ആര്യയെ നായകനാക്കി പാ രഞ്​ജിത്ത്​ ഒരുക്കിയ 'സാർപട്ടാ പരമ്പരൈ' ഒടിടിയിൽ; റിലീസ്​ തീയതി പുറത്ത്​

രജനീകാന്ത്​ നായകനായ കാലാ എന്ന ചിത്രത്തിന്​ ശേഷം പാ രഞ്ജിത്ത് സംവിധാനം ചെയ്യുന്ന 'സാർപട്ടാ പരമ്പരൈ'യുടെ ഒ.ടി.ടി റിലീസ് തീയതി പ്രഖ്യാപിച്ചു. ആര്യ നായകനായി എത്തുന്ന ചിത്രം ജൂലൈ 22ന്​ ആമസോൺ പ്രൈമിലൂടെ പ്രേക്ഷകരിലേക്കെത്തും. സംവിധായകൻ പാ രഞ്ജിത്തും ആര്യയുമാണ് റിലീസ് തിയതി സമൂഹ മാധ്യമങ്ങളിലൂടെ പുറത്തു വിട്ടത്. മഗാമുനി, ടെഡി ബിയർ എന്നീ ചിത്രങ്ങൾക്ക്​ ശേഷം ആര്യ നായകനാകുന്ന സാർപട്ടാ പരമ്പരൈ താരത്തി​െൻറ കരിയറിലെ തന്നെ ഏറ്റവും പ്രതീക്ഷയുള്ള ചിത്രമാണ്​.

വ്യക്തിയായാലും, സമൂഹമായാലും വെറുതെ ജീവിച്ചു പോകുന്നതിലും യോ​ഗ്യതയോടെ ജീവിക്കുന്നതിനും തമ്മിൽ വലിയ വത്യാസമുണ്ട് എന്ന ബാബ സാഹിബ് അംബേദ്ക്കറുടെ വാക്കുകൾ ഉദ്ധരിച്ചാണ് പാ രഞ്ജിത്ത് ചിത്രത്തി​െൻറ പോസ്റ്റർ പങ്കുവെച്ചത്.

പാ രഞ്ജിത്ത് തന്നെയാണ്​ ചിത്രത്തി​െൻറ രചന നിർവഹിച്ചിരിക്കുന്നത്​. 1980കളുടെ പശ്ചാത്തലത്തിൽ ചിത്രീകരിച്ചിരിക്കുന്ന ചിത്രം തമിഴ്, തെലു​ഗു ഭാഷകളിലാണ് ഇറങ്ങുന്നത്. 1980 കാലഘട്ടത്തിൽ വടക്കൻ ചെന്നൈയിൽ നിലനിന്നിരുന്ന ബോക്സിം​ഗ് ഭ്രമത്തി​െൻറ കഥയാണ് സാർപട്ടാ പറയുന്നത്. ചിത്രത്തിന്​ വേണ്ടി ആര്യ നടത്തിയ മേക്കോവർ വലിയ ശ്രദ്ധ നേടിയിരുന്നു. സന്തോഷ് പ്രതാപ്, ഷബീര്‍ കല്ലരക്കല്‍, ജോണ്‍ കൊക്കെന്‍ എന്നിവരും ചിത്രത്തില്‍ പ്രധാന വേഷങ്ങള്‍ ചെയ്യുന്നുണ്ട്.