'ആദിപുരുഷി'നെതിരെ ബി.ജെ.പി; രംഗങ്ങൾ മാറ്റിയില്ലെങ്കിൽ നിയമനടപടിയെന്ന്

ഭോപ്പാൽ: ടീസർ പുറത്തുവിട്ടതിന് പിന്നാലെ ട്രോളുകളിൽ നിറഞ്ഞ ചിത്രമാണ് പ്രഭാസിനെ നായകനാക്കി ഓം റൗട്ട് സംവിധാനം ചെയ്യുന്ന 'ആദിപുരുഷ്'. കാർട്ടൂൺ സിനിമകൾക്ക് സമാനമായ വി.എഫ്.എക്സ് രംഗങ്ങളാണ് വ്യാപക ട്രോളിന് കാരണമായത്. ഇതിന് പിന്നാലെയിതാ, സിനിമക്കെതിരെ വിമർശനവുമായി ബി.ജെ.പിയും രംഗത്തെത്തിയിരിക്കുകയാണ്.

ഹിന്ദു ദൈവങ്ങളെ മോശമായി ചിത്രീകരിക്കുന്നുവെന്ന് ആരോപിച്ചാണ് ബി.ജെ.പി സിനിമയുടെ അണിയറക്കാർക്ക് മുന്നറിയിപ്പ് നൽകിയിരിക്കുന്നത്. ഹിന്ദു ദൈവങ്ങളെ മോശമാക്കിയാൽ സിനിമക്കെതിരെ നിയമനടപടി സ്വീകരിക്കുമെന്ന് വ്യക്തമാക്കി രംഗത്തെത്തിയത് മധ്യപ്രദേശ് ആഭ്യന്തര മന്ത്രി നരോത്തം മിശ്ര തന്നെയാണ്.

'ആദിപുരുഷിന്‍റെ ട്രെയിലർ ഞാൻ കണ്ടിരുന്നു. പ്രതിഷേധാർഹമായ നിരവധി രംഗങ്ങൾ സിനിമയിലുണ്ട്. സിനിമയിൽ കാണിക്കുന്ന ഹിന്ദു ദൈവങ്ങളുടെ രൂപവും വസ്ത്രവും ഒരിക്കലും അംഗീകരിക്കാവുന്നതല്ല' -നരോത്തം മിശ്ര പറഞ്ഞു.

ചിത്രത്തിൽ ഹനുമാൻ ലെതർ ചെരിപ്പ് ധരിച്ചതായാണ് കാണിക്കുന്നതെന്ന് അദ്ദേഹം ചൂണ്ടിക്കാട്ടി. പുരാണങ്ങളിൽ അങ്ങനെയല്ല. ഇത്തരം നിരവധി രംഗങ്ങളുണ്ട്. ഇവയെല്ലാം നീക്കണമെന്നാവശ്യപ്പെട്ട് സംവിധായകൻ ഓം റൗട്ടിന് ഞാൻ കത്തെഴുതുന്നുണ്ട്. ഈ രംഗങ്ങൾ ഒഴിവാക്കിയില്ലെങ്കിൽ നിയമനടപടിയിലേക്ക് കടക്കും -നരോത്തം മിശ്ര പറഞ്ഞു.

(മധ്യപ്രദേശ് ആഭ്യന്തര മന്ത്രി നരോത്തം മിശ്ര)

ബി.ജെ.പി വക്താവ് മാളവിക അവിനാഷും ആദിപുരുഷിനെ വിമർശിച്ച് രംഗത്തെത്തി. രാക്ഷസ രാജാവായ രാവണനെ ചിത്രത്തിൽ തെറ്റിദ്ധരിപ്പിക്കുന്ന രീതിയിലാണ് കാണിച്ചിരിക്കുന്നത്. ശിവഭക്തനായ ബ്രാഹ്മണനാണ് രാവണൻ. സിനിമയിലെ നീലക്കണ്ണുള്ള രാവണന്‍റെ കഥാപാത്രം ലെതർ ജാക്കറ്റാണ് ധരിച്ചിരിക്കുന്നത്. തുർക്കി സ്വേച്ഛാധിപതിയെ പോലെയാണുള്ളത്. നമ്മുടെ ചരിത്രത്തെയാണ് അവർ സിനിമയാക്കുന്നത്. ആവിഷ്കാര സ്വാതന്ത്ര്യത്തിന്‍റെ പേരിൽ എന്തും ചെയ്യാനുള്ള അവകാശമില്ല -മാളവിക അവിനാഷ് പറഞ്ഞു.

ട്രെയിലർ ഇറങ്ങിയത് മുതൽ ചിത്രത്തിലെ ​വി.എഫ്.എക്സ് രം​ഗങ്ങൾ വ്യാപക ട്രോളുകൾക്ക് ഇടയാക്കിയിരുന്നു. ഇതിന് പിന്നാലെ, ചിത്രത്തിനായി ​വി.എഫ്.എക്സ് ജോലികൾ ചെയ്തത് തങ്ങളല്ലെന്ന് പറഞ്ഞ് എൻ.വൈ വി.എഫ്.എക്സ് വാലാ എന്ന കമ്പനി രം​ഗത്തെത്തുകയും ചെയ്തിരുന്നു. നടൻ അജയ് ദേവ്​ഗണിന്റെ ഉടമസ്ഥതയിലുള്ള വി.എഫ്.എക്സ് കമ്പനിയാണ് എൻ.വൈ വി.എഫ്.എക്സ് വാലാ. സിനിമയുടെ വി.എഫ്.എക്സ് ചെയ്തത് തങ്ങളല്ല എന്നും ടീസറിന് പിന്നാലെ നിരവധി മീഡിയകൾ തങ്ങളോട് ചോദിച്ചതുകൊണ്ടാണ് ഇങ്ങനെയൊരു വ്യക്തത വരുത്തുന്നത് എന്നും എൻ.വൈ വി.എഫ്.എക്സ് വാല കുറിപ്പിൽ പറയുന്നു.

ആദിപുരുഷിന്‍റെ ട്രെയിലർ കണ്ട് നായകൻ പ്രഭാസ് വരെ ദേഷ്യപ്പെട്ടെന്നാണ് സിനിമ വെബ്സൈറ്റുകൾ റിപ്പോർട്ട് ചെയ്യുന്നത്. വി.എഫ്.എക്സിന് ഏറെ പ്രാധാന്യമുള്ള സിനിമയുടെ ബജറ്റ് 500 കോടിയാണ്. കുട്ടികൾക്കായുള്ള കൊച്ചുടി.വിയിൽ പ്രദർശിപ്പിക്കുന്ന സീരിയലുകൾക്കുപോലും ഇതിലും നിലവാരമുണ്ടെന്നാണ് മലയാളി വിമർശകരുടെ പ്രതികരണങ്ങൾ. ടെമ്പിൾ റൺ എന്ന മൊബൈല്‍ ഗെയ്മിനു പോലും ഇതിലും മികച്ച വി.എഫ്.എക്സ് ആണെന്നും ഇവർ പറയുന്നു.

ഓം റൗട്ട് സംവിധാനം ചെയ്യുന്ന ചിത്രം രാമ–രാവണ പോരാട്ടത്തിന്റെ കഥയാണ് പറയുന്നത്. രാഘവ എന്ന കഥാപാത്രമായി പ്രഭാസും ലങ്കേഷ് എന്ന വില്ലൻ കഥാപാത്രമായി സെയ്ഫ് അലിഖാനും എത്തുന്നു. ജാനകിയായി കൃതി സനോൺ. ലക്ഷ്മണനായി സണ്ണി സിങ്. ഹനുമാന്റെ വേഷത്തിൽ ദേവദത്ത നാഗേ. ഇന്ത്യയിൽ ഏറ്റവും മുതൽമുടക്കേറിയ ചിത്രങ്ങളിലൊന്നാണ് ആദിപുരുഷ് എന്നാണ് അണിയറക്കാർ അവകാശപ്പെടുന്നത്.