'ഞാന്‍ ഫഹദ് , ചെറിയൊരു നടനാണ്'; അദ്ദേഹത്തിന് ഇതെങ്ങനെ പറയാൻ കഴിഞ്ഞു? മെസേജിനെ കുറിച്ച് 'കിൽ' താരം രാഘവ് ജുയൽ

അടുത്തിടെ കേരളത്തിലും മികച്ച സ്വീകാര്യത ലഭിച്ച ബോളിവുഡ് ആക്ഷൻ ത്രില്ലർ ചിത്രമാണ് കിൽ. അവതാരകനും ഡാൻസറുമായ രാഘവ് ജുയൽ ആയിരുന്നു സിനിമയിലെ പ്രധാന ആകർഷണം. ചിത്രത്തിൽ വില്ലൻ കഥാപാത്രത്തെയാണ് രാഘവ് അവതരിപ്പിച്ചിരിക്കുന്നത്. തന്യ, അഭിഷേക് ചൗഹാൻ, ആശിഷ് വിദ്യാർത്ഥി എന്നിവരാണ് ചിത്രത്തിലെ മറ്റുതാരങ്ങൾ.

കിൽ കണ്ടതിന് ശേഷം നടൻ ഫഹദ് ഫാസിൽ തനിക്ക് അയച്ച സന്ദേശത്തെക്കുറിച്ച് പറയുകയാണ് രാഘവ്. സ്റ്റാൻഡ് അപ്പ് കൊമേഡിയനും അവതാരകനുമായ ഹാർഷ് ലിംബാച്ചിയയുമായുള്ള പോഡ്കാസ്റ്റ് അഭിമുഖത്തിലാണ് ഇക്കാര്യം പറഞ്ഞത്. ഫഹദിന്റെ വാക്കുകൾ തന്നെ ഞെട്ടിപ്പിച്ചെന്നും അദ്ദേഹത്തിന്റെ ഉള്ളിൽ നിന്നാണ് കഥാപാത്രങ്ങൾ വരുന്നതെന്നും രാഘവ് പറഞ്ഞു. ഫഹദിന്റെ ആവേശം സിനിമയെക്കുറിച്ച് സംസാരിക്കവെയാണ് ഇക്കാര്യം പറഞ്ഞത്.

'കിൽ സിനിമ കണ്ടതിന് ശേഷം ഫഹദ് ഭായി എനിക്ക് മെസേജ് അയച്ചു. അദ്ദേഹം സ്വയം പരിചയപ്പെടുത്തിയതാണ് എന്നെ ഞെട്ടിച്ചത്.' രാഘവ് , ഞാൻ ഫഹദ് ഫാസിൽ, വളരെ ചെറിയൊരു നടനാണ്. കിൽ കണ്ടു. വളരെ ഗംഭീരമായിട്ടുണ്ട്' എന്നായിരുന്നു പറഞ്ഞത്. അദ്ദേഹം ചെറിയ നടനാണെന്ന് പറഞ്ഞതാണ് എന്നെ ഞെട്ടിപ്പിച്ചത്. എങ്ങനയൊണ് അദ്ദേഹത്തിന് താനൊരു ചെറിയ നടനാണെന്ന് പറയാൻ സാധിക്കുന്നത്.

ഫഹദ് ഭായിയുടെ ആവേശം സിനിമ കണ്ടു. അഭിനയിക്കുകയാണെന്ന് തോന്നിപ്പിക്കാത്തവിധത്തിലാണ് അദ്ദേഹത്തിന്റെ പ്രകടനം. ഉള്ളിൽ നിന്നാണ് കഥാപാത്രങ്ങൾ വരുന്നത്. എഴുതിവെച്ചിരിക്കുന്ന ഡയലോഗാണ് പറയുന്നതെന്ന് ഒരിക്കലും തോന്നില്ല'-രാഘവ് പറഞ്ഞു.

രൺബീർ കപൂറിന്റെ അനിമലിന് ശേഷം ഏറ്റവുമധികം വയലൻസുമായി എത്തിയ ആക്ഷൻ ത്രില്ലർ ചിത്രമാണ് കിൽ. ഇന്ത്യയിൽ ഹോട്ട്സ്റ്റാറാണ് ചിത്രം ഒ.ടി.ടിയിലെത്തിച്ചിരിക്കുന്നത്.