റിയാലിറ്റി ഷോ താരം ഫിറോസ് ഖാന്‍റെ വീടിന് നേരെ ആക്രമണം

കൊല്ലം: ടിവി റിയാലിറ്റി ഷോ താര ദമ്പതികളായ ഫിറോസ് ഖാന്‍റെയും ഭാര്യ സജിനയുടെയും വീടിന് നേർക്ക് ആക്രമണമെന്ന് പരാതി. ചാത്തന്നൂരിൽ നിർമാണത്തിലിരുന്ന വീട് കരാറുകാരൻ അടിച്ചു തകർത്തതായി ഫിറോസ് പൊലീസിൽ പരാതി നൽകി.

വീടിന്‍റെ ജനൽ ചില്ലുകൾ അടിച്ചു തകർക്കുകയും ചെടിച്ചട്ടികൾ നശിപ്പിക്കുകയും ചെയ്തു.

സാമ്പത്തിക തർക്കത്തിന്‍റെ പേരിൽ കരാറുകാരൻ ആക്രമണം നടത്തുകയായിരുന്നെന്നും ഫിറോസും സജിനയും പറയുന്നു. നേരത്തെ പറഞ്ഞ തുകയേക്കാൾ കൂടുതൽ ആവശ്യപ്പെടുകയായിരുന്നെന്നും ഇത് നൽകാത്തതിനെ തുടർന്നാണ് ആക്രമണം നടത്തിയതെന്നുമാണ് ഇവർ പറയുന്നത്.

എന്നാൽ, ആരോപണം അടിസ്ഥാനരഹിതമാണെന്ന് വീട് നിർമാണം ഏറ്റെടുത്ത കൊല്ലം സ്വദേശിയായ കോൺട്രാക്ടർ ഷഹീർ പറഞ്ഞു. പൊലീസ് അന്വേഷണം ആരംഭിച്ചു.