ഹോളിവുഡിലും പിടിമുറുക്കി ആമസോൺ; 61,459 കോടിക്ക്​ എം.ജി.എം സ്​റ്റുഡിയോ വാങ്ങുന്നു

വാഷിങ്​ടൺ: അമേരിക്കയിൽ തുടങ്ങി ലോകമെങ്ങും പടർന്ന വ്യവസായ സാമ്രാജ്യമായ ആമസോൺ സിനിമ ലോകത്തും കൂടുതൽ വേരുറപ്പിക്കുന്നു. ഹോളിവുഡിലെ ചരിത്ര പ്രധാനമായ സിനിമ കമ്പനി എം.ജി.എം സ്​റ്റുഡിയോസ്​ വാങ്ങുന്നതായി ആമസോൺ അറിയിച്ചു. 845 കോടി ഡോളറി​ (61,459 കോടി രൂപ)നാണ്​ കരാർ. ഇതോടെ, ഓൺലൈൻ സിനിമ വ്യാപാര ലോകത്ത്​ ആമസോൺ പ്രൈം വിഡിയോക്ക്​ കരുത്തുകൂടും.

നിലവിൽ 4,000 സിനിമകളും 17,000 ടെലിവിഷൻ ഷോകളും ആമസോൺ പ്രൈമിനുണ്ട്​.

ഓൺലൈൻ വ്യാപാരം, ക്ലൗഡ്​ കമ്പ്യൂട്ടിങ്​ മേഖലകളിൽ ലോ​കത്തെ ഏറ്റവും വലിയ വ്യവസായ ഭീമനായ ജെഫ്​ ബെസോസി​െൻറ ആമസോൺ എം.ജി.എം കൂടി വാങ്ങുന്നതോടെ നെറ്റ്​ഫ്ലിക്​സ്​ പോലുളള അതികായരെ വെട്ടി ഈ രംഗത്തും ഒന്നാം സ്​ഥാനത്തേക്ക്​ കയറിയേക്കും. ലോകം മുഴുക്കെ 17.5 കോടി പേർ ആമസോൺ പ്രൈം വരിക്കാരായുണ്ട്​. 2017ലാണ്​ ഇതുവഴി ആദ്യമായി സിനിമ ഓൺലൈനിലെത്തുന്നത്​. അടുത്തിടെയായി ഹിറ്റ്​ സിനിമകൾ കുറഞ്ഞ എം.ജി.എം ​(മെട്രോ ഗോൾഡ്​വിൻ മേയർ) പ്രശസ്​തമായ ജെയിംസ്​ ബോണ്ട്​ സിനിമകൾ ഉൾപെടെ നിർമിച്ചവയാണ്​. 1924ലാണ്​ കമ്പനി നിലവിൽ വരുന്നത്​. ഏറെ ജനപ്രിയമായ 'ഫാർഗോ', വൈകിങ്​സ്​', 'ഷാർക്​ ടാങ്ക്​' തുടങ്ങിയവയും എം.ജി.എം നിർമിച്ചവയാണ്​.

നെറ്റ്​ഫ്ലിക്​സിനു പുറമെ ഡിസ്​നി പ്ലസ്​, ആപ്​ൾ ടി.വി പ്ലസ്​ തുടങ്ങിയവയും ചുവടുറപ്പിച്ച മേഖലയിലാണ്​ ആമസോൺ വേരുപടർത്തുന്നത്​.