ഓണമുണ്ണാൻ റിലീഫ്​ ക്യാമ്പിലേക്ക്​ വിളിച്ച മമ്മൂക്ക

ഒരു കലാകാരൻ എന്ന നിലയിലെ വിജയം മാത്രമാണോ മമ്മൂട്ടിയുടെ എഴുപതാം ജന്മദിനം ഇങ്ങനെ ആഘോഷിക്കാൻ കാരണമെന്ന്​ ഞാൻ ആലോചിച്ചിട്ടുണ്ട്​. ദേശീയോത്സവം പോലെയാണ്​ മമ്മൂക്കയുടെ ജന്മദിനാഘോഷം. അദ്ദേഹത്തെപോലൊരാൾ ജീവിച്ചിരിക്കുന്ന സമയത്ത്​ ചെയ്യുന്ന​ എണ്ണിപ്പറയാൻ പറ്റാത്തത്ര കാര്യങ്ങൾ കൊണ്ടാണ്​ ഈ പിറന്നാൾ മലയാളികൾക്ക്​ ഇത്രയും പ്രിയപ്പെട്ടതാകുന്നത്​. ആ നന്മമനസ്സിന്​ ഒപ്പംചേരാൻ എനിക്കും കിട്ടിയിരുന്നു ഒരു അവസരം. 2018 കാലത്തിലാണ്​ ഞാൻ സംവിധാനം ചെയ്​ത ഗാനഗന്ധർവ​െൻറ കഥപറയാൻ മമ്മൂക്കയുടെ അടുത്ത്​ രണ്ടുമൂന്ന്​ പ്രാവശ്യമായി പോകുന്നത്​. സിനിമയുടെ ഒരുക്കങ്ങളെല്ലാം പൂർത്തിയായ നാളുകൾ. എങ്കിലും ഷൂട്ടിങ്​ തുടങ്ങിയിരുന്നില്ല. ആ സമയത്താണ്​ കേരളത്തെ നടുക്കുന്ന മഹാപ്രളയം. അതി​െൻറ കെടുതികൾ എല്ലാം നമ്മൾ കണ്ടതാണ്​, അനുഭവിച്ചതാണ്​. നാടാകെ നിശ്ചലമായ നാളുകൾ. ആ ദിവസങ്ങളൊന്നിൽ മമ്മൂക്ക ഫോണിൽ വിളിച്ചു ചോദിക്കുന്നു - 'ഓണം വീട്ടിൽ തന്നെ ഉണ്ണണം എന്ന്​ നിർബന്ധമുള്ളയാളാണോ താൻ'. 'അല്ല, പ്രോഗ്രാമുകൾക്ക്​ പോകുന്ന കാലത്ത്​ ഓണം പലപ്പോഴും സ്വന്തം വീട്ടിലല്ല ഉണ്ടിരുന്നത്​' -ഞാൻ മറുപടിയും നൽകി. മമ്മൂക്ക വെള്ളപ്പൊക്കത്തി​െൻറ കെടുതികൾ പറഞ്ഞു. ഒപ്പം ആദ്യമായി എന്നോട്​ മമ്മൂക്ക ഒരു കാര്യം ആവശ്യപ്പെട്ടു.

'വെള്ളപ്പൊക്ക ദുരിതം ബാധിച്ചവർ കഴിയുന്ന ക്യാമ്പുകളിൽ ഞാൻ പോകുന്നുണ്ട്​. എല്ലാം നഷ്​ടപ്പെട്ടിരിക്കുന്ന ആളുകളാണ്​. അവിടെ പോയാൽ അവർക്ക്​ എന്നെ കാണാം, എനിക്ക്​ അവരെയും കാണാം. അതിനുമപ്പുറം ഒരു മൈക്ക്​ എടുത്തുവെച്ച്​ രണ്ട്​ ആശ്വാസ വാക്കുകൾ പറയാനേ എന്നെക്കൊണ്ട്​ പറ്റുകയുള്ളൂ. അവർക്ക്​ സന്തോഷം വരുത്തുന്ന, ചിരിവരുത്തുന്ന എന്തെങ്കിലുമൊക്കെ പറയാൻ നിങ്ങളെ പോലുള്ളവർക്കേ പറ്റൂ. അതിനായി ​എ​െൻറയൊപ്പം ആ ക്യാമ്പുകളിൽ വരാൻ കഴിഞ്ഞാൽ നല്ലതായിരിക്കും' -മമ്മൂട്ടിയുടെ വാക്കുകൾ.

മമ്മൂക്കയു​െട തന്നെ വണ്ടിയിൽ അദ്ദേഹത്തിനൊപ്പം ചെങ്ങന്നൂരിലെ രണ്ടു ക്യാമ്പുകളിൽ പോയി. തിരുവോണ ദിവസം പറവൂരിലെ ഒരു ക്യാമ്പിലായിരുന്നു ഊണുകഴിച്ചത്​. ഒരുപാട്​ ദുരിതാശ്വാസ ക്യാമ്പുകളി​ൽ അങ്ങനെ ആ മഹാനട​െൻറ കൂടെ ആശ്വാസവാക്കുകളുമായി പോയി. ആ യാത്രകളിലൂടെയാണ്​ മമ്മൂക്കയുടെ ഒപ്പം നിൽക്കാൻ അവസരം ലഭിച്ചത്​.

കാലം കടന്നുപോയി. വെള്ളപ്പൊക്കത്തി​െൻറ കെടുതികൾ ഒക്കെ പ​തുക്കെ നമ്മൾ മറന്നു. കാലം വീണ്ടും മുന്നോട്ടുകുതിച്ചു. സിനിമകളും ഷൂട്ടിങ്​ സൈറ്റുകളും ഒക്കെയായി സിനിമാ ലോകവും മുന്നോട്ടുപോയി. വീണ്ടുമിതാ​ കോവിഡി​െൻറ വരവ്​. നിശ്ചലമായി ലോകം. ദുരിതത്തി​െൻറ കഥകൾ തന്നെ ചുറ്റിലും നിന്ന്​ കേൾക്കുന്നു. ഇപ്പോഴുമുണ്ട്​ മമ്മൂക്കക്ക്​ ഒപ്പമുള്ള യാത്ര. ആശ്വാസവും ചിരിയും പടർത്തുന്ന വാക്കുകൾ പറഞ്ഞുകൊണ്ട്​. അതുകൊ​​ണ്ടൊക്കെയാണ്​ മമ്മൂക്കയുടെ ജന്മദിനം എല്ലാവർക്കും ഉത്സവമാകുന്നത്​. ഒപ്പം എനിക്കും.