'വൈകിപ്പിക്കണം'; മാസ്റ്ററി​െൻറ നേരത്തെയുള്ള ഒടിടി റിലീസിൽ നിരാശ രേഖപ്പെടുത്തി തിയറ്ററുടമകൾ

ജനുവരി 14ന്​ തിയറ്റുകളിലെത്തിയ വിജയ്​ - ലോകേഷ്​ കനകരാജ്​ ചിത്രം മാസ്​റ്റർ ജനുവരി 29 വെള്ളിയാഴ്​ച്ച​ ആമസോൺ പ്രൈമിൽ റിലീസ്​ ചെയ്യാനിരിക്കെ തിയറ്റർ അസോസിയേഷനും തമിഴ്​നാട്ടിലെ ഡിസ്​ട്രിബ്യൂട്ടർമാരും നിരാശ രേഖപ്പെടുത്തി രംഗത്തെത്തി​. ഒടിടി പ്ലാറ്റ്​ഫോമിലൂടെ ചിത്രം റിലീസ്​ ചെയ്യുന്നത്​ വൈകിപ്പിക്കണമെന്നും അവർ ആവശ്യപ്പെട്ടു. കഴിഞ്ഞ ബുധനാഴ്​ച്ചയായിരുന്നു അണിയറപ്രവർത്തകർ ചിത്രത്തി​െൻറ ഒാൺലൈൻ റിലീസ്​ പ്രഖ്യാപിച്ചത്​.

ഒടിടി പ്ലാറ്റ്‌ഫോമുകളിൽ റിലീസ് ചെയ്യുന്നത് സംബന്ധിച്ച് സിനിമയുടെ നിർമാതാവുമായി ചർച്ചയിലാണെന്ന്​ തമിഴ്‌നാട് തിയറ്റർ ആൻഡ്​ മൾട്ടിപ്ലക്‌സ് ഒാണേഴ്​സ്​ അസോസിയേഷൻ പ്രസിഡൻറ് എം സുബ്രഹ്മണ്യം പറഞ്ഞു. റിലീസ് വൈകിപ്പിക്കാൻ ഞങ്ങൾ അദ്ദേഹത്തോട് അഭ്യർത്ഥിച്ചു. സിനിമ തിയേറ്ററുകളിൽ റിലീസ് ചെയ്ത് 10 ദിവസമേ ആയിട്ടുള്ളൂ, ഇപ്പോൾ പ്രദർശനം തുടരുന്നു​മുണ്ട്​. " -അദ്ദേഹം പറഞ്ഞു. ചിത്രം റിലീസ്​ ചെയ്​ത ആദ്യ രണ്ട്​ വാരങ്ങളിലെ ആകെ കളക്ഷനിൽ നിന്ന്​ 10 ശതമാനം അധിക വിഹിതം നൽകാനും തിയറ്ററുടമകൾ നിർമാതാവിനോട്​ ആവശ്യപ്പെട്ടതായി അടുത്ത വൃത്തങ്ങൾ അറിയിച്ചിട്ടുണ്ട്​. കുറഞ്ഞ സീറ്റുകളിൽ മാത്രം പ്രദർശനം നടത്തിയിട്ടും തമിഴ്​നാട്ടിൽ മാസ്റ്റർ ആദ്യ രണ്ട്​ ആഴ്​ച്ചകളിൽ ഗംഭീര പ്രകടനമാണ്​ നടത്തിയത്​.