മലയാള സിനിമയിൽ നിന്നും മാറിനിൽക്കാൻ കാരണം അന്ന്​ നേരിട്ട ട്രോളുകൾ; വെളിപ്പെടുത്തലുമായി അനുപമ

മലയാളത്തിലെ ഏറ്റവും വലിയ വിജയ ചിത്രങ്ങളിലൊന്നായ പ്രേമത്തിലൂടെ പ്രശസ്​തയായ നടിയായിരുന്നു അനുപമ പരമേശ്വരൻ. പ്രേമത്തിന്​ ശേഷം ഒരേയൊരു മലയാള ചിത്രത്തിൽ മാത്രമാണ്​ അനുപമ വേഷമിട്ടത്​. തെലുങ്കിലും തമിഴിലും കൈനിറയെ ചിത്രങ്ങളുള്ള താരം മലയാള സിനിമയിൽ നിന്നും വിട്ടുനിൽക്കാനുള്ള കാരണം വ്യക്​തമാക്കിയിരിക്കുകയാണ്​. പ്രേമം റിലീസായതിന്​ ശേഷം സോഷ്യല്‍ മീഡിയയിൽ ഒരുപാട് കളിയാക്കലുകൾ നേരിടേണ്ടി വന്നിട്ടുണ്ടെന്നും അവ നന്നായി വേദനിപ്പിച്ചിരുന്നുവെന്നും അനുപമ പറഞ്ഞു.

സിനിമ ഇറങ്ങിയപ്പോള്‍ കുറഞ്ഞ സ്‌ക്രീന്‍ ടൈം മാത്രമേ ഉള്ളൂ എന്നുപറഞ്ഞ്​ ട്രോളാന്‍ തുടങ്ങി. പ്രമോഷനുകൾക്കായി നൽകിയ അഭിമുഖങ്ങളിൽ പറഞ്ഞ കാര്യങ്ങൾ വളച്ചൊടിച്ച്​, വ്യക്തിപരമായ വളര്‍ച്ചക്ക്​ വേണ്ടി പ്രേമത്തിലൂടെ ലഭിച്ച പബ്ലിസിറ്റി ഉപയോഗിച്ചെന്നാണ്​ ചിലർ ചി​ന്തിച്ചത്​. -​ താരം ടൈംസ്​ ഒാഫ്​ ഇന്ത്യക്ക്​ നൽകിയ ​അഭിമുഖത്തിൽ വെളിപ്പെടുത്തി​.

'പ്രേമം റിലീസായതിന്​ ശേഷം സോഷ്യല്‍ മീഡിയയിൽ ഒരുപാട് കളിയാക്കലുകൾ നേരിടേണ്ടി വന്നിട്ടുണ്ട്. എനിക്ക് ജാഡയാണെന്നും അഹങ്കാരിയാണെന്നും വരെ പറഞ്ഞവരുമുണ്ടായിരുന്നു. പ്രമോഷനുമായി ബന്ധപ്പെട്ട്​ നിരവധിയാളുകൾ അഭിമുഖത്തിനായി സമീപിച്ചിരുന്നു. അതിനോടൊന്നും മടി കാണിച്ചില്ല. തൃശൂരില്‍ നിന്നുള്ള ഒരു സാധാരണക്കാരി പെണ്‍കുട്ടിയായിരുന്നു ഞാനന്ന്​. സിനിമയെക്കുറിച്ചല്ലാത്ത ചോദ്യങ്ങളും നേരിടേണ്ടി വന്നു.

പ്രേമം സിനിമ ഇറങ്ങിയപ്പോള്‍ കുറഞ്ഞ സ്‌ക്രീന്‍ ടൈം മാത്രമേ ഉള്ളൂ എന്നുപറഞ്ഞ്​ ട്രോളാന്‍ തുടങ്ങി. വ്യക്തിപരമായ വളര്‍ച്ചക്ക്​ വേണ്ടി സിനിമയിലെ പബ്ലിസിറ്റി ഉപയോഗിച്ചെന്നാണ്​ പലരും ചിന്തിച്ചത്​. പോളിഷ്ഡ് അല്ലാതെയാണ് ഞാന്‍ അഭിമുഖങ്ങളില്‍ സംസാരിച്ചത്. ട്രോളുകള്‍ നന്നായി വേദനിപ്പിച്ചു. അങ്ങനെയാണ് മലയാളത്തില്‍ നിന്ന് തല്‍ക്കാലം മാറിനില്‍ക്കാമെന്ന് ഞാന്‍ തീരുമാനിച്ചത്​.

മലയാളത്തില്‍ നിന്ന് വന്ന ഒാഫറുകളെല്ലാം തന്നെ നിരസിച്ചു. ആ സമയത്ത്​ തെലുങ്കിലെ ഒരു വമ്പൻ പ്രൊഡക്ഷന്‍ കമ്പനി ഒരു നെഗറ്റിവ് റോളിലേക്കായി വിളിച്ചു. അഭിനയം വശമില്ല, പൊങ്ങച്ചം മാത്രമേ അറിയൂ എന്ന് പറഞ്ഞ് വിമര്‍ശിച്ചവരെ ഓര്‍ത്തപ്പോൾ ഒരു വാശിയോടെ അതേറ്റെടുത്തു. മറ്റു ഭാഷകള്‍ പഠിക്കാനും സിനിമകള്‍ ചെയ്യാനും തീരുമാനിക്കുകയും ചെയ്​തു'. ശേഷം രണ്ട്​ തെലുങ്ക്​ ചിത്രങ്ങളും ഒരു തമിഴ്​ ചിത്രവും ചെയ്​തു. - അനുപമ ടൈംസ്​ ഒാഫ്​ ഇന്ത്യയോട്​ പറഞ്ഞു.

ദുൽഖർ സൽമാൻ നിർമിച്ച്​ ജേക്കബ്​ ഗ്രിഗറി നായകനാകുന്ന 'മണിയറയിലെ അശോകനാണ്​' അനുപമയുടെ ഏറ്റവും പുതിയ മലയാള ചിത്രം. അതിലെ 'മൊഞ്ചത്തിപ്പെണ്ണേ ഉണ്ണിമായേ..' എന്ന ദുൽഖർ ആലപിച്ച ഗാനത്തിലൂടെ അനുപമ വീണ്ടും വൈറലായിരിക്കുകയാണ്​. മണിയറയിലെ അശോകൻ എന്ന ചിത്രത്തിൽ സഹസംവിധായികയായും താരം പ്രവർത്തിച്ചിരുന്നു.