താൻ സിനിമ മേഖലക്ക്​ പറ്റിയ ആളല്ലെന്ന്​ പരിതപിച്ച അഭിഷേകിനോട്​ അമിതാഭ്​ ബച്ചൻ പറഞ്ഞത്​

ന്യൂഡൽഹി: ഇന്ന്​ സോഷ്യൽ മിഡിയാ കാലത്ത്​ അഭിനയത്തിന്‍റെ പേരിൽ ട്രോൾ വധത്തിനിരയാകുകയും വിമർശിക്കപ്പെടുകയും ചെയ്യുന്ന അഭിനേതാക്കൾ നിരവധിയുണ്ട്​. മലയാള നടൻ കൈലാഷിനെ ഇത്തരത്തിൽ സോഷ്യൽ മീഡിയയിലൂടെ ചിലർ അധിക്ഷേപിച്ച സംഭവമാണ്​ അതിൽ ഏറ്റവും പുതിയത്​.

എന്നാൽ സോഷ്യൽ മീഡിയ അത്ര സജീവമല്ലാത്ത കാലത്ത്​ തന്‍റെ അഭിനയത്തിന്‍റെ പേരിൽ ഏറെ കല്ലേറ്​ കൊണ്ട്​ നായകനാണ്​ അഭിഷേക്​ ബച്ചൻ. വിഖ്യാത നടനായ അമിതാഭ്​ ബച്ചന്‍റെ മകനെന്ന പേര്​ കൂടി അത്തരം വിമർശനങ്ങൾക്ക്​​ ആക്കം കൂട്ടിയിരുന്നു.

ഒരുകാലത്ത്​ ബോളിവുഡ്​ പ്രവേശനം ഒരു അബദ്ധമായിരുന്നുവെന്നും ഞാൻ ഇൗ സിനിമ മേഖലക്ക്​ പറ്റിയ ആളല്ലെന്ന്​ പിതാവ്​ ബച്ചനോട്​ പറഞ്ഞ വേളയിൽ അദ്ദേഹത്തിന്‍റെ മറുപടിയെ പറ്റി തുറന്നു പറയുകയാണ്​ ബച്ചൻ. ആർ.ജെ സിദ്ദാർഥ്​ കൃഷ്​ണനുമായി നടത്തിയ അഭിമുഖത്തിലാണ്​ അഭിഷേകിന്‍റെ​ തു​റന്നുപറച്ചിൽ.

'പൊതുവേദിയിൽ പരാജയപ്പെടുകയെന്നത്​ പ്രയാസമേറിയ കാര്യമാണ്​. അന്ന്​ സോഷ്യൽ മീഡിയ അത്ര സജീവമല്ലെങ്കില​ും നിരവധിയാളുകൾ എന്നെ അധിക്ഷേപിക്കുന്ന കാര്യം ഞാൻ ചില മാധ്യമങ്ങൾ വഴി അറിയുന്നുണ്ടായിരുന്നു. എനിക്ക്​ അഭിനയിക്കാൻ അറിയില്ലെന്ന്​ വരെ ചിലർ പറഞ്ഞുപരത്തി. ആ വേളയിൽ ഇൗ മേഖലയിലെത്തിയത്​ അബദ്ധമായി എനിക്ക്​ തോന്നി. ഞാൻ എന്ത്​ ചെയ്​താലും അതൊന്നും നന്നായി വന്നില്ല' -അഭിഷേക്​ പറഞ്ഞു.

സ്വയം പഴിച്ച്​ കൊണ്ടിരുന്ന നടന്​ രക്ഷയായെത്തിയത്​ പിതാവായ അമിതാഭ്​ ബച്ചന്‍റെ വാക്കുകളായിരുന്നു. 'പിന്തിരിഞ്ഞോടുന്നവനായല്ല നിന്നെ ഞാൻ വളർത്തിയത്​. സൂര്യന്​ കീഴിൽ ഒരു സ്​ഥാനത്തിനായി ഒരോ ദിവസവും ഉറക്കമുണർന്ന ശേഷം നാം പടപൊരുതണം. അഭിനേതാവെന്ന നിലയിൽ ഓരോ ചിത്രം കഴിയും തോറും നീ മെച്ചപ്പെടുന്നുണ്ട്​ ' -ബച്ചൻ അഭിഷേകിനോട്​ പറഞ്ഞു.

മാസ്​ എന്‍റർടെയ്​നറുകൾക്കൊപ്പം തന്നെ വൻപരാജയങ്ങളുടെയും ഒരു മിശ്രണമാണ്​ അഭിഷേകിന്‍റെ സിനിമാറ്റിക്​ കരിയർ. ധൂം സീരീസ്​, ബണ്ടി ഓർ ബബ്ലി, സർക്കാർ സീരീസ്​, ദോസ്​താന, ബോൽ ബച്ചൻ, ബ്ലഫ്​മാസ്റ്റർ എന്നിവയാണ്​ ബോക്​സ് ഓഫീസ്​ ഹിറ്റായ അഭിഷേക്​ സിനിമകളിൽ ചിലത്​.

എന്നാൽ ദ്രോണ, തേരാ ജാദൂ ചൽ ഗയ, ദായ്​ അക്​ഷർ പ്രേം കെ, ഇത്​നാ സാ ക്വാബ്​ ഹേ, ഓം ജയ്​ ജഗദീഷ്​, മൂമിയ സേ ആയാ മേരാ ദോസ്​ത്​, കുഛ്​ നാ കഹോ എന്നീ ചിത്രങ്ങൾ ബോക്​സ്​ ഓഫീസിൽ മൂക്കുംകുത്തി വീണു. ഗുരു, യുവ, ഡൽഹി 6, കഭി അൽവിദ നാ കഹ്​ന, ദേശീയ പുരസ്​കാരം ലഭിച്ച പാ എന്നീ ചിത്രങ്ങളിലെ അഭിഷേകിന്‍റെ പ്രകടനങ്ങൾക്ക്​ നിരൂപക പ്രശംസയും ലഭിച്ചു.

ഷാറൂഖ്​ ഖാന്‍റെ റെഡ്​ ചില്ലീസ്​ എന്‍റർടെയ്​ൻമെന്‍റ്​ നിർമിക്കുന്ന 'ബോബ്​ ബിശ്വാസ്​'​ആണ്​ ഇനി അഭിഷേകി​േന്‍റതായി പുറത്തിറങ്ങാനുള്ള ചി​ത്രം.