ആർ.ഡി.എക്സിന് ശേഷം സാം സി.എസും ഷെയിൻ നിഗവും; ‘വേല’യിലെ വിഡിയോ ഗാനമെത്തി

ആർ.ഡി.എക്സിന്റെ വമ്പൻ വിജയത്തിന് ശേഷം സാം സി.എസും ഷെയിൻ നിഗവും വീണ്ടും ഒന്നിക്കുകയാണ്. ഷെയിൻ പ്രധാന വേഷത്തിലെത്തുന്ന വേല’ എന്ന ചിത്രത്തിലെ സാം സി.എസ് ഈണമിട്ട ‘പാതകൾ പലർ’ എന്ന വിഡിയോ ഗാനം റിലീസായി. അൻവർ അലി രചന നിർവഹിച്ചിരിക്കുന്ന ഗാനം ആലപിക്കുന്നത് ഹരിചരൺ ആണ്.

സണ്ണി വെയ്നും സിദ്ധാർഥ് ഭരതനും പ്രധാന വേഷത്തിലെത്തുന്ന ‘വേല’ സംവിധാനം ചെയ്യുന്നത് ശ്യാം ശശിയാണ്. തിരക്കഥ എം.സജാസും നിർവഹിച്ചിരിക്കുന്നു. ചിത്രത്തിന്റെ ട്രെയിലർ വലിയ ശ്രദ്ധനേടിയിരുന്നു. പൊലീസ് കൺട്രോൾ റൂമിന്റെ പശ്ചാത്തലത്തിൽ കഥ പറയുന്ന ചിത്രത്തിൽ ഷെയിൻ നിഗം ഉല്ലാസ് അഗസ്റ്റിൻ എന്ന പോലീസ് ഉദ്യോഗസ്ഥനെയും മല്ലികാർജുനൻ എന്ന പോലീസ് കഥാപാത്രത്തെ സണ്ണിവെയ്നും അവതരിപ്പിക്കുന്നു.

സിൻസിൽ സെല്ലുലോയ്ഡിന്റെ ബാനറിൽ എസ്.ജോർജാണ് വേല നിർമ്മിക്കുന്നത്. ബാദുഷ പ്രൊഡക്ഷൻസാണ് ചിത്രത്തിന്റെ സഹനിർമ്മാതാക്കൾ. നവംബർ 10നാണ് ചിത്രം കേരളത്തിലെ തീയേറ്ററുകളിലേക്കെത്തുന്നത്. ദുൽഖർ സൽമാന്റെ വേഫേറെർ ഫിലിംസ് കേരളത്തിൽ ചിത്രം വിതരണം നിർവഹിക്കുന്നത്.