അല്ലിക്ക്​ സിറിയയിൽ പോകണമെന്ന്​; അമ്പരന്ന്​ പൃഥ്വിയും സുപ്രിയയും

നടൻ പൃഥ്വിരാജി​േന്‍റയും മുൻ മാധ്യമപ്രവർത്തക സുപ്രിയ മേനോ​േന്‍റയും മകളായ അലംകൃത ആരാധകർക്ക്​ പ്രിയപ്പെട്ട അല്ലിയാണ്​. അല്ലിയുടെ വിശേഷങ്ങൾ പൃഥ്വിയും സുപ്രിയയും മിക്കപ്പോഴും സമൂഹമാധ്യമങ്ങളിൽ പങ്കുവയ്​ക്കുകയും ചെയ്യും. കഴിഞ്ഞ ദിവസം സുപ്രിയ ഇൻസ്റ്റഗ്രാമിൽ പങ്കുവച്ച പോസ്റ്റിൽ അല്ലിയുടെ വിചിത്രമായൊരു ആഗ്രഹ​െത്തകുറിച്ചാണ്​ എഴുതിയിരിക്കുന്നത്​. ഭക്ഷണം കഴിച്ചുകൊണ്ടിരുന്നപ്പോഴാണ്​ വളരെ ഗൗരവത്തിൽ അല്ലി ആ ആഗ്രഹം പ്രകടിപ്പിച്ചതെന്ന്​ സുപ്രിയ പറയുന്നു.

അടുത്ത ഒഴിവുകാലത്ത്​ എവിടെ പോകണമെന്ന വർത്തമാനങ്ങൾക്കിടയിൽ സിറിയയിൽ പോകണമെന്നാണ്​ അല്ലി പറഞ്ഞത്​. മകളുടെ ആഗ്രഹമറിഞ്ഞ്​ അന്തംവിട്ട പൃഥ്വിക്കും സ​​ുപ്രിയക്കും എന്തിനാണ്​ സിറിയയിൽ പോകുന്നതെന്നും അല്ലി വിവരിച്ചുകൊടുത്തു. യുസ്​റ മാർദീനിയെ കാണാനാണത്രെ അല്ലി സിറിയയിൽ പോകുന്നത്​. അതോടെ ആരാണീ യുസ്​റ മാർദീനിയെന്നായി സംശയം. തുടർന്നാണ്​ അത്​ സിറിയയിൽ നിന്നുള്ള നീന്തൽ താരമാണെന്ന്​ അല്ലി പറയുന്നത്​.

View this post on Instagram

A post shared by Supriya Menon Prithviraj (@supriyamenonprithviraj)

അല്ലി വായിക്കുന്ന 'റിബൽ ഗേൾസ്' എന്ന സ്​റ്റോറി ബുക്കിൽ നിന്നാണ്​ യുസ്​റയെപറ്റിയുള്ള വിവരം അവൾക്ക്​ ലഭിച്ചതെന്നും സുപ്രിയ പറയുന്നു. കുറേക്കാലമായി അല്ലിയുടെ പ്രിയ പുസ്​തകമാണ്​ 'റിബൽ ഗേൾസ്'​. ​തുടർന്ന്​ യുസ്​റക്ക്​ സുപ്രിയ മകളുടെ ആഗ്രഹം പറഞ്ഞ്​ മെസ്സേജ്​ അയക്കുകയും അവർ അതിന്​ മറുപടി നൽകുകയും ചെയ്​തിട്ടുണ്ട്​. ഇതിന്‍റെ സ്​ക്രീൻ ഷോട്ടുകളും സുപ്രിയ പങ്കുവച്ചിട്ടുണ്ട്​.

View this post on Instagram

A post shared by Supriya Menon Prithviraj (@supriyamenonprithviraj)

യുസ്​റ മാർദീനി

സിറിയയിൽ ജനിച്ചുവളർന്ന യുസ്​റ, കുട്ടിക്കാലം മുതൽ ഒരു നീന്തൽ താരമായിരുന്നു. ഡമാസ്‌കസിന്‍റെ പ്രാന്തപ്രദേശമായ ദാരയ്യയിൽ വളർന്ന മാർദിനി സിറിയൻ ഒളിമ്പിക് കമ്മിറ്റിയുടെ പിന്തുണയോടെ നീന്തൽ പരിശീലനം നേടി. 2012 ൽ ഫിന വേൾഡ് നീന്തൽ ചാമ്പ്യൻഷിപ്പിൽ (25 മീറ്റർ) 200 മീറ്റർ വ്യക്തിഗത മെഡ്‌ലി, 200 മീറ്റർ ഫ്രീസ്റ്റൈൽ, 400 മീറ്റർ ഫ്രീസ്റ്റൈൽ മത്സരങ്ങളിൽ സിറിയയെ പ്രതിനിധീകരിച്ചു. ഇതിനിടെ സിറിയൻ ആഭ്യന്തര യുദ്ധത്തിൽ അവളുടെ വീട്​ തകർന്നു. മാർദിനിയും സഹോദരി സാറയും 2015 ഓഗസ്റ്റിൽ സിറിയയിൽ നിന്ന് പലായനം ചെയ്​ത്​ ലെബനോനിലേക്കും തുടർന്ന് തുർക്കിയിലും എത്തി. അവിടെ നിന്ന്​ 18 കുടിയേറ്റക്കാരുമായി ബോട്ടിൽ ഗ്രീസിലേക്ക് കടക്കാൻ അവർ തീരുമാനിച്ചു.

ആറ്​ അല്ലെങ്കിൽ ഏഴിൽ കൂടുതൽ ആളുകൾ കയറാൻ പറ്റാത്ത ബോട്ട്​ വഴിയിൽവെച്ച്​ തകരാറിലായി. തുടർന്ന്​ യുസ്രയും സഹോദരി സാറയും നീന്താൻ കഴിവുള്ള മറ്റ് രണ്ട് പേരും കടലിൽ ചാടി 3 മണിക്കൂറിലധികം നീന്തുകയായിരുന്നു. എഞ്ചിൻ വീണ്ടും പ്രവർത്തിക്കാൻ തുടങ്ങിയതിനെ തുടർന്ന്​ അവർ ഗ്രീസിലെ ലെസ്ബോസിലെത്തി. തുടർന്ന് അവർ യൂറോപ്പിലൂടെ ജർമനിയിലേക്ക് പോയി. അവിടെ അവർ ബെർലിനിൽ താമസമാക്കി. പിന്നീട്​ യുസ്​റയുടെ മാതാപിതാക്കളും അനുജത്തിയും സിറിയയിൽ നിന്ന് ജർമനിയിൽ എത്തുകയായിരുന്നു. നിലവിൽ ജർമനിയിലെ ഹാംബർഗിൽ താമസിക്കുന്ന 22കാരിയായ യുസ്​റ റിയോ ഡി ജനീറോയിൽ നടന്ന 2016 ലെ സമ്മർ ഒളിമ്പിക്സിൽ അഭയാർത്ഥി ഒളിമ്പിക് ടീമിലെ അംഗമായിരുന്നു. 2017 ഏപ്രിൽ 27ന് മർദിനിയെ യുഎൻ‌എച്ച്‌സി‌ആർ ഗുഡ്‌വിൽ അംബാസഡറായി നിയമിച്ചു.