തിയറ്ററുകൾ ഭരിക്കാൻ ചോളൻമാർ വീണ്ടും; ‘പൊന്നിയിൻ സെൽവൻ - 2’ ട്രെയിലർ എത്തി

500 കോടിയിലേറെ കളക്ഷൻ നേടി തമിഴിലെ ഏറ്റവും വലിയ വിജയങ്ങളിലൊന്നായ ചിത്രമാണ് പൊന്നിയിൻ സെൽവൻ. മണിരത്നത്തിന്റെ കരിയറിലെ ഏറ്റവും വലിയ സാമ്പത്തിക വിജയമായ ചിത്രത്തിന്റെ രണ്ടാം ഭാഗം റിലീസിനൊരുങ്ങുകയാണ്. റിലീസിന് മുന്നോടിയായി പൊന്നിയിൻ സെൽവൻ പാർട്ട് രണ്ടിന്റെ ​ട്രെയിലർ അണിയറ പ്രവർത്തകർ പുറത്തുവിട്ടു. മൂന്ന് മിനിറ്റിലേറെയുള്ള ട്രെയിലർ വലിയ തരംഗമായി മാറിയിരിക്കുകയാണ്.

ഐശ്വര്യ റായ് അടക്കം ചിത്രത്തിലെ പ്രധാന താരങ്ങളെല്ലാം ട്രെയിലറിൽ കടന്നുവരുന്നുണ്ട്. വിക്രം, കാർത്തി, ജയം രവി, തൃഷ എന്നിവർ കേന്ദ്ര കഥാപ​ാത്രങ്ങളാകുന്ന ചിത്രത്തിൽ പ്രകാശ് രാജ്, ശരത് കുമാർ, പാർഥിപൻ, ശോഭിക ധുലിപാല, ​പ്രഭു, മലയാളികളുടെ പ്രിയ താരങ്ങളായ ജയറാം, ഐശ്വര്യ ലക്ഷ്മി, റഹ്മാൻ റിയാസ് ഖാൻ, ബാബു ആന്റണി എന്നിവരും പല വേഷങ്ങളിലായി എത്തുന്നുണ്ട്.

ഏപ്രിൽ 28-ന് ലോകമെമ്പാടുമായി ചിത്രം റിലീസ് ചെയ്യും. സാഹിത്യകാരൻ കൽക്കി കൃഷ്ണമൂർത്തിയുടെ പ്രശസ്തമായ ചരിത്ര നോവലിനെ ആധാരമാക്കിയാണ് മണിരത്‌നം 'പൊന്നിയിൻ സെൽവൻ' ഒരുക്കിയിരിക്കുന്നത്. എ.ആർ റഹ്മാനാണ് ചിത്രത്തിന് വേണ്ടി സംഗീത സംവിധാനം നിർവഹിച്ചിരിക്കുന്നത്. രവി വർമ്മൻ ഛായാഗ്രഹണവും തോട്ടാ ധരണി കലാ സംവിധാനവും നിർവഹിച്ചിരിക്കുന്നു.