നിവിൻ പോളിക്കെതിരായ പീഡന പരാതി: തീയതികൾ പറഞ്ഞത് ഉറക്കപ്പിച്ചി​ലെന്ന് യുവതി

കൊച്ചി: നിവിൻ പോളിക്കെതിരായ പീഡന പരാതിയിൽ പുതിയ വെളിപ്പെടുത്തലുമായി യുവതി. ​​ലൈംഗികാതിക്ര പരാതിയിലെ തീയതികൾ ഉറക്കപ്പിച്ചിൽ പറഞ്ഞതാണെന്നാണ് യുവതി മൊഴി നൽകിയിരിക്കുന്നത്.

2023 ഡിസംബർ 14,15 തീയതികളിൽ ലൈംഗിക അതിക്രമം ഉണ്ടായെന്നാണ് യുവതി മൊഴി നൽകിയിരുന്നത്. എന്നാൽ, യുവതി ആരോപണം ഉന്നയിച്ചിരിക്കുന്ന തീയതികളിൽ നിവിൻ പോളി വിനീത് ശ്രീനിവാസൻ സംവിധാനം ചെയ്ത സിനിമയുടെ ലൊക്കേഷനിലായിരുന്നുവെന്നതിന്റെ തെളിവുകൾ പുറത്ത് വന്നിരുന്നു.

പരാതിക്കെതിരെ നിവിൻ പോളിയും രംഗത്തെത്തിയിരുന്നു. ഇതിന് പിന്നാലെയാണ് തിയതി ഉറക്കപ്പിച്ചിൽ പറഞ്ഞുവെന്ന് യുവതി മൊഴി നൽകിയിരിക്കുന്നത്. ഇന്ന് അന്വേഷണ സംഘം തന്റെ വരുമാന വിവരങ്ങൾ തിരക്കാനാണ് വിളിച്ചതെന്നും കേസ് അട്ടിമറിക്കുന്നുവെന്ന സംശയം ഉണ്ടെന്നും യുവതി ആരോപിച്ചു. പൊലീസ് സത്യം അനേഷിച്ച് കണ്ടെത്തട്ടെയെന്നും മൊഴിയെടുപ്പിന് ശേഷം യുവതി പ്രതികരിച്ചു.

അതേസമയം, കോതമംഗലം സ്വദേശിനിയായ യുവതിയുടെ ആരോപണങ്ങളിൽ ഗൂഡാലോചനയുണ്ടെന്നും വിശദമായ അന്വേഷണം നടക്കണമെന്നും ആവശ്യപ്പെട്ട് നിവിൻ പോളി ഡിജിപിയെ സമീപിച്ച് പരാതി നൽകിയിട്ടുണ്ട്. കേസിൽ ആരോപിക്കുന്ന ഡിസംബർ മാസം താൻ കേരളത്തിൽ ഉണ്ടായിരുന്നുവെന്നും തെളിവായി പാസ്പോർട്ട് ഹാജരാക്കുമെന്നും നിവിൻ പറഞ്ഞു. കേസ് അന്വേഷിക്കുന്ന പ്രത്യേക അന്വേഷണ സംഘത്തിനും നിവിൻ പരാതിയുടെ പകർപ്പ് നൽകിയിട്ടുണ്ട്.