ടൊവിനോയുടെ 'വഴക്ക്' ഫേസ്ബുക്കിൽ കാണാം; പ്രേക്ഷകര്‍ക്ക് കാണാനുള്ളതാണ് സിനിമയെന്ന് സംവിധായകൻ

നടൻ ടൊവിനോ തോമസുമായിട്ടുള്ള തർക്കം നിലനിൽക്കെ വഴക്ക് സിനിമ സോഷ്യൽ മീഡിയയിൽ പങ്കുവെച്ച് സംവിധായകൻ സനൽകുമാർ ശശിധരൻ. ചിത്രന്റെ പ്രിവ്യൂ കോപ്പിയുടെ ലിങ്ക് ആണ് സനല്‍കുമാര്‍ പങ്കുവച്ചിരിക്കുന്നത്. സൗജന്യമായി കാണാവുന്ന വിധത്തിലാണ് ഷെയർ ചെയ്തിരിക്കുന്നത്.

'പ്രേക്ഷകര്‍ക്ക് കാണാനുള്ളതാണ് സിനിമ. വഴക്ക്/ The Quarrel കാണണമെന്നുള്ളവര്‍ക്ക് കാണാം. എന്തുകൊണ്ട് ഇത് പുറത്തുവരുന്നില്ല എന്ന് മനസിലാക്കുന്നവര്‍ക്ക് മനസിലാക്കാം'- എന്ന് കുറിച്ചുകൊണ്ടാണ് ലിങ്ക് ഷെയർ ചെയ്തിരിക്കുന്നത്.

കഴിഞ്ഞ കുറച്ചുദിവസങ്ങളായി വഴക്ക് സിനിമയുമായി ബന്ധപ്പെട്ട് സനൽകുമാർ ശശിധരനും ടൊവിനോയും തമ്മിൽ പ്രശ്നങ്ങൾ നടക്കുകയാണ്. പ്രധാന കഥാപാത്രമായും നിർമാണ പങ്കാളിയുമായി എത്തിയ ചിത്രം പുറത്തിറക്കാൻ ടൊവിനോ ശ്രമിക്കുന്നില്ലെന്നും പരാജയ ഭീതിയാണ് ഇതിന് പിന്നിലെന്നും സനൽകുമാർ ആരോപിച്ചു. കൂടാതെ നടനെതിരെ ആരോപണങ്ങളും ഉന്നയിച്ചിരുന്നു.

വൈകാതെ സനൽകുമാറിന്റെ ആരോപണങ്ങൾക്ക് മറുപടിയുമായി ടൊവിനോ എത്തിയിരുന്നു.വഴക്ക് വളരെ നല്ല ചിത്രമാണെന്നും താൻ ചെയ്ത ഒരു സിനിമയെയും മോശമായി കാണുന്ന ആളല്ലെന്നും ടൊവിനോ ഇൻസ്റ്റഗ്രാം ലൈവിൽ പറഞ്ഞു. സിനിമയുടെ റിലീസുമായി ബന്ധപ്പെട്ട് തങ്ങൾ തമ്മിൽ സംസാരിച്ചതിന്റെ ഓഡിയോ ക്ലിപ് കൈയിലുണ്ടെന്നും കൂട്ടിച്ചേർത്തു.

2022-ൽ നിർമാണം പൂർത്തിയായ സിനിമയാണ് ‘വഴക്ക്’. കനി, സുദേവ് നായർ എന്നിവരാണ് മറ്റു പ്രധാന താരങ്ങൾ. ചിത്രത്തിലെ അഭിനയത്തിന് മികച്ച ബാലനടിക്കുള്ള സംസ്ഥാന പുരസ്കാരം തന്മയയ്‌ക്ക് ലഭിച്ചിരുന്നു. പതിനഞ്ച് ദിവസം കൊണ്ടാണ് ചിത്രം പൂർത്തിയാക്കിയത്.