'എ​ന്‍റെ കഥയിൽ ഡ്യൂപ്പില്ല' -പ്രഭുലാൽ പ്രസന്നൻ സിനിമയിലേക്ക്​

'എന്‍റെ കഥയിൽ ഡ്യൂപ്പില്ല. എല്ലാ സീനിലും ഞാൻ തന്നെ അഭിനയിച്ചേ പറ്റു' -മുഖത്തിന്‍റെ പകുതിയോളം പടർന്നുകയറിയ മറുകിലൂടെ സമൂഹ മാധ്യമങ്ങളിൽ ശ്രദ്ധേയനായ ആലപ്പുഴ ഹരിപ്പാട്​ സ്വദേശി പ്രഭുലാൽ പ്രസന്നൻ ഒരിക്കൽ ​​ഫേസ്​ബുക്കിൽ കുറിച്ചതാണിത്​. യഥാർഥ ജീവിതത്തിലെ സീനുകളാണ്​ അന്ന്​ പ്രഭുലാൽ ഉദ്ദേശിച്ചതെങ്കിലും ഇ​പ്പോൾ സിനിമയിലെ സീനുകളിലും അഭിനയിക്കാനൊരുങ്ങുകയാണ്​ ഈ യുവാവ്​.

നവരംഗബാവ പ്രൊഡക്ഷൻസിന്‍റെ ബാനറിൽ സിക്കന്ദർ ദുൽഖർനൈൻ സംവിധാനം ചെയ്യുന്ന ചിത്രത്തിൽ ആണ്​ പ്രഭുലാൽ അഭിനയിക്കുന്നത്​. പ്രഭുലാൽ തന്നെയാണ്​ ഇക്കാര്യം ഫേസ്​ബുക്കിലൂടെ സുഹൃത്തുക്കളുമായി പങ്കുവെച്ചത്​. അനുഗ്രഹീതരായ ഒരുപാട്​ കലാകാരന്മാർ അണിനിരക്കുന്ന സിനിമയാണെന്നും എല്ലാവരുടെയും പ്രാർഥനയും പിന്തുണയും വേണമെന്നും പ്രഭുലാൽ കുറിച്ചു.

പ്രഭുലാലിന്‍റെ മുഖത്ത്​ ജന്മനാ ഉള്ളതാണ്​ ഈ മറുക്​. വളർന്നപ്പോൾ ആ മറുകും വലുതായി മുഖത്തിന്‍റെ പാതിയോളം പടർന്നു. ഇത്​ നൽകിയ പരിഹാസവും അവഗണനയും സഹതാപവുമെല്ലാം അഭിമുഖീകരിച്ചതും അതിജീവിച്ചതുമെല്ലാം വിവരിച്ചാണ്​ പ്രഭുലാൽ സമൂഹമാധ്യമങ്ങളിൽ ശ്രദ്ധേയനായത്​. ജീവിതത്തിൽ തളർന്നുപോയ പലർക്കും ഈ അനുഭവങ്ങൾ പ്രചോദനമായിരുന്നു.