സാന്ത്വനഗീതമായ്​ 'അവനി വാഴ്​വ്​ കിനാവ്​'; കൂട്ടായ്​മയിൽ ഒരു ഗാനം പിറന്ന കഥ

ഗാനമെ​​​ഴുതിയയാൾ ഒരിടത്ത്​, ഈണമിട്ടയാൾ മറ്റൊരിടത്ത്​, ആശയം പകർന്നുകൊടുത്തയാൾ വേറൊരിടത്ത്​. കോവിഡിനെ ചെറുക്കാൻ ശരീരം കൊണ്ട്​ അകന്നിരിക്കുന്നവർ മനസ്സ്​ കൊണ്ടടുത്ത്​ ലോകം മുഴുവൻ സുഖം പ്രാപിക്കാനുള്ള പ്രാർഥനാഗീതമൊരുക്കിയ കഥയാണ്​ സംഗീതജ്​ഞൻ സ്റ്റീഫൻ ദേവസി ഈണം പകർന്ന 'അവനി വാഴ്വ്​ കിനാവ്​' എന്ന സംഗീത വീഡിയോ പറയുന്നത്​. 'ആനന്ദമേ, ഈ ലോകമേ, വായ്​മൂടി നീയും മൗനം...' എന്നുതുടങ്ങുന്ന ഗാനം ജീവിതത്തിലെ ഏത്​ കഠിനമായ പ്രശ്​നത്തിനും പരിഹാരമുണ്ടെന്ന സന്ദേശമാണ്​ നൽകുന്നത്​.

സിനിമ നിർമ്മാതാവും വ്യവസായിയുമായ ജോളി ജോസഫിന്‍റെ മനസ്സലുദിച്ച ആശയമാണ്​ ഇപ്പോൾ വളരെ പോസിറ്റീവ്​ എനർജി നൽകുന്ന, നന്മയുടെ സംഗീതമായി പുറ​ത്തെത്തിയിരിക്കുന്നത്​. ഈ ആശയത്തിന്​ ചുവടുപിടിച്ച്​ അജീഷ്​ ദാസൻ വരികളെഴുതി. അതിന്​ സ്റ്റീഫൻ ദേവസ്സി ഒരുക്കിയ അഞ്ചാറ്​ കോമ്പോസിഷൻസിൽ ഒരെണ്ണം തെരഞ്ഞെടുക്കുകയായിരുന്നു. ഹരിചരൺ ആണ്​ ഗാനം ആലപിച്ചിരിക്കുന്നത്​. സ്റ്റീഫന്‍ ദേവസ്സിയും നടൻ കൈലാഷും സംഗീത സംവിധായകൻ ബിജിബാലും ആണ് ഗാനരംഗങ്ങളിൽ പ്രത്യക്ഷപ്പെടുന്നത്.

'ഏകദേശം ഒന്നര വർഷമായി കോവിഡ് ക്വാറന്‍റീൻ രംഗത്ത് പ്രവർത്തിക്കുന്ന ഞാൻ ഒരുപാട് നഷ്​ടപ്പെട്ട ജീവിതങ്ങൾ കണ്ടു. നാളെ നന്നാവും എന്ന ശുഭ പ്രതീക്ഷയോടെ ജീവിക്കുന്ന ഒരുപാട് ആളുകളെ കണ്ടു. ഭയമില്ലാതെ, ഒന്നും നേടാനില്ലാതെ മറ്റുള്ളവർക്ക് വേണ്ടി പ്രവർത്തിക്കുന്ന ഒരുപാട് നല്ല ജന്മങ്ങളെയും കണ്ടു. അങ്ങിനെയാണ്​ നാടിന്‍റെ അവസ്ഥ മനസ്സിലാക്കി നാളത്തെ പൊൻപുലരിയെ പ്രതീക്ഷിക്കുന്ന ഒരു പാട്ട്​ എന്ന ആശയം മനസ്സിലുയർന്നത്​' -പാട്ട്​ ഒരുങ്ങിയതിന്‍റെ വഴികളെ കുറിച്ച്​ ജോളി ജോസഫ്​ പറയുന്നു.

അജീഷ്​ ദാസന്‍റെ വരികൾക്ക്​ സ്റ്റീഫൻ ഈണം പകർന്നതോടെ നടൻ കൈലാഷും എം.ജി. സർവകലാശാലയിൽ അധ്യാപകനായ അജു കെ. നാരായണനും പാട്ട്​ യാഥാർഥ്യമാക്കാൻ ജോളിക്കൊപ്പം ചേരുകയായിരുന്നു. ആര് പാടും എന്നതായി പിന്നെ ചിന്ത. അവസാനം മലയാളത്തിലെ ഒരു വലിയ പാട്ടുകാരനിൽ ഉറപ്പിച്ചു. ഇന്ത്യയിലെ പല ഭാഗത്തുള്ള അണിയറപ്രവർത്തകർക്ക്​ കോവിഡ് മൂലം റെക്കോർഡിങ് നടത്തിയെടുക്കാൻ ബുദ്ധിമുട്ടായി. ഒരു പ്രത്യേക സാഹചര്യത്തിൽ ആ ഗായകനെ ഒഴിവാക്കേണ്ടിയും വന്നു. അതിനിടയിൽ എല്ലാവരും പല ദിക്കിലായി. ലോക്​ഡൗൺ മൂലം എല്ലാം പിന്നെയും വൈകി.

അങ്ങിനെയിരിക്കെ ഒരു ദിവസം സ്റ്റീഫൻ ഹരിചരണിനെയും വീണയുടെ ഉസ്താദ് രാജേഷ് വൈദ്യയും ഒരുമിപ്പിച്ച്​ ചെന്നൈയിൽ വെച്ച് പാട്ട്​ റെക്കോർഡ്​ ചെയ്​തു. ചിത്രീകരണം പക്ഷേ, പിന്നെയും വൈകി. നാലഞ്ച് തിരക്കഥകൾ മാറ്റി എഴുതിയപ്പോഴാണ് സുധി അന്നയും ആഷിക് അബുവിന്‍റെ 'നാരദന്‍റെ' ക്യാമറാമാൻ സുശാന്ത് ശ്രീനിയും രംഗത്തേക്കു വന്നത്. സുശാന്ത് വഴി എഡിറ്റർ അരുൺ രവിയും എത്തി. ആഗ്രഹിച്ച ലൊക്കേഷനുകളിൽ പോകാൻ സാധിക്കാതെ ഇൻഡോർ ഷൂട്ടിങ്​ പ്ലാൻ ചെയ്തു. മുംബൈയിൽ നിന്ന്​ സ്റ്റീഫൻ വന്ന ദിവസം ലൊക്കേഷൻ ഏരിയ കണ്ടയ്​ൻമെന്‍റ്​ സോണായി. അടുത്ത ലൊക്കേഷൻ നടൻ ജൈസ് ജോസ് വഴി ശരിയാക്കിയെങ്കിലും ഷൂട്ടിങ്ങിന്‍റെ ദിവസം വരാമെന്നേറ്റ ഒരു വലിയ നടൻ വന്നില്ല. അതിനിടയിൽ ബിജിബാൽ വന്നതോടെ ചിത്രീകരണം പൂർത്തിയാക്കുകയായിരുന്നു.

സ്റ്റീഫന്‍റെ യൂട്യൂബ്​ ചാനലിൽ റിലീസ്​ ചെയ്​ത്​ 'അവനി വാഴ്‌വ് കിനാവ്' ഇതിനോടകം നിരവധി ആസ്വാദകരെ സ്വന്തമാക്കിക്കഴിഞ്ഞു. ആദ്യ കേൾവിയിൽ തന്നെ പാട്ട് മനസ്സിൽ പതിയുന്നു എന്നാണ് എല്ലാവരും ചൂണ്ടിക്കാണിക്കുന്നത്​. പാട്ടിന്​ മികച്ച പ്രതികരണങ്ങൾ ലഭിക്കുന്നതിന്‍റെയും നിരവധി പ്രമുഖർ പങ്കുവെക്കുന്നതിന്‍റെയും സന്തോഷത്തിലാണ്​ അണിയറപ്രവർത്തകർ. 'ജീവിതം ഒരു റുബിക്​സ്​ ക്യൂബ്​ പോലെയാണെന്നാണ്​ ഈ പാട്ട്​ പറയുന്നത്​. എങ്ങിനെയൊക്കെ ക്രമം തെറ്റിയാലും അത്​ ശരിയായ പാതയിൽ എത്തിച്ചേരും. എല്ലാം അതി​​​േന്‍റതായ ഇടം കണ്ടെത്തും. ആ പ്രക്രിയയിൽ വിശ്വാസം അർപ്പിച്ച്​, നമ്മൾ ക്ഷമയോടെ കാത്തിരിക്കുകയാണ്​വേണ്ടത്​' -ജോളി ജോസഫ്​ പറയുന്നു.