'വീട്ടിൽ ഷർട്ടിടാതെ നടക്കരുത്​'- ഷാരൂഖ്​ ഖാൻ മകൻ ആര്യന്​ കർശന നിർദേശം നൽകിയതിന്‍റെ കാരണം ഇതാണ്​

മുംബൈ: ബോളിവുഡ്​ സൂപ്പർതാരം ഷാരൂഖ്​ ഖാന്‍റെ വീട്ടിൽ മകൻ ആര്യൻ ഖാൻ അനുസരിക്കേണ്ട ഒരു അലിഖിത നിയമം ഉണ്ട്​-'വീട്ടിൽ ഷർട്ട്​ ഇടാതെ നടക്കരുത്​'. അതിന്​ പിന്നിൽ സ്​ത്രീ-പുരുഷ സമത്വത്തിന്‍റെ ഒരു സന്ദേശവുമുണ്ട്​. അത്​ ഇതാണ്​-'ഒരു പെണ്ണിന്​ ചെയ്യാൻ കഴിയാത്തത്​ ആണും ചെയ്യേണ്ട'. തന്‍റെ മകൾക്ക്​ ഇല്ലാത്ത ഒരു പ്രത്യേക ആനുകൂല്യവും ആൺമക്കൾക്കും വേണ്ടയെന്നാണ്​ തന്‍റെ നിലപാടെന്ന്​ ഷാരൂഖ്​ പറയുന്നു.

'വീടിനുള്ളിൽ തന്‍റെ അമ്മയുടെയോ മകളുടെയോ സഹോദരിയുടെയോ പെൺസുഹൃത്തിന്‍റെയോ മുന്നിലൂടെ ഷർട്ടിടാതെ നടക്കുന്നതിന്​ പുരുഷന്​ യാതൊരു അധികാരവുമില്ലെന്ന്​ ഞാൻ വിശ്വസിക്കുന്നു. എല്ലായ്​പോഴും വീടിനുള്ളിൽ ഷാർ​ട്ടോ ടീഷർ​ട്ടോ ധരിച്ച്​ നടക്കണമെന്ന്​ ഞാൻ ആര്യന്​ കർശന നിർദേശം നൽകിയിട്ടുണ്ട്​. സ്​ത്രീ​ ടോപ്​ലെസ്​ ആയി നടക്കരുതെന്ന പൊതുധാരണ പുരുഷനും ബാധകമാണ്​. സ്​ത്രീക്ക്​ ചെയ്യാൻ കഴിയാത്തതൊന്നും പുരുഷനും ചെയ്യേണ്ടതില്ല. നിങ്ങൾക്ക്​ സ്വന്തം അമ്മയോ മകളോ സഹോദരിയോ പെൺസുഹൃത്തോ ടോപ്​ലെസ് ആയി നടക്കുന്നത്​ കാണുന്നത്​ അസുഖകരമായി തോന്നുന്നുവെങ്കിൽ, നിങ്ങൾ ഷർട്ടില്ലാതെ നടക്കുന്നത്​ അവർ സ്വീകരിക്കണമെന്ന്​ പറയുന്നതിലെ ന്യായമെന്താണ്​? എന്‍റെ മകൾക്കില്ലാത്ത ഒരു പ്രത്യേക ആനുകൂല്യവും ആൺമക്കൾക്കും വേണ്ടയെന്നാണ്​ എന്‍റെ നിലപാട്​' -​ ​​'ഫെമിന' മാസികക്ക്​ നൽകിയ അഭിമുഖത്തിൽ ഷാരൂഖ്​ പറയുന്നു. ​