നിശ്ശബ്​ദതയിൽ സംസാരിക്കുന്ന നടൻ- 40 വർഷം മുമ്പ്​ 'മഞ്ഞിൽ വിരിഞ്ഞ പൂക്കൾ' തീയറ്ററിൽ കണ്ട അനുഭവവുമായി ജയരാജ് വാര്യർ

മലയാള സിനിമയിൽ ചരിത്രപരമായ അടയാളപ്പെടുത്തലായിരുന്നു ഫാസിൽ സംവിധാനം ചെയ്ത 'മഞ്ഞിൽ വിരിഞ്ഞ പൂക്കൾ'. അന്നുവരെ മലയാളികൾ കണ്ട വാണിജ്യ ചേരുവകളേതുമില്ലാതെ പുതിയ രീതിയിലുള്ള സിനിമാ ചമത്കാരം ആയിരുന്നു അതെന്ന്​ പറയുന്നു നടൻ ജയരാജ്​ വാര്യർ. 'മഞ്ഞിൽ വിരിഞ്ഞ പൂക്കൾ' റിലീസ് ചെയ്തിട്ട് 40 വർഷം തികയുന്ന വേളയിൽ സിനിമ തീയറ്ററിൽ കണ്ട അനുഭവം അദ്ദേഹം ഓർത്തെടുത്തു.

'സിനിമയുടെ സംവിധായകൻ മുതലുള്ള ഭൂരിഭാഗം പേരും പുതുമുഖങ്ങൾ ആയിരുന്നതായിരുന്നു ഏറ്റവും വലിയ ​പ്രത്യേകത. അക്കാലത്തെ ന്യൂജൻ സിനിമ. മലയാളം കണ്ട എക്കാലത്തെയും മികച്ച നടന്മാരിൽ ഒരാളുടെ ഉദയം കൂടിയായി ആ സിനിമ. അന്ന്​ സിനിമ കണ്ട ശേഷം ഞങ്ങൾ ചർച്ച ചെയ്​തത്​ അതിലെ വില്ലൻ നടനെ കുറിച്ചായിരുന്നു. മലയാളി മനസിലേക്ക് ഒരു തോളും ചരിച്ച് നടന്നു കയറിയ മോഹൻലാൽ ആ സിനിമയിലൂടെ അഭ്രപാളികൾക്ക് വിസ്മയം സമ്മാനിച്ചു. ചുരുട്ടും ചുവന്ന വെളിച്ചവും അകമ്പടി സേവിക്കാത്ത ഒരു വില്ലനെ മലയാളി ആദ്യമായി കണ്ടു. നായകനെക്കാൾ വില്ലൻ ചർച്ചാവിഷയമായി. മോഹൻലാൽ മലയാളിക്ക് സ്വന്തമായി'- ജയരാജ്​ വാര്യർ പറഞ്ഞു.

മോഹൻലാൽ, ശങ്കർ, പൂർണിമ എന്നിവർക്ക്​ പുറമെ പ്രതാപചന്ദ്രൻ, ആലുംമൂടൻ, നെടുമുടി വേണു തുടങ്ങിയവരും ചിത്രത്തിൽ പ്രധാന വേഷങ്ങളിലെത്തി. മനോഹരമായ ഗാനങ്ങളാലും ഈ ചിത്രം പ്രേക്ഷക ഹൃദയങ്ങളിൽ ചിരകാല പ്രതിഷ്ഠ നേടി. മിഴിയോരം, മഞ്ഞണിക്കൊമ്പിൽ, മഞ്ചാടിക്കുന്നിൽ തുടങ്ങിയ ഗാനങ്ങളും ഏറെ ശ്രദ്ധിക്കപ്പെട്ടിരുന്നു. ഗാനരചന നിർവ്വഹിച്ചത് ബിച്ചു തിരുമലയായിരുന്നു. സംഗീതസംവിധാനം ജെറി അമൽദേവും. 'മഞ്ഞിൽ വിരിഞ്ഞ പൂക്കൾ' തീയറ്ററിൽ കണ്ട അനുഭവം വിവരിച്ച്​ മോഹൻലാൽ എന്ന നടന്‍റെ ഭാവഭേദങ്ങളിലൂടെ ജയരാജ് വാര്യർ യാത്ര ചെയ്യുന്ന വിഡിയോ കാണാം.