അമിതാഭ്​ ബച്ചനെ 'പീഡിപ്പിച്ച്​' രസഗുളയും ഗുലാബ്​ ജാമുനും

ബിഗ്​ സ്​​ക്രീനിൽ വില്ലന്മാരെ തുരത്തുന്ന ബിഗ്​ ബിയെ ഇപ്പോൾ പീഡിപ്പിക്കുന്നത്​ രണ്ടുപേരാണ്​-രസഗുളയും ഗുലാബ്​ ജാമുനും. അമിതാഭ്​ ബച്ചൻ തന്നെയാണ്​ ഈ ​'വെളിപ്പെടുത്തലുമായി' എത്തിയത്​. ഒരു കൈയിൽ ഗുലാബ്​ ജാമുനും മറ്റേ കൈയിൽ രസഗുളയും പിടിച്ചുനിൽക്കുന്ന ചിത്രമാണ്​ ബച്ചൻ ഇൻസ്റ്റ​ഗ്രാമിൽ പങ്കുവെച്ചത്​.

ഏതോ പരസ്യ ചിത്രത്തിനുവേണ്ടി എടുത്ത ഫോ​ട്ടോയാണിത്​. ഇതിന്​ ബച്ചൻ നൽകിയ കാപ്​ഷനാണ്​ രസകരം- 'നിങ്ങൾ മധുരം ഉപേക്ഷിച്ച്​ കഴിഞ്ഞ്​, ഗുലാബ്​ ജാമുനും രസഗുളയും കൈയിൽ തന്ന ശേഷം, അവ ആസ്വദിച്ച്​ കഴിച്ചതുപോലെ പോസ്​ ചെയ്യാൻ പറഞ്ഞാൽ... അതിലും വലിയൊരു 'പീഡനം' ജീവിതത്തിലില്ല'. പ്രമേഹം ബാധിച്ചതിനാൽ വർഷങ്ങൾക്കുമുമ്പ്​ മധുരം ഉപേക്ഷിച്ചയാളാണ്​ ബച്ചൻ.