'ഒരുനോക്ക്​ മാത്രമെങ്കിലും നിന്നെ വീണ്ടും കാണാൻ കൊതിക്കുന്നു നന്ദന'-മകളുടെ ഓർമയിൽ ഉള്ളു പൊള്ളിച്ച് ചിത്രയുടെ കുറിപ്പ്​

'ഒരുനോക്ക്​ മാത്രമാണെങ്കിലും ഒരിക്കൽ കൂടി നിന്നെ കാണാൻ കൊതിക്കുന്നു. നീ ഞങ്ങൾക്ക്​ എത്രമാത്രം പ്രിയപ്പെട്ടതാണെന്ന്​ ഒരിക്കൽ കൂടി പറയാനും...' -അകാലത്തിൽ പൊലിഞ്ഞ മകൾ നന്ദനയുടെ ഓർമയിൽ മലയാളത്തിന്‍റെ പ്രിയ ഗായിക കെ.എസ്​. ചിത്ര കുറിച്ച വാക്കുകൾ ഹൃദയസ്​പർശിയാകുന്നു. നന്ദനയുടെ എല്ലാ ജന്മദിനത്തിലും ഓർമദിനത്തിലും ചിത്ര മകളുടെ അസാന്നിധ്യം തന്നെ എത്രമാത്രം നൊമ്പരപ്പെടുത്താറു​ണ്ടെന്ന്​ ആരാധകരുമായി പങ്കുവെക്കാറുണ്ട്​. നന്ദനയുടെ അകാല വേർപാടിന്‍റെ പത്താം വർഷമാണിത്.

'നിന്‍റെ ജന്മം ആയിരുന്നു ഞങ്ങളുടെ ജീവിതത്തിലെ ഏറ്റവും വലിയ അനുഗ്രഹം. നിന്‍റെ ഓർമകൾ ഇന്നും നിധി പോലെ സൂക്ഷിക്കുന്നു. നിന്നെ ഞങ്ങൾ എത്രമാത്രം സ്​​േനഹിക്കുന്നുവെന്നത്​ വാക്കുകൾക്ക്​ അതീതമാണ്​. നിന്‍റെ ഓർമകൾ എന്നെന്നേക്കും നിലനിൽക്കുന്നതിനായി ഞങ്ങളുടെ ഹൃദയത്തിൽ അത്​ കൊത്തിവച്ചിരിക്കുകയാണ്​. ഒരുതവണ കൂടി, ഒരു നോക്ക്​ മാത്രമെങ്കിലും നിന്നെ കാണാൻ ഞങ്ങൾ കൊതിക്കുന്നു. നീ ഞങ്ങൾക്ക് എത്രമാത്രം പ്രിയപ്പെട്ടതാണെന്ന് പറയാനും. പ്രിയപ്പെട്ടവളേ, നിന്നെ ഒരുപാട് മിസ് ചെയ്യുന്നു' -മകളുടെ ചിത്രം പങ്കുവച്ച് ചിത്ര സമൂഹമാധ്യമങ്ങളിൽ കുറിച്ചു.

വർഷങ്ങൾ നീണ്ട കാത്തിരിപ്പിനൊടുവില്‍ 2002ലാണ് ചിത്രയ്ക്കും ഭർത്താവ് വിജയശങ്കറിനും മകൾ പിറന്നത്. എന്നാൽ, 2011ൽ ദുബൈയിലെ വില്ലയിൽ നീന്തൽ കുളത്തിൽ വീണ്​ ഒമ്പത് വയസുകാരിയായ നന്ദന മരണപ്പെടുകയായിരുന്നു.

View this post on Instagram

A post shared by K S Chithra (@kschithra)