ഫലസ്തീന്‍ ജനതയുടെ ദുരിതങ്ങള്‍ പകർത്തിയ 'നോ അദര്‍ ലാന്‍ഡി'ന് ഓസ്‌കര്‍

ഫലസ്തീന്‍ ജനതയുടെ ദുരിതങ്ങള്‍ പകര്‍ത്തിയ ഡോക്യുമെന്ററിക്ക് ഓസ്‌കര്‍. 97-ാമത് ഓസ്‌കർ പുരസ്‌കാര ചടങ്ങില്‍ മികച്ച ഡോക്യുമെന്ററി- ഫീച്ചര്‍ വിഭാഗത്തില്‍ ഫലസ്തീന്‍ ചെറുത്തുനില്‍പ്പിനെ പ്രതിപാദിക്കുന്ന ചിത്രം 'നോ അദര്‍ ലാന്‍ഡ്' പുരസ്‌കാരം നേടി.

പോർസലൈൻ വാർ, ഷുഗർകെയ്ൻ, ബ്ലാക് ബോക്സ് ഡയറീസ്, സൗണ്ട് ട്രാക് ടു എ കപ് ഡി ഇറ്റാറ്റ് എന്നീ സിനിമകളെയാണ് സിനിമ മറികടന്നത്. തന്റെ ജന്മ പ്രദേശം ഇസ്രായേൽ പൊളിച്ചു മാറ്റു​​മ്പോൾ അതിനെതിരെ മുന്നിട്ടിറങ്ങുന്ന ആക്ടിവിസ്റ്റ് ബാസൽ അദ്റയുടെ ജീവിതവുമായി കെട്ടു പിണഞ്ഞു കിടക്കുന്നതാണ് സിനിമ. 2019 നും 2023 നും ഇടയിൽ ചിത്രീകരിച്ച ഈ ഡോക്യുമെന്ററിക്ക് ഓസ്കർ വേദിയിൽ മികച്ച പ്രതികരണമായിരുന്നു ലഭിച്ചത്.

ഇസ്രായേലി-ഫലസ്തീൻ ചലച്ചിത്ര പ്രവർത്തകരുടെ സഹകരണത്തിലാണ് ഡോക്യുമെന്ററി പുറത്തിറക്കിയത്. ജൂത-ഇസ്രാഈലി പത്രപ്രവര്‍ത്തകനായ യുവാല്‍ എബ്രഹാമുമായി സൗഹൃദത്തിലാകുന്നതോടെ അദ്റയുടെ പോരാട്ടവും മസാഫര്‍ യാത്തക്കാരുടെ ദുരിതവും ലോകമറിയുന്നു.

'ഫലസ്തീനികള്‍ക്കെതിരായ അതിക്രമങ്ങളും വംശീയ ഉന്മൂലനവും തടയാന്‍ ലോകത്തിന്റെ ഇടപെടലുണ്ടാകണം'-പുരസ്‌കാരം സ്വീകരിച്ചുകൊണ്ട് സംവിധായകൻ ബാസല്‍ അദ്ര പറഞ്ഞു. ബാസല്‍ അദ്ര, ഹംദാന്‍ ബല്ലാല്‍, യുവാല്‍ എബ്രഹാം, റേച്ചല്‍ സോര്‍ എന്നിവരാണ് ചിത്രത്തിന്റെ പ്രധാന അണിയറ പ്രവര്‍ത്തകര്‍.

ഇതാദ്യമായല്ല നോ അദര്‍ ലാന്‍ഡ് അന്താരാഷ്ട്രവേദികളില്‍ തിളങ്ങുന്നത്. 2024-ലെ ബെര്‍ലിന്‍ അന്താരാഷ്ട്ര ചലച്ചിത്രമേളയില്‍ മികച്ച പ്രേക്ഷക പിന്തുണയുള്ള ചിത്രമായും മികച്ച ഡോക്യുമെന്ററി ചിത്രമായും തെരഞ്ഞെടുത്തിരുന്നു. ബെസ്റ്റ് നോണ്‍ ഫിക്ഷന്‍ വിഭാഗത്തില്‍ ന്യൂയോര്‍ക്ക് ഫിലിം ക്രിട്ടിക്‌സ് സര്‍ക്കിള്‍ പുരസ്‌കാരവും ചിത്രത്തിന് ലഭിച്ചിട്ടുണ്ട്.