മണി ഹീസ്റ്റ് അഞ്ചാം സീസണിൽ പൃഥ്വിരാജിനും ഫഹദിനും എന്ത്​ റോൾ?

നെറ്റ്​ഫ്ലിക്‌സിന്‍റെ ഹിറ്റ് സ്പാനിഷ് സീരീസാണ് ലാ കാസാ ഡി പാപെല്‍ അഥവാ മണി ഹീസ്റ്റ്. സ്പാനിഷ് സീരീസായിട്ട് കൂടി ലോകത്തില്‍ ആകമാനം ആരാധകരെ സൃഷ്ടിക്കാന്‍ മണി ഹീസ്റ്റിന് സാധിച്ചു. ജനപ്രിയ സീരീസ്​ ആയ മണി ഹീസ്റ്റിന്‍റെ അഞ്ചാം സീസൺ വരുന്നതിന്‍റെ ആവേശത്തിലാണ്​ കേരളത്തിലുള്ള ആരാധകരും.

മണി ഹീസ്റ്റിലെ പ്രഫസറും റാക്വേലും ടോക്യോയും ബെര്‍ലിനും പലെർ​മോയുമൊക്കെ മലയാളികൾക്കും സുപരിചിതരാണ്​. മണി ഹീസ്റ്റിന്‍റെ അഞ്ചാം സീസൺ മലയാളത്തിലാണ് ചിത്രീകരിച്ചതെങ്കില്‍ ആരെല്ലാമാകും സുപ്രധാന കഥാപാത്രങ്ങളെ അവതരിപ്പിക്കുക എന്ന ആലോചനയും അതിനിടെ ചിലർ നടത്തി. പ്രഫസറായും പലെർമോ ആയും ഡെൻവറായുമൊക്കെ ഏത്​ മലയാളി താരങ്ങൾ അഭിനയിക്കുമെന്ന ചോദ്യങ്ങൾക്കുള്ള മറുപടിയായി ഒരു വീഡിയോ ആണ്​ഇപ്പോൾ ആരാധകർ പങ്കുവെച്ചിരിക്കുന്നത്​.

പ്രഫസറായി പൃഥ്വിരാജിനെയും പ​ലെർമോ ആയി ഫഹദ്​ ഫാസിലിനെയും റാക്വേൽ ആയി മഞ്ജു വാര്യരെയും ഡെൻവർ ആയി ആസിഫ്​ അലിയെയുമാണ്​ വിഡിയോയിൽ ചിത്രീകരിച്ചിരിക്കുന്നത്​. ടോക്യോ ആയി രജീഷ വിജയൻ, റിയോ ആയി ഷെയ്​ൻ നിഗം, ജൂലിയ ആയി സംയുക്​ത, സ്​റ്റോക്​ഹോം ആയി മംമ്​ത മോഹൻദാസ്​, ഹെൽസിങ്കി ആയി ബാബുരാജ്​, ​ബൊഗോട്ടി ആയി ജോജു, മാർസെല്ല ആയി ചെമ്പൻ വിനോദിനെയുമാണ്​ അവതരിപ്പിച്ചിരിക്കുന്നത്​. സാങ്കല്‍പ്പികമാണെങ്കിലും ഈ കഥാപാത്രങ്ങളെ അവതരിപ്പിക്കാൻ ഇവർ അനു​​യോജ്യരാണെന്നാണ്​ ആരാധകരുടെ പക്ഷം.

മണി ഹീസ്റ്റിന്‍റെ അവസാന സീസണ്‍ പുറത്തിറങ്ങാനുള്ള തീയതി പ്രഖ്യാപിച്ചതോടെ ആരാധകര്‍ ഏറെ ആവേശത്തിലാണ്. അഞ്ചാം സീസണ്‍ യുദ്ധ സമാനമാകുമെന്നാണ്​ ട്രെയിലര്‍ നൽകുന്ന സൂചന. ബാങ്ക് ഓഫ് സ്‌പെയിനില്‍ നടക്കുന്ന കവര്‍ച്ചയാണ് കഴിഞ്ഞ സീസണില്‍ ആരംഭിച്ചത്. ഇതിന്‍റെ തുടര്‍ച്ചയാണ് ഈ സീസണിലുള്ളത്.