ആഭ്യന്തര പരാതി പരിഹാര സമിതി; സിനിമ സംഘടനകൾ നടപ്പാക്കാൻ ബാധ്യസ്ഥരെന്ന് ഡബ്ല്യു.സി.സി

കൊച്ചി: സിനിമ നിർമാണ യൂനിറ്റുകളിൽ ആഭ്യന്തര പരാതി പരിഹാര സമിതി (ഐ.സി.സി) വേണമെന്ന ഹൈകോടതി ഉത്തരവ്​ സ്വാഗതംചെയ്ത് ചലച്ചിത്ര മേഖലയിലെ വനിതകളു​ടെ കൂട്ടായ്മയായ ഡബ്ല്യു.സി.സി. വിധി മലയാളി സ്ത്രീചരിത്രത്തിൽതന്നെ വലിയ നാഴികക്കല്ലാണെന്നും സിനിമയിലെ എല്ലാ സ്ത്രീകൾക്കും ഈ രംഗത്തേക്ക് വരാൻ ആഗ്രഹിക്കുന്നവർക്കും ഇത്​ നൽകുന്ന ആശ്വാസം ചെറുതല്ലെന്നും ഡബ്ല്യു.സി.സി വ്യക്തമാക്കി.

സംസ്ഥാന സർക്കാറും ഫെഫ്ക, പ്രൊഡ്യൂസേഴ്സ് അസോസിയേഷൻ, അമ്മ, മാക്ട, ഫിലിം ചേംബർ തുടങ്ങിയ സംഘടനകളുമെല്ലാം 2013​ലെ പോഷ്​ ആക്​​ടിൽ പറഞ്ഞ വ്യവസ്ഥകൾ നടപ്പാക്കാൻ ബാധ്യസ്ഥരാണെന്നും ഇക്കാര്യം സിനിമ വ്യവസായത്തിലെ എല്ലാവരും ഉറപ്പുവരുത്തേണ്ടതുണ്ടെന്നും കൂട്ടായ്മയുടെ ഫേസ്ബുക്ക് പോസ്റ്റിൽ ചൂണ്ടിക്കാട്ടി.

പോഷ് ആക്ട് പ്രകാരമാണ് ഐ.സി.സി നടപ്പാക്കുന്നതെന്ന് ഉറപ്പാക്കാൻ 'അമ്മ'യോട് വിധി ആവശ്യപ്പെടുന്നുണ്ട്. നടപ്പാക്കലിന്റെ സ്വഭാവത്തെക്കുറിച്ചും ഫലപ്രാപ്തിയെക്കുറിച്ചും ജാഗ്രത പാലിക്കേണ്ടതുണ്ട്​. ഇതിനായി സമാന ചിന്താഗതിക്കാരായ എല്ലാ സംഘടനകളുമായും കൈകോർക്കുന്നതിൽ സന്തോഷമേ ഉള്ളൂവെന്നും ഡബ്ല്യു.സി.സി കൂട്ടിച്ചേർത്തു.