പ്രഫസറെയും സംഘത്തിനെയും കാണാൻ തയാറായിരുന്നോളൂ; 'മണി ഹെയ്​സ്റ്റ്'​ റിലീസിന്​ അവധി പ്രഖ്യാപിച്ച്​ ഇന്ത്യൻ കമ്പനി

ജയ്​പൂർ: ഇന്ത്യയിലടക്കം ആരാധകർ ഏറെയാണ്​ സപാനിഷ്​ നെറ്റ്​ഫ്ലിക്​സ്​ ഷോ ആയ മണി ഹെയ്​സ്റ്റിന്​. അതിന്‍റെ അഞ്ചാമത്തെയും അവസാനത്തെയും സീസൺ സെപ്​റ്റംബർ മൂന്നിന്​ ഒ.ടി.ടി റിലീസ്​ ചെയ്യും. ആരാധകരെ മുൾമുനയിൽനിർത്തിയാണ്​ സീസൺ നാല്​ അവസാനിപ്പിച്ചിരുന്നത്​.

പ്രഫസറും സംഘവും രക്ഷപ്പെടുമോ അല്ലെങ്കിൽ അന്വേഷണ സംഘ​ത്തിന്‍റെ പിടിയിലാകുകയോ കൊല്ലപ്പെടുകയോ ചെയ്യുമോ എന്ന ആകാംക്ഷയിലാണ്​ എല്ലാവരും. അവസാന സീസണിന്‍റെ ട്രെയിലറിനടക്കം വൻ സ്വീകാര്യതയാണ്​ ഇതുവരെ ലഭിച്ചത്​. അതിനാൽ തന്നെ അഞ്ചാം സീസണായി കാത്തിരിക്കുകയാണ്​ ആരാധകർ.

ഇപ്പോൾ സീരീസ്​ റിലീസ്​ ചെയ്യുന്ന സെപ്​റ്റംബർ മൂന്നിന്​ അവധി പ്രഖ്യാപിച്ചിരിക്കുകയാണ്​ ജയ്​പൂർ ആസ്​ഥാനമായ 'വെർവെ ലോജിക്​' കമ്പനി. 'നെറ്റ്​ഫ്ലിക്​സ്​ ആൻഡ്​ ചിൽ ഹോളിഡേ' എന്നാണ്​ അവധി ദിനത്തിന്​ പേരു നൽകിയത്​. ജീവനക്കാർക്ക്​ അന്നേ ദിവസത്തെ ടൈംടേബിളും കമ്പനി പുറത്തിറക്കി.

കോവിഡ്​ 19 മഹാമാരി കാലത്ത്​ ജീവനക്കാരുടെ കഠിനാധ്വാനത്തിന്​ നന്ദി രേഖപ്പെടുത്തിയായിരുന്നു സി.ഇ.ഒ അഭിഷേക്​ ജെയിനിന്‍റെ ട്വീറ്റ്​. 'ഇടയ്​ക്ക്​ ഇടവേള എടുക്കുന്നതിൽ ​കുഴപ്പമില്ല' എന്നും ജെയിനിന്‍റെ ട്വീറ്റിൽ പറയുന്നു.

ജീവനക്കാർ ഇടയ്​ക്ക്​ അവധി നൽകുകയും രസകരമാക്കുന്നതും​ അവരുടെ കാര്യക്ഷമത വർധിപ്പിക്കാൻ ഇടയാക്കുമെന്നാണ്​ കമ്പനിയുടെ അഭി​പ്രായം. പ്രഫസറിനും സംഘത്തിനോടും യാത്രപറയാൻ എല്ലാവരും തയാറായി ഇരിക്കാനും വെർവ്​ ലോജിക്​ പറയുന്നു.

കൂടാതെ സെപ്​റ്റംബർ മൂന്നിലെ മണി ഹെയ്​സ്റ്റ്​ കാണുകയെന്ന്​ ജോലി ഷെഡ്യൂളും കമ്പനി പുറത്തുവിട്ടു. ജീവനക്കാർക്ക്​ അവധി നൽകികൊണ്ടുള്ള ജെയിനിന്‍റെ നീക്കത്തിനെ അഭിനന്ദിച്ച്​ നെറ്റ്​ഫ്ലിക്​സും രംഗത്തെത്തി.