ചോക്ലേറ്റ്​ നമ്മളുദ്ദേശിച്ച ആളല്ല, അറിയാം ആരോഗ്യ ഗുണങ്ങൾ

പ്രായഭേദമന്യേ ഏവരും ഇഷ്​ടപ്പെടുന്ന ഒന്നാണ്​ ചോക്ലേറ്റ്​. ചോക്ലേറ്റിൻെറ മധുരമൂറുന്ന രുചി ഇഷ്​ടപ്പെടാത്തവർ വളരെ ചുരുക്കമായിരിക്കും. ഏറ്റവും പുതുതായി പുറത്തുവന്ന ഒരു ഗവേഷണ റിപോർട്ട്​ ചോ​ക്ലേറ്റ്​ പ്രിയരെ ഏറെ സന്തോഷിപ്പിക്കുമെന്നുറപ്പ്​. മിതമായ അളവിൽ ചോക്ലേറ്റ്​ കഴിക്കുന്ന വ്യക്തികളിൽ ഹൃദ്രോഗ സാധ്യത കുറവുള്ളതായും പ്രമേഹ രോഗികളുടെ രക്തത്തിൽ ഇൻസുലിൻെറ അളവ്​ കുറക്കുന്നതായുമാണ്​ കണ്ടെത്തൽ.

എന്നാൽ നമ്മൾ എത്ര കണ്ട്​ ചോക്ലേറ്റ്​ കഴിക്കുന്നു എന്നതിനെ അടിസ്​ഥാനപ്പെടുത്തിയാണ്​ ഫലം നിശ്ചയിക്കുന്നത്​. ദിവസേന 200 മുതൽ 600 എം.ജി വരെ ചേക്ലേറ്റ്​ കഴിക്കുന്നവരിലാണ്​ പോസിറ്റീവായ ഫലം കണ്ടത്​. മിതമായ അളവിലുള്ള ഡാർക്ക്​ ചോക്ലേറ്റ് ഉപഭോഗം ഇൻസുലിൻ അളവിനെ കൈകാര്യം ചെയ്യാനും ഹൃദയാഘാതത്തിലേക്ക്​ നയിക്കുന്ന കാര്യങ്ങളെ ചെറുക്കാനും സഹായിക്കുമെന്നാണ്​ ഗവേഷണത്തിലുള്ളത്​.

വൈറ്റ്​ അല്ലെങ്കിൽ മിൽക്ക്​ ചോക്ലേറ്റുകളേക്കാൾ ന​ല്ലത്​ പ്ലെയിൻ ചോക്ലേറ്റുകളെന്നാണ്​ ഗവേഷകർ സാക്ഷ്യപ്പെടുത്തുന്നത്​. 1139 ആളുകൾക്ക്​ 119 രുചികളിലുള്ള ചോക്ലേറ്റുകൾ നൽകിയായിരുന്നു​ പഠനം നടത്തിയത്​.

ചോക്ലേറ്റിൻെറ അത്ഭുത ഗുണങ്ങൾ ഇൻസുലിൻ നില സന്തുലിതമാക്കുന്നതിൽ മാത്രം ഒതുങ്ങി നിൽക്കുന്നതല്ല. ഉറക്കത്തിൻെറ ഗുണനിലവാരം ഉയർത്തുന്നതിനോടൊപ്പം ശരീരഭാരം നിയന്ത്രിക്കുന്ന കാര്യത്തിലും ​േചാക്ലേറ്റ്​ സഹായിക്കുമെന്നാണ്​ ഗവേഷകർ പറയുന്നത്​. ഡാർക്ക് ചോക്ലേറ്റിലെ ആൻറി ഓക്‌സിഡൻറുകളും പോളിഫെനോൾസ്, ഫ്ലവനോളുകൾ, കാറ്റെച്ചിനുകൾ എന്നീ പ്രകൃതിദത്ത സംയുക്തങ്ങളും ആരോഗ്യ സംരക്ഷണത്തിന്​ ഏറെ ഗുണകരമായി ഭവിക്കു​ന്നു.

ഇടക്കിടെ വിശപ്പ്​ അനുഭവപ്പെടുന്ന ആളാണെങ്കിൽ ലഘുഭക്ഷണത്തിന്​ പകരം ഒരു കഷണം ചേക്ലേറ്റ്​ കഴിച്ചാൽ തന്നെ സംതൃപ്​തി അനുഭവിച്ചറിയാം. വിശപ്പ്​ കുറക്കുന്ന ഹോർമോണുകളെ ഉത്തേജിപ്പിക്കാൻ ചേക്ലേറ്റുകൾക്ക്​ സാധിക്കും. അതോടൊപ്പം തന്നെ ചോക്ലേറ്റ്​ കഴിക്കുന്നത്​ മാനസിക സമ്മർദ്ദത്തിൻെറ തോത്​ വളതെയധികം കുറക്കാനും നല്ല ഉറക്കം ലഭിക്കാനും സഹായകമാണെന്നും ഗവേഷണത്തിൽ കണ്ടെത്തി.