താരപുത്രനൊപ്പം ബോളിവുഡിൽ​ അരങ്ങേറ്റത്തിനൊരുങ്ങി സൽമാൻ ഖാന്‍റെ സഹോദരീപുത്രി

ബോളിവുഡ്​ അരങ്ങേറ്റത്തിനൊരുങ്ങി സൽമാൻ ഖാന്‍റെ സഹോദരി പുത്രി അലിസെ അഗ്നിഹോത്രി. സണ്ണി ഡിയോളിന്‍റെ മകൻ രാജ്​വീർ ഡിയോളിന്‍റെ നായികയായാണ്​ അലിസെയുടെ സിനിമാപ്രവേശം. സിനിമ സംവിധാനം ചെയ്യുന്നത്​, പ്രമുഖ സംവിധായകൻ സൂരജ്​ ബർജാത്യയുടെ മകൻ അവ്​നീഷ്​ ബർജാത്യയാണ്​.

റിപ്പോർട്ടുകൾ ശരിയാണെങ്കിൽ, മൂന്ന്​ പ്രമുഖരുടെ പിന്മുറക്കാർ ബോളിവുഡ്​ അരങ്ങേറ്റം നടത്തുന്ന ചിത്രം, രൺബീർ കപൂർ, ദീപിക പദുകോൺ എന്നിവർ കേന്ദ്ര കഥാപാത്രങ്ങളായ 'യെ ജവാനി ഹേ ദിവാനി' -യിൽ നിന്ന്​ പ്രചോദനമുൾക്കൊണ്ടുള്ളതായിരിക്കും.

സൽമാൻ ഖാന്‍റെ മൂത്ത സഹോദരി, അൽവിറ അഗ്നിഹോത്രിയുടെയും നിർമാതാവായ അതുൽ അഗ്നിഹോത്രിയുടെയും പുത്രിയാണ്​ അലിസെ അഗ്നിഹോത്രി. നേരത്തെ താരം സൽമാൻ ഖാന്‍റെ ദബാങ്​ 3 എന്ന ചിത്രത്തിൽ പ്രധാനവേഷത്തിലെത്തുമെന്ന്​ റിപ്പോർട്ടുണ്ടായിരുന്നു, എന്നാൽ, പിതാവ്​ അതുൽ, അത്​ നിഷേധിച്ചു.