ബോക്സോഫീസിൽ അല്ലു അർജുന്റെ കുതിപ്പ് തുടരുന്നു; 1300 കോടിയുമായി പുഷ്പ 2

റെക്കോർഡുകൾ ഭേദിച്ച് പുഷ്പ 2 തിയറ്ററുകളിൽ ജൈത്രയാത്ര തുടരുകയാണ്. ഡിസംബർ അഞ്ചിന് തിയറ്ററുകളിലെത്തിയ ചിത്രം ഇതിനോടകം 1300 കോടിയാണ് ആഗോളതലത്തിൽ നേടിയിരിക്കുന്നത്.11 ദിവസംകൊണ്ടാണ് ഈ നേട്ടം കൈവരിച്ചിരിക്കുന്നത്. ആഗോളതലത്തിൽ ഏറ്റവും കൂടുതൽ കളക്ഷൻ നേടുന്ന മൂന്നാമത്തെ ഇന്ത്യൻ സിനിമയായിരിക്കുകയാണ് പുഷ്പ 2. 900.5 കോടി രൂപയാണ് ചിത്രം ഇന്ത്യയിൽ നിന്ന് നേടിയിരിക്കുന്നത്.

സുകുമാര്‍ സംവിധാനം ചെയ്തിരിക്കുന്ന പുഷ്പയുടെ തെലുങ്ക് പതിപ്പിനേക്കാള്‍ കൂടുതല്‍ കളക്ഷന്‍ നേടുന്നത് ഹിന്ദി പതിപ്പാണ്.553.1 കോടി രൂപയാണ് ഹിന്ദി പതിപ്പിന്റെ 11 ദിവസത്തെ കളക്ഷൻ.ശനി, ഞായർ ദിവസങ്ങളിലായി ഇന്ത്യയിൽ നിന്ന് 138.3 കോടി രൂപയായിരുന്നു ചിത്രം സമാഹരിച്ചത്.

പുഷ്പ ആദ്യഭാഗം ആഗോളതലത്തില്‍ 350 കോടിയോളം രൂപയായിരുന്നു നേടിയിരുന്നത്. ഈ തുക രണ്ട് ദിവസം കൊണ്ട് പുഷ്പ 2 മറികടന്നിരുന്നു. ആദ്യദിനത്തില്‍ മാത്രം സിനിമ ആഗോളതലത്തില്‍ 294 കോടിയായിരുന്നു നേടിയത്. ഇതും റെക്കോര്‍ഡായിരുന്നു.

തെലുങ്ക്, തമിഴ്, മലയാളം, ഹിന്ദി, കന്നഡ, ഭാഷകളിലാണ് ചിത്രം പ്രദർശനത്തിനെത്തിയത്. ഇ ഫോർ എന്‍റർടെയ്ൻമെന്‍റ്സാണ് പുഷ്പ 2 കേരളത്തിലെത്തിച്ചത്. അല്ലു അര്‍ജുനും രശ്മിക മന്ദാനയും കേന്ദ്ര കഥാപാത്രങ്ങളെ അവതരിപ്പിച്ച ചിത്രത്തില്‍ സുനില്‍, ഫഹദ് ഫാസിൽ, അനസൂയ ഭരദ്വാജ് എന്നിവരാണ് മറ്റുകഥാപാത്രങ്ങളായി എത്തിയത്. മൈത്രി മൂവി മേക്കേഴ്‌സാണ് ചിത്രം നിര്‍മിച്ചിരിക്കുന്നത്.