മാലിക് 'മികച്ച സിനിമ'; പരിഹാസവുമായി ടി. സിദ്ദിഖ്

കോഴിക്കോട്: മാലിക് സിനിമയെ ട്രോളി ടി.സിദ്ദിഖ് എം.എൽ.എ. ഫേസ്ബുക്കിലിട്ട കുറിപ്പിലാണ് സിദ്ദിഖിന്‍റെ പരിഹാസം. കുറിപ്പിനൊപ്പം ഒരാൾ ചുമരിൽ വെള്ളപൂശുന്ന ഫോട്ടോയും പങ്കുവെച്ചിട്ടുണ്ട്. മാലിക്‌ ഷൂട്ടിങ് ലൊക്കേഷനിൽ നിന്നുള്ള ചിത്രം എന്ന് പറഞ്ഞാണ് ഫോട്ടോ പങ്കുവെച്ചത്.

മഹേഷ് നാരായണൻ സംവിധാനം ചെയ്ത ചിത്രം വസ്തുതകൾ വളച്ചൊടിച്ചെന്ന ആക്ഷേപം ശക്തമാകുന്നതിനിടെയാണ് ടി സിദ്ദിഖിന്റെ ഫേസ്ബുക്ക് കുറിപ്പ്. അതിനിടെ മാലിക്​ സിനിമ ചരിത്രത്തെ വ്യഭിചരിച്ചിരിക്കുകയാണെന്ന്​ യൂത്ത്​ കോൺഗ്രസ്​ സംസ്​ഥാന ജനറൽ സെക്രട്ടറി രാഹുൽ മാങ്കൂട്ടത്തിലും അഭിപ്രായപ്പെട്ടു. രാഷ്ട്രീയ അടിമത്തമെന്നത് സംവിധായകൻ മഹേഷ് നാരായണനെ കണ്ടു പഠിക്കേണ്ടതാണെന്നും ഫേസ്​​ബുക്ക്​ പോസ്റ്റിലൂടെ രാഹുൽ വിമർശിച്ചു.