'യഥാർഥ വിമർശനങ്ങളെ വിലമതിക്കുന്നു, പ്രേക്ഷകരാണ് വലുത്; വ്യത്യസ്തമായ എന്തെങ്കിലും ചെയ്യൂ എന്ന് അവർ പലപ്പോഴും പറഞ്ഞു' -അക്ഷയ് കുമാർ

പ്രേക്ഷകരിൽ നിന്നുള്ള യഥാർഥ വിമർശനങ്ങളും ഫീഡ്‌ബാക്കും എപ്പോഴും തുറന്ന മനസോടെ സ്വീകരിക്കുന്നയാളാണ് താനെന്ന് നടൻ അക്ഷയ് കുമാർ. അത് ചിലപ്പോൾ വേദനാജനകമാണെങ്കിൽ പോലും അവയെ വിലമതിക്കുന്നു എന്ന് നടൻ പറയുന്നു. സീ മ്യൂസിക് ഇന്ത്യ യൂട്യൂബ് ചാനലിൽ നടത്തിയ സംവാദത്തിൽ, പണം നൽകി സിനിമ കാണുന്ന പ്രേക്ഷകരാണ് ഏറ്റവും ഉയർന്ന വ്യക്തിയെന്ന് അക്ഷയ് പറഞ്ഞു.

'അവർ കൈയടിക്കുമ്പോൾ, അത് നമ്മെ പ്രചോദിപ്പിക്കും. അവർ വിമർശിക്കുമ്പോൾ, എനിക്ക് പഠിക്കാൻ കഴിയും. എന്റെ ജോലിയിലൂടെ പരിണമിക്കാൻ ഞാൻ എപ്പോഴും ആഗ്രഹിക്കുന്നു. എനിക്ക് യഥാർഥ ഫീഡ്‌ബാക്ക് ലഭിക്കുകയാണെങ്കിൽ, അത് ഒരിക്കലും അവഗണിക്കില്ല, അത് സ്ക്രിപ്റ്റ് തെരഞ്ഞെടുപ്പായാലും റോൾ തെരഞ്ഞെടുപ്പായാലും...എന്നാൽ ചിലപ്പോൾ വിമർശനം വേദനിപ്പിക്കും, പക്ഷേ അത് ഹൃദയത്തിൽ നിന്നാണ് വരുന്നതെങ്കിൽ, അത് നിങ്ങളെ കൂടുതൽ മികച്ചതാക്കും' -അക്ഷയ് കുമാർ വ്യക്തമാക്കി.

വ്യത്യസ്തമായ എന്തെങ്കിലും ചെയ്യൂ എന്ന് ആളുകൾ പലതവണ പറഞ്ഞിട്ടുണ്ട്. അതുകൊണ്ടാണ് 'എയർലിഫ്റ്റ്', 'ടോയ്‌ലറ്റ്: ഏക് പ്രേം കഥ', 'കേസരി' തുടങ്ങിയ സിനിമകൾ പോലെ വ്യത്യസ്തമായ സിനിമകൾ ചെയ്യാൻ ശ്രമിച്ചതെന്നും അദ്ദേഹം പറഞ്ഞു. ആളുകൾക്ക് തന്നിലും തന്റെ വർക്കിലും താൽപര്യം നഷ്ടപ്പെടുമോ എന്നതാണ് ഏറ്റവും വലിയ ഭയമെന്ന് കുമാർ പറയുന്നു. മലയാളിയായ അഭിഭാഷകൻ സി. ശങ്കരൻ നായരുടെ വേഷത്തിലാണ് താരം പുതിയ ചിത്രമായ കേസരി 2ൽ അഭിനയിക്കുന്നത്.