തേൻമഴയായ്​ കാതിലേക്ക്​ പെയ്​തിറങ്ങുകയാണ്​ അപർണയുടെ ഈ കവർ ഗാനം

'കാതിൽ തേൻമഴയായ്​ പാടൂ കാറ്റേ കടലേ...' സംഗീതാസ്വാദകരുടെ മനസ്സിനെ എക്കാലവും കുളിരണിയിക്കുന്ന ചുരുക്കം ചില ഗാനങ്ങളിൽ ഒന്നാണ്​ 'തു​മ്പോളി കടപ്പുറം' എന്ന ചിത്രത്തിലെ ഈ ഗാനം.

പ്രശസ്​ത ഗായികയും മലയാളത്തിന്‍റെ പ്രിയ കവി ഒ.എൻ.വി കുറുപ്പിന്‍റെ കൊച്ചുമകളുമായ അപർണ രാജീവിന്‍റെ മധുര ശബ്​ദത്തിൽ ഈ ഗാനത്തിന്​ കവർ വേർഷൻ ഒരുങ്ങിയിരിക്കുകയാണ്​. ഒരിക്കൽ കൂടി മലയാളി സംഗീത പ്രേമികളെ ശുദ്ധസംഗീതത്തിന്‍റെ പുത്തൻ ആസ്വാദന തലത്തിലേക്ക്​ നയിക്കുകയാണ്​ അപർണ.

ഒ.എൻ.വി കുറുപ്പ്​ രചിച്ച്​ സലിൽ ചൗധരി സംഗീതം നൽകി, യേശുദാസിന്‍റെയും കെ.എസ്​. ചിത്രയുടേയും ശബ്​ദത്തിൽ പുറത്തിറങ്ങിയ ഗാനമാണിത്​. ജയരാജാണ്​ ചിത്രം സംവിധാനം ചെയ്​തത്​.

മലയാളികളുടെ നാവിൻ തുമ്പിലും മനസ്സിലും മായാതെ കിടക്കുന്ന ഹിറ്റ്​ ഗാനത്തിന് അതിന്‍റെ തനിമ ചോർന്നു പോകാതെ​ കവർ ഒരുക്കുകയെന്ന അതിസാഹസത്തിൽ അപർണ അനായാസം വിജയിച്ചു. ഗാനരംഗത്തിൽ അപർണ തന്നെയാണ്​ അഭിനയിച്ചിരിക്കുന്നത്​. ആലാപനം പോലെ തന്നെ ഗാനത്തിന്‍റെ ദൃശ്യവിഷ്​കാരവും ഏ​െറ മനോഹരമാണ്​​. കടലിന്‍റെയും തെങ്ങിൻതോപ്പിന്‍റെയും പശ്ചാത്തലത്തിലാണ്​ ഗാനം ചിത്രീകരിച്ചിട്ടുള്ളത്​.

ജോബിൻ കായനാട്​ സംവിധാനവും ചിത്രീകരണവും നിർവഹിച്ച ഗാനരംഗത്തിന്‍റെ എഡിറ്റിങ്​ നിർവഹിച്ചിരിക്കുന്നത്​ മെൻഡോസ്​ ആന്‍റണിയാണ്​. അനന്തരാമൻ അനിൽ ഓർക്കസ്​ട്രഷനും ​പ്രോഗ്രാമിങ്ങും നിർവഹിച്ച ഗാനത്തിന്‍റെ മിക്​സിങ്ങും മാസ്റ്ററിങ്ങും ചെയ്​തിരിക്കുന്നത്​ അനിൽ അർജുനൻ ആണ്​.

നേരത്തേയും നിരവധി ഹിറ്റ്​ മെലഡികൾക്ക്​ അപർണ കവർ ഒരുക്കിയിരുന്നു. തലയണ മന്ത്രം എന്ന ചിത്രത്തിൽ ജോൺസൺ മാഷിന്‍റെ സംഗീതത്തിൽ പിറന്ന 'തൂവൽ വിണ്ണിൻ മാറിൽ തൂവി', കൃഷ്​ണഗുഡിയിൽ ഒരു പ്രണയ കാലത്ത്​ എന്ന ചിത്രത്തിൽ ഗീരീഷ്​ പുത്തഞ്ചേരി രചിച്ച്​ വിദ്യാസാഗർ ഈണം പകർന്ന 'കാത്തിരിപ്പൂ കൺമണീ' എന്നീ ഗാനങ്ങളും യോഗേഷ്​ രചിച്ച്​ സലിൽ ചൗധരി സംഗീതം പകർന്ന 'കഹി ദൂര്​ ജബ്​ ദിൻ ധൽ ജായേ' എന്ന ഹിന്ദി ഗാനവും ഇത്തരത്തിൽ ശ്രദ്ധേയമായവയാണ്​.