' ഒരു ഉപയോഗമില്ലാത്ത റിപ്പോർട്ട്'; ഹേമ കമ്മിറ്റി റിപ്പോർട്ടിനെ വിമർശിച്ച് തനുശ്രീ ദത്ത
text_fieldsഹേമ കമ്മിറ്റി റിപ്പോർട്ട് സിനിമാ ലോകത്ത് വലിയ ചർച്ചയാകുമ്പോൾ റിപ്പോർട്ടിനെതിരെ രക്ഷവിമർശനവുമായി നടി തനുശ്രീ ദത്ത. ഇതൊരു ഉപകാരമില്ലാത്ത റിപ്പോർട്ടാണെന്നും ഈ റിപ്പോർട്ടുകളിലൊന്നും തനിക്ക് വിശ്വാസമില്ലെന്നും നടി ഒരു ദേശീയ മാധ്യമത്തിനോട് പറഞ്ഞു. എല്ലാ മനുഷ്യരുടെയും അടിസ്ഥാന ആവശ്യമാണ് സുരക്ഷിതമായ തൊഴിലിടമെന്നും കൂട്ടിച്ചേർത്തു.
'ഈ കമ്മിറ്റികളും റിപ്പോർട്ടുകളും എനിക്ക് മനസിലാകുന്നില്ല. ഇത് ഉപയോഗശൂന്യമാണെന്നാണ് എനിക്ക് തോന്നുന്നത്. 2017 ൽ ഉണ്ടായ ഒരു സംഭവത്തെ തുടർന്നുണ്ടായ റിപ്പോർട്ട് പുറത്തുവിടാൻ ഏഴ് വർഷമെടുത്തു. എന്താണ് ഈ പുതിയ റിപ്പോർട്ടിന്റെ പ്രയോജനം. പ്രതികളെ പിടികൂടി നിയമത്തിന് മുന്നിൽ കൊണ്ടുവരുകയാണ് ചെയ്യേണ്ടത്. ഈ അവസരത്തിൽ ജോലി സ്ഥലത്തെ ലൈംഗികാതിക്രമങ്ങൾക്കെതിരെ രൂപീകരിച്ച വിമൻസ് ഗ്രീവൻസ് കമ്മിറ്റി എന്നറിയപ്പെട്ട വിശാഖ കമ്മിറ്റിയെ ഓർക്കുന്നു. ശേഷം എന്താണ് സംഭവിച്ചത്. കമ്മിറ്റികളുടെ പേര് മാത്രം മാറിക്കൊണ്ടിരിക്കുന്നു- തനുശ്രീ ദത്ത തുടർന്നു.
എനിക്ക് ഈ സംവിധാനത്തിലുള്ള വിശ്വാസം നഷ്ടപ്പെട്ടിരിക്കുന്നു. ഇത്തരത്തിലുള്ള കമ്മിറ്റിയും റിപ്പോർട്ടുകളും യഥാർഥ ജോലി ചെയ്യാതെ നമ്മുടെ സമയം പാഴാക്കന്നത് പോലെയാണ് എനിക്ക് തോന്നുന്നത്. സുരക്ഷിതമായ ജോലി സ്ഥലം ഒരു സ്ത്രീക്ക് അല്ലെങ്കിൽ ഒരു മനുഷ്യന്റെ അടിസ്ഥാന അവകാശമാണ്- തനുശ്രീ ദത്ത പറഞ്ഞു.
2018 -ൽ നടൻ നാനാ പടേക്കർക്കെതിരെ മീ ടൂ ആരോപണവുമായി തനുശ്രീ ദത്ത രംഗത്തെത്തിയിരുന്നു. നടനെതിരെ ഗുരുതരമായ ആരോപണങ്ങളാണ് തനുശ്രീ ഉന്നയിച്ചത്. ഹോൺ ഓകെ പ്ലീസ് എന്ന ചിത്രത്തിന്റെ സെറ്റിൽ വെച്ച് നാനാ പടേക്കർ തന്നോട് ലൈംഗിക താത്പര്യത്തോടെ മോശമായി പെരുമാറിയെന്ന് അവർ തുറന്നടിച്ചു.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.