ഹിമാചൽ പ്രദേശിൽ രാജവെമ്പാലയെ ആദ്യമായി കണ്ടെത്തി

ഷിംല: ലോകത്തിലെ ഏറ്റവും നീളമുള്ള വിഷപ്പാമ്പായ രാജവെമ്പാലയെ സംസ്​ഥാനത്ത്​ ആദ്യമായി കണ്ടെത്തിയതായി ഹിമാചൽ പ്രദേശ് വനം-വന്യജീവി വകുപ്പ് അധികൃതർ അറിയിച്ചു. കഴിഞ്ഞയാഴ്ച ഹിമാചലിലെ സിർമോർ ജില്ലയിലെ കോലാർ വനത്തോട് ചേർന്ന ഗിരിനഗറിനടുത്താണ്​ പാമ്പിനെ ക​ണ്ടത്​.

പ്രദേശവാസിയായ പ്രവീൺ താക്കൂർ മൊബൈൽ ഫോണിലെടുത്ത ചിത്രങ്ങൾ പരിശോധിച്ചപ്പോഴാണ്​ രാജവെമ്പാലയാണെന്ന്​ മനസ്സിലായത്​. ​തുടർന്ന്​ പോണ്ട സാഹിബ്​ ഡി.എഫ്.ഒ കുനാൽ ആംഗ്രിഷിൻെറ നേതൃത്വത്തിലുള്ള സംഘം സ്ഥലം സന്ദർശിക്കുകയും പാമ്പിൻെറ സാന്നിധ്യം കണ്ടെത്തുകയും ചെയ്തു.

'മുമ്പുള്ള രേഖകൾ പരിശോധിച്ചപ്പോൾ, ഹിമാചൽ പ്രദേശിൽ ഇതുവരെ രാജവെമ്പാലയെ കണ്ടെത്തിയതായി രേഖപ്പെടുത്തിയിട്ടില്ലെന്ന്​ മനസ്സിലായി. ഹിമാചലിലെ ശിവാലിക്ക് മലയിലാണ് ഇപ്പോൾ പാമ്പിനെ കണ്ടത്. നേരത്തെ സമീപത്തുള്ള മലയോര സംസ്ഥാനമായ ഉത്തരാഖണ്ഡിൽ ഇതിൻെറ സാന്നിധ്യം രേഖപ്പെടുത്തിയിരുന്നു. ഹിമാചൽ പ്രദേശിൽ ഇവയെ​ കണ്ടെത്തിയെന്നത്​ പ്രധാനപ്പെട്ട കാര്യമാണ്' -ഹിമാചൽ പ്രിൻസിപ്പൽ ചീഫ് കൺസർവേറ്റർ അർച്ചന ശർമ പറഞ്ഞു.

ഹിമാചലിലെ സിർമോർ ജില്ലയിലെ പോണ്ട സാഹിബ് പ്രദേശം ഉത്തരാഖണ്ഡുമായി അതിർത്തി പങ്കിടുന്നുണ്ട്​. അതേസമയം, 2017ൽ ഹിമാചലിലെ ചമ്പ ജില്ലയിൽ മൂർഖൻ പാമ്പിനെ കണ്ടെത്തിയിരുന്നു.

'മൂർഖൻ പാമ്പിനെ സംസ്ഥാനത്ത് കണ്ടെത്തിയതായി ഇതിനകം രേഖപ്പെടുത്തിയിട്ടുണ്ട്. ഹിമാചൽ പ്രദേശിൽ രാജവെമ്പാലയുടെ സാന്നിധ്യം ആദ്യമായിട്ടാണ്​ രേഖപ്പെടുത്തുന്നത്​. അടിസ്ഥാനപരമായി ഇവയെ പശ്ചിമഘട്ട മലനിരകൾ, ഒഡീഷ, അസം, ബംഗാൾ തുടങ്ങിയ സ്​ഥലങ്ങളിലാണ്​​ കാണപ്പെടുന്നത്​' -അനിത താക്കൂർ കൂട്ടിച്ചേർത്തു.

'പ്രദേശവാസിയായ പ്രവീൺ‌ താക്കൂറാണ്​ ഈ പാമ്പിൻെറ ചിത്രം പകർത്തിയത്​. സാധാരണ പാമ്പാണെന്ന്​ കരുതിയാണ്​ അയാൾ പകർത്തുന്നത്​. തുടർന്ന്​ അദ്ദേഹം ചിത്രം ഗ്രൂപ്പുകളിൽ പങ്കുവെച്ച്​. ചിത്രം കണ്ട ചിലർ വനം വകുപ്പ് ഉദ്യോഗസ്ഥർക്കും വന്യജീവി വിഭാഗത്തിനും അയച്ചുതരികയായിരുന്നു. ഞങ്ങൾ പരിശോധിച്ചപ്പോൾ അത് രാജവെമ്പാലയാണെന്ന്​ മനസ്സിലായി.

തുടർന്ന്​ പ്രവീൺ താക്കൂറിനെ ബന്ധപ്പെട്ട്​ സംഭവം സ്​ഥലം സന്ദർശിച്ചു. അവശിഷ്​ടങ്ങൾ കണ്ടെത്തിയെങ്കിലും ​‌പാമ്പിനെ നേരിട്ട്​ കാണാൻ സാധിച്ചില്ല. പ്രദേശത്ത്​ പരിശോധന തുടരുന്നുണ്ട്​' - ഡി.എഫ്.ഒ കുനാൽ ആംഗ്രിഷ്​ പറഞ്ഞു.

രാജവെമ്പാല പ്രധാനമായും മറ്റു ചെറു പാമ്പുകളെയും പല്ലി, എലി പോലുള്ള ഇഴജന്തുക്കളെയുമാണ്​ ഇരയാക്കുന്നത്​. ഏറെ വിഷമുള്ള ഇവയെ പ്രകോപിപ്പിച്ചാൽ അപകടകാരിയായി മാറും. അതേസമയം, മനുഷ്യരെ കണ്ടാൽ ഒഴിഞ്ഞുമാറുന്ന സ്വഭാവക്കാരുമാണ്​.