പറഞ്ഞതിനും ഒരു ദിവസം മുമ്പ് പുഷ്പരാജ് എത്തും; 'പുഷ്പ: ദ റൂൾ' ഡിസംബർ അഞ്ചിന്

പ്രേക്ഷകർ ഏറെ ആകാംക്ഷയോടെ കാത്തിരിക്കുന്ന ചിത്രമാണ് അല്ലു അര്‍ജുന്റെ 'പുഷ്പ: ദ റൂള്‍'. സൂപ്പര്‍ ഹിറ്റ് ചിത്രം പുഷ്പ: ദി റൈസിന്റെ രണ്ടാം ഭാഗമായ ചിത്രത്തിന്റെ റിലീസുമായി ബന്ധപ്പെട്ട പുതിയ വിവരമാണ് പുറത്തു വരുന്നത്.നേരത്തേ പറഞ്ഞതിനും ഒരു ദിവസം മുമ്പേ ചിത്രം തിയറ്ററുകളിലെത്തുമെന്നാണ് അണിയറക്കാര്‍ ഇപ്പോള്‍ അറിയിച്ചിരിക്കുന്നത്. ഡിസംബർ അഞ്ചിന് ചിത്രം തിയറ്ററുകളിലെത്തുമെന്നാണ് പുതിയ വിവരം.

രണ്ടാം ഭാഗത്തില്‍ സമാനതകളില്ലാത്ത ദൃശ്യാനുഭവം പ്രേക്ഷകര്‍ക്ക് അനുഭവവേദ്യമാക്കാനായാണ് അല്ലു അര്‍ജുനും സംവിധായകന്‍ സുകുമാറും പദ്ധതിയിടുന്നത്. ആദ്യ ഭാഗത്തെപോലെ രണ്ടാം ഭാഗവും വൻ വിജയമായിരിക്കുമെന്നാണ് അണിയറപ്രവർത്തകരുടെയും ആരാധകരുടെയും പ്രതീക്ഷ.

ചിത്രം ഇതിനകം 1000 കോടി രൂപയുടെ പ്രീ-റിലീസ് ബിസിനസ് നേടിക്കഴിഞ്ഞുവെന്നാണ് ട്രേഡ് അനലിസ്റ്റുകള്‍ പുറത്തുവിട്ടിരിക്കുന്ന റിപ്പോര്‍ട്ട്. ചിത്രത്തിന് ഇപ്പോള്‍ തന്നെ ലഭിച്ചിരിക്കുന്ന വന്‍ ഹൈപ്പ് കൊണ്ടുതന്നെ ആരാധകരുള്‍പ്പെടെയുള്ള പ്രേക്ഷക സമൂഹം ആകാംക്ഷയോടെയാണ് സിനിമയ്ക്കുവേണ്ടി കാത്തിരിക്കുന്നത്. റോക്ക് സ്റ്റാര്‍ ദേവി ശ്രീ പ്രസാദിന്റെ സംഗീതവും അതിശയിപ്പിക്കുന്ന ദൃശ്യങ്ങളും തികച്ചും പുതിയൊരു കാഴ്ച വിപ്ലവം തന്നെ തീര്‍ക്കുമെന്നാണ് ഏവരും കണക്കുകൂട്ടുന്നത്. തിയേറ്ററുകള്‍തോറും ഇതുവരെ കാണാത്ത വിധത്തിലുള്ള ഗംഭീരമായ റിലീസിങ് മാമാങ്കത്തിനാണ് നിര്‍മ്മാതാക്കളായ മൈത്രി മൂവി മേക്കേഴ്‌സും സുകുമാര്‍ റൈറ്റിങ്‌സും പദ്ധതിയിടുന്നത്.