മരുത് മുത്തു ക്ഷണിക്കുന്നു-'സില്മെക്ക് എല്ലാവര്ത് മ് അനുഗ്രഹമ് ആശിർവാദമ് ഒപ്പ ഒത്തിമെമ് വേണ്ട്റെ...'

അട്ടപ്പാടിയുടെ ജീവിതം പറയുന്ന 'സിഗ്നേച്ചർ' എന്ന സിനിമയുടെ പൂജയുടെ ക്ഷണക്കത്ത്​ വ്യത്യസ്​തമാകുന്നു. ഒക്ടോബർ 15നാണ്​ സിനിമയുടെ പൂജ. ചിത്രീകരണവും അന്നുതന്നെ തുടങ്ങും. നായക കഥാപാത്രമായ മരുത്​ മുത്തു ആദിവാസി ഭാഷയിൽ എല്ലാവരെയും ക്ഷണിക്കുന്ന രീതിയിലാണ്​ ക്ഷണക്കത്ത്​ തയാറാക്കിയിരിക്കുന്നത്​.

'അട്ടെഫെടി ദേശത്തിലെ ജീവിതണ ഫത്തിന 'സിഗ്നേച്ചർ' എന്ത പേരില സില്മെത് പൂജെ കർമ്മം ഒക്ടോബർ മാസ 15ക്ക് വെടിയാലെ 8.30 മണിക്ക് അട്ടെഫെടി ഫായ്കുളത്തിര്ക്ക സെന്‍റ്​ ജോസഫ് ഭവനിലിവെത്ത് നടക്ക് ത്. മനോജ് പാലോടൻ സംവിധാനം സെയ്റ ഫാദർ ബാബു തട്ടിൽ സി.എം.ഐ ത് കഥെലി ഉരുവാന സാൻജോസ് ക്രിയേഷൻസ്ത് ബാനറിലി സില്മെക്ക് എല്ലാവര്ത് മ് അനുഗ്രഹമ് ആശിർവാദമ് ഒപ്പ ഒത്തിമെമ് വേണ്ട്റെ...' (മരുത് മുത്തു, ആനക്കട്ടി) എന്നാണ്​ കത്ത്​.

വിശിഷ്ടാതിഥികളായി ഫാദർ സാജു ചക്കാലക്കൽ സി.എം.ഐ, ഏബൽ ഫോർച്യൂൺ ഗ്രൂപ്പ്‌ ചെയർമാൻ ഐസക് വർഗീസ് എന്നിവർ പങ്കെടുക്കും. സിനിമയുടെ പൂജക്കൊപ്പം നിർമാതാക്കൾ കട്ടേക്കാട് ഊരിലെ കുട്ടികൾക്ക്​ സ്നേഹ സമ്മാനമായി നൽകുന്ന പഠന കേന്ദ്രത്തിന്‍റെ നിർമാണ ഉദ്ഘാടനവും നടക്കും. 'ഇതു താൻ ഡാ പൊലീസ്' എന്ന ചിത്രത്തിനു ശേഷം മനോജ് പാലോടൻ സംവിധാനം ചെയ്യുന്ന സിനിമയാണ്​ 'സിഗ്നേച്ചർ'. സാൻജോസ് ക്രിയേഷൻസിന്‍റെ ബാനറിൽ ലിബിൻ പോൾ അക്കര, അരുൺ വർഗീസ് തട്ടിൽ, ജസ്സി ജോർജ് എന്നിവരാണ്​ നിർമാണം. തിരക്കഥ, സംഭാഷണം സി.എം.ഐ വൈദികനായ ഫാ. ബാബു തട്ടിൽ എഴുതുന്നു.

അട്ടപ്പാടിയിലെ ആദിവാസികൾ അനുഭവിക്കുന്ന ചൂഷണങ്ങളും അവക്കെതിരെയുള്ള പോരാട്ടവുമാണ് ചിത്രത്തിന്‍റെ ഇതിവൃത്തം. ആക്ഷനും പ്രതികാരത്തിനും പ്രാധാന്യം നൽകി ഒരുക്കുന്ന ഈ ത്രില്ലർ ചിത്രത്തിൽ പുതുമുഖങ്ങൾക്കൊപ്പം മലയാളത്തിലെ പ്രമുഖ താരങ്ങളും അഭിനയിക്കുന്നു.

ഛായാഗ്രഹണം- എസ് ലോവൽ, പ്രൊജക്റ്റ്‌ ഡിസൈനർ-നോബിൾ ജേക്കബ്, ക്രീയേറ്റീവ് ഡയറക്ടർ-നിസാർ മുഹമ്മദ്‌, എഡിറ്റിങ്​- സിയാൻ ശ്രീകാന്ത്, മേക്കപ്പ്-പ്രദീപ് രംഗൻ, ആർട്ട്‌ ഡയറക്ടർ-അജി അമ്പലത്തറ, കോസ്റ്റ്യൂം ഡിസൈനർ-സുജിത് മട്ടന്നൂർ, ഡിസൈനിങ്​- ആന്റണി സ്റ്റീഫൻ, വാർത്ത പ്രചരണം-എ എസ് ദിനേശ്.