ''രാത്രി കാര്യമായ പരിക്കുകൾ പറ്റിയെന്നും നെഞ്ചിലും തലക്കും കടുത്ത വേദന ഇപ്പോഴുമുണ്ടെന്നും എന്നാൽ, വീൽചെയറിലായാലും പ്രചാരണത്തിനുണ്ടാകുമെന്നും'' മമത പറഞ്ഞു. ര​ണ്ടു, മൂന്ന്​ ദിവസങ്ങൾക്കകം പ്രചാരണത്തിനിറങ്ങാനാകുമെന്നും അണികൾ സമാധാനം പാലിക്കണമെന്നും​ മമത നേരത്തെ പറഞ്ഞിരുന്നു. 'സമാന ആക്രമണം നടന്നത്​ ഗുജറാത്ത്​ പോലുള്ള മറ്റേതെങ്കിലും സംസ്​ഥാനത്തായിരുന്നുവെങ്കിൽ മറ്റൊരു ഗോധ്ര ആവർത്തിക്കുമായിരുന്നു'വെന്ന്​ തൃണമൂൽ നേതാവ്​ ​മദൻ മിത്ര കുറ്റപ്പെടുത്തി. 'നിക്കറി'ൽ പരിശീലനം കിട്ടിയ മികച്ച പരിശീലനമുള്ള ആളുകൾ ചെയ്​ത​പോലെയുണ്ടെന്നും അദ്ദേഹം പറഞ്ഞു.

കൊൽക്കത്തയിലെ എസ്​.എസ്​.കെ.എം ആശുപത്രിയിലാണ്​ മമത ചികിത്സയിലുള്ളത്​. നന്ദിഗ്രാമിൽ ബുധനാഴ്ച രാത്രി അക്രമികൾ കൈയേറ്റം നടത്തിയതിനെ തുടർന്നാണ്​ ഇവർ ചികിത്സയിലുള്ളത്​.