തന്‍റെ വാട്​സ്​ആപ്​ ചാറ്റുകൾ തെറ്റായി വ്യാഖ്യാനിക്കുന്നു, മറ്റു തെളിവുകളില്ല -ഹൈകോടതിയിൽ നൽകിയ ജാമ്യാപേക്ഷയിൽ ആര്യൻ

മുംബൈ: ആഡംബര കപ്പലിലെ മയക്കുമരുന്ന്​ കേസിൽ നാർക്കോട്ടിക്​സ്​ കൺട്രോൾ ബ്യൂറോ തന്‍റെ വാട്​സ്​ആപ്​ ചാറ്റുകൾ തെറ്റായി വ്യാഖ്യാനിക്കുകയാണെന്ന്​ ആര്യൻ ഖാൻ ജാമ്യാപേക്ഷയിൽ. ബോം​ബെ ഹൈകോടതിയിൽ പുതുതായി സമർപ്പിച്ച ജാമ്യാപേക്ഷയിലാണ്​ ആര്യന്‍റെ പരാമർശം.

തനിക്കെതിരെ യാതൊരു തെളിവുകളുമില്ലെന്നും ആര്യൻ പറഞ്ഞു. മയക്കുമരുന്ന്​ കേസിൽ ആര്യന്​ വേണ്ടി അഭിഭാഷകനായ സതീഷ്​ മനേഷിൻഡെയാണ്​ ഹാജരാകുന്നത്​. വെള്ളിയാഴ്ച അടിയന്തരമായി ആര്യന്‍റെ ജാമ്യാപേക്ഷ പരിഗണിക്കണമെന്ന ആവ​ശ്യവുമായി വ്യാഴാഴ്ച ജസ്റ്റിസ്​ എൻ.ഡബ്ല്യൂ. സാംബ്രേയുടെ സിംഗിൾ ബെഞ്ച്​ മുമ്പാകെ ഹരജി നൽകുകയായിരുന്നു. എന്നാൽ ഹരജി പരിഗണിക്കുന്നത്​ ബോംബെ ഹൈകോടതി ഒക്​ടോബർ 26ലേക്ക്​ മാറ്റുകയായിരുന്നു.

ആര്യൻ ഖാന്‍റെ ജുഡീഷ്യൽ കസ്റ്റഡി ഒക്​ടോബർ 30വരെ പ്രത്യേക കോടതി നീട്ടിയതോടെയാണ്​ ബോംബെ ഹൈകോടതിയെ സമീപിച്ചത്​. ആര്യൻ ഖാൻ സ്​ഥിരമായി മയക്കുമരുന്ന്​ ഉപയോഗിക്കു​ന്നുവെന്നും മയക്കുമരുന്ന്​ വിതരണക്കാരുമായി ബന്ധം പുലർത്തുന്നുവെന്നും ചൂണ്ടിക്കാട്ടിയാണ്​ ആര്യന്​ ജാമ്യം നിഷേധിച്ചത്​.

ആര്യന്‍റെ സുഹൃത്തായ ബോളിവുഡ്​ താരം അനന്യ പാണ്ഡെയെ കഴിഞ്ഞദിവസങ്ങളിൽ എൻ.സി.ബി ചോദ്യം ചെയ്​തിരുന്നു. ആര്യൻ ഖാന്‍റെ ഫോണിലെ രണ്ടുവർഷം പഴക്കമുള്ള വാട്​സ്​ആപ്​ ചാറ്റിന്‍റെ അടിസ്​ഥാനത്തിലാണ്​ 22കാരിയായ അനന്യയെ എൻ.സി.ബി ചോദ്യം ചെയ്​തത്​. തിങ്കളാഴ്ചയും അനന്യയെ ചോദ്യം ചെയ്യും. അതേസമയം ആരോപണങ്ങൾ അടിസ്​ഥാന രഹിതാമാ​െണന്നായിരുന്നു അനന്യയുടെ പ്രതികരണം.

ആഡംബര കപ്പലിലെ മയക്കുമരുന്ന്​ കേസുമായി ബന്ധപ്പെട്ട്​ ഒക്​ടോബർ മൂന്നിനാണ്​ ബോളിവുഡ്​ താരം ഷാരൂഖ്​ ഖാന്‍റെ മകൻ ആര്യൻ ഖാനെ അറസ്റ്റ്​ ചെയ്​തത്​. ആര്യന്‍റെ സുഹൃത്തുക്കളെയും പിടികൂടിയിരുന്നു. നിലവിൽ ആർതർ റോഡ്​ ജയിലിലാണ്​ ആര്യനും സുഹൃത്തുക്കളും.