അവർ എന്നെ ഒരുപാട് പ്രലോഭിപ്പിച്ചു; പാൻ മസാല പരസ്യങ്ങൾ വേണ്ടെന്ന് തീരുമാനിച്ചു-കാർത്തിക് ആര്യൻ

താൻ ഒരിക്കലും പാൻ മസാല ബ്രാൻഡുകളെ പ്രമോട്ട് ചെയ്യില്ലെന്ന് നടൻ കാർത്തിക് ആര്യൻ. പരസ്യത്തിനായി നിരവധി പാൻ മസാല ബ്രാൻഡുകൾ തന്നെ സമീപിച്ചിരുന്നെന്നും അതെല്ലാം നിരസിച്ചിട്ടുണ്ടെന്നും താരം കട്ടിച്ചേർത്തു. സിദ്ധാർഥ് കണ്ണനുമായുള്ള അഭിമുഖത്തിലാണ് ഇക്കാര്യം പറഞ്ഞത്.

'പാൻ മസാലയുടെ പരസ്യത്തിനായി നിരവധി ബ്രാൻഡുകൾ എന്നെ സമീപച്ചിരുന്നു. അതൊക്കെ ഞാൻ നിരസിച്ചിരുന്നു. അവർ ഒരുപാട് ഓഫറുകൾ നൽകി. അതുപോലെ പ്രലോഭിപ്പിക്കാനും ശ്രമിച്ചു. പക്ഷെ അതിലൊന്നും ഞാൻ കീഴ്പ്പെട്ടില്ല'- കാർത്തിക് ആര്യൻ പറഞ്ഞു.

ബോളിവുഡിലെ ഒട്ടുമിക്ക സൂപ്പർ താരങ്ങളും പാൻ മസാലയുടെ പരസ്യത്തിൽ പ്രത്യക്ഷപ്പെടാറുണ്ട്. നടൻ അക്ഷയ് കുമാര്‍ പാന്‍ മസാല പരസ്യത്തില്‍ അഭിനയിച്ചത് വലിയ വിവാദമായിരുന്നു. ഇതിന് പിന്നാലെ ആരാധകരോട് അക്ഷയ് ക്ഷമാപണം നടത്തുകയും , ഭാവിയിൽ കൂടുതൽ ജാഗ്രത പുലർത്തുമെന്ന് പ്രതിജ്ഞയെടുക്കുകയും ചെയ്തു.