'ഞാനറിയുന്ന ഏറ്റവും ദയയുള്ള മനുഷ്യനാണ്​ താങ്കൾ'; ഹൃദയം തൊടുന്ന കുറിപ്പുമായി നസ്രിയ

നടൻ ഫഹദ് ഫാസിലിന് ജന്മദിനാശംസകൾ നേർന്ന് ഭാര്യയും നടിയുമായ നസ്രിയ നാസിം. ഇൻസ്​റ്റഗ്രാമിലൂടെയാണ്​ നസ്രിയ ഫഹദിന്​ ജന്ശംമദിനാശംസകൾ നേർന്നത്​. എപ്പോഴും ഔട്ട് ഓഫ് ഫോക്കസ് ആകാൻ ഇഷ്ടപ്പെടുന്നയാൾ എന്നാണ് നസ്രിയ ഫഹദിനെ വിശേഷിപ്പിച്ചത്. ഞാനറിയുന്ന ഏറ്റവും ദയയുള്ള മനുഷ്യനാണ് താങ്കൾ എന്നും കുറിപ്പിലുണ്ട്​. 'എല്ലായ്‌പ്പോഴും ഔട്ട് ഓഫ് ഫോക്കസാകാൻ ഇഷ്ടപ്പെടുന്ന മനുഷ്യന് സന്തോഷ ജന്മദിനം. ഷാനു, നിങ്ങളുടെ സ്വപ്‌നങ്ങൾ സഫലമാകട്ടെ. ഞാനറിയുന്ന ഏറ്റവും ദയയുള്ള മനുഷ്യനാണ് താങ്കൾ. സന്തോഷ ജന്മദിനം' - ഫഹദി​െൻറ 39-ാം ജന്മദിനത്തിൽ നസ്രിയ കുറിച്ചു. ഇരുവരും ഒരുമിച്ചുള്ള ചിത്രവും നസ്രിയ പങ്കുവച്ചിട്ടുണ്ട്​.

മലയാളം, തമിഴ്​ സിനിമ വ്യവസായത്തിൽ നിന്ന്​ ധാരാളം പേർ ഫഹദിന്​​ ആശംസകൾ നേർന്നിരുന്നു. ​ പുറത്തിറങ്ങാനിരിക്കുന്ന തമിഴ്​ സിനിമ വിക്രമിലെ ഫഹദിന്‍റെ കഥാപാത്രത്തിന്‍റെ സ്​പെഷൽ​ പോസ്റ്ററാണ്​ അണിയറ പ്രവർത്തകർ പങ്കുവെച്ചത്​.

കമൽ ഹാസനും വിജയ്​ സേതുപതി​ക്കുമൊപ്പം ഫഹദും പ്രധാന വേഷത്തിലെത്തുന്ന ചിത്രമാണ്​ വിക്രം. നരേയ്​ൻ, കാളിദാസ്​ ജയറാം തുടങ്ങിയവരും ചിത്രത്തിൽ പ്രധാന വേഷങ്ങളിലെത്തും.

വിജയ്​ ചിത്രം 'മാസ്റ്റർ'ന്‍റെ സംവിധാനം നിർവഹിച്ച ലോകേഷ്​ കനകരാജാണ്​ വിക്രമിന്‍റെയും സംവിധായകൻ. അദ്ദേഹമാണ്​ ഫഹദിന്‍റെ 39ാം ജന്മദിനത്തിൽ ട്വിറ്ററിൽ പോസ്റ്റർ പങ്കുവെച്ചത്​. ബ്ലാക്ക്​ ആൻഡ്​ വൈറ്റ്​ ഷെയ്​ഡിൽ ഫഹദിൻറെ മുഖമാണ്​ പോസ്റ്ററിൽ.

കമൽ ഹാസനും ഫഹദിന്​​ ആശംസകൾ നേർന്ന് രംഗത്തെത്തി. ഫഹദിന്​ ഐശ്വര്യ സമ്പൂർണമായ പിറന്നാൾ ആശംസകൾ എന്നായിരുന്നു കമലിന്‍റെ ട്വീറ്റ്​.

വിക്രം ലൊക്കേഷനിൽ കമൽ ഹാസനൊപ്പം നിൽക്കുന്ന ചിത്രം ഫഹദ്​ നേരത്തേ പുറത്തുവിട്ടിരുന്നു. തെന്നിന്ത്യൻ സിനിമ പ്രേമികൾ ആകാംക്ഷയോടെ നോക്കുന്ന ചിത്രമാണ്​ വിക്രം. വൻതാരനിരയും അണിയറ പ്രവർത്തകരും അണിനിരക്കുന്ന ചിത്രമാണ്​ വിക്രം. ഗിരീഷ്​ ഗംഗാധരനാണ്​ ചിത്രത്തിന്‍റെ ഛായാഗ്രാഹകൻ.

ആശംസകളുമായി 'പുഷ്​പ'യും

ഫഹദിന്​ ആശംസകൾ നേർന്ന്​ പുഷ്​പ അണിയറ പ്രവർത്തകരും രംഗത്തെത്തി. അല്ലു അർജുൻ നായകനായും ഫഹദ്​ ഫാസിൽ പ്രതിനായകനായും രംഗത്തെത്തുന്ന ചിത്രമാണ്​ പുഷ്​പ. ചിത്രത്തിന്‍റെ പോസ്റ്റർ ടീം പുറത്തുവിടുകയായിരുന്നു.

250 കോടി ചിലവിട്ടാണ്​ ചിത്രത്തിന്‍റെ നിർമാണം. രണ്ടു​ ഭാഗങ്ങളാണ്​ ചിത്രം പുറത്തിറങ്ങുക. ആദ്യഭാഗം ഒക്​ടോബറിലും രണ്ടാംഭാഗം 2022ലും റിലീസ്​ ചെയ്യും.