ബുള്ളറ്റ് പ്രൂഫ് ടൊയോട്ട ലാൻഡ് ക്രൂയിസർ എസ്‌യുവിയിൽ സൽമാൻ ഖാൻ; നടന്റെ കാറിന്റെ വില ചർച്ചയാവുന്നു

തോക്ക് ഉപയോഗിക്കാനുളള ലൈസൻസ് ലഭിച്ചതിന് പിന്നാലെ തന്റെ ടൊയോട്ട ലാൻഡ് ക്രൂയിസർ എസ്‌യുവി കാർ ബുള്ളറ്റ് പ്രൂഫാക്കി നടൻ സൽമാൻ ഖാൻ. ബോളിവുഡ് മാധ്യമങ്ങളാണ് ഇതു സംബന്ധമായ വാർത്ത റിപ്പോർട്ട് ചെയ്തിരിക്കുന്നത്. പ്രചരിക്കുന്ന റിപ്പോർട്ട് പ്രകാരം ഏകദേശം 1.5 കോടിയാണ് കാറിന്റെ വില. ബുള്ളറ്റ് പ്രൂഫ് സ്‌ക്രീനുകൾ സ്ഥാപിക്കുന്നതിന് അധിക ചിലവ് വരും. കാര്‍ പുതിയ മോഡല്‍ അല്ലെങ്കിലും, അപകടങ്ങളില്‍ നിന്ന് സംരക്ഷണം നല്‍കാന്‍ ഇതിനു കഴിയും

ഓഗസ്റ്റ് 1 ന് നവീകരിച്ച ടൊയോട്ട ലാൻഡ് ക്രൂയിസറിൽ സൽമാൽ മുംബൈ വിമാനത്താവളത്തിൽ എത്തിയിരുന്നു. ഇതോടെയാണ് കാറ് ബുള്ളറ്റ് പ്രൂഫാക്കിയ വിവരം പുറംലോകത്ത് എത്തിയത്.

ഓഗസ്റ്റ് 1 നായിരുന്നു നടന് തോക്ക് ഉപയോഗിക്കാനുള്ള ലൈസൻസ് മുംബൈ പൊലീസ് അനുവദിച്ചത്. എന്നാൽ നടൻ വാങ്ങാൻ പോകുന്ന തോക്കിനെ കുറിച്ചുള്ള വിവരം പുറത്ത് വന്നിട്ടില്ല.

പഞ്ചാബി ഗായകനും കോൺഗ്രസ് നേതാവുമായ സിദ്ധ മൂസെവാലെ കൊല്ലപ്പെട്ടതിന് പിന്നാലെയാണ് സൽമാനും പിതാവിനും വധഭീഷണി സന്ദേശം ലഭിക്കുന്നത്. മുസെവാലയുടെ ഗതി നിങ്ങൾക്കും ഉണ്ടാകും എന്നായിരുന്നു കത്തിൽ. ഇതിന് പിന്നാലെയാണ് തോക്ക് കൈവശം വെക്കാനുളള അനുമതി തേടിയത്.