പാട് തായ് കായ് വീട്ടിൽ തയാറാക്കാം

തായ് സ്വാദുകൾ ആസ്വദിക്കാൻ ഹോട്ടലുകൾ തേടി പോകുന്നവർ ഏറെയാണ്. എന്നാൽ, നിങ്ങളുടെ അടുക്കളയിൽ തന്നെ പാട് തായ് കായ് (തായ് ചിക്കൻ റൈസ്​ നൂഡിൽസ്​) തയാറാക്കാം

ചേരുവകൾ:

• തായ് നൂഡിൽസ്​ – 50 ഗ്രാം (വീതിയേറിയ റൈസ്​ നൂഡിൽസ്​)
• ചിക്കൻ െബ്രസ്​റ്റ് – 1 1/2 കപ്പ് (ചെറിയ കഷണങ്ങളാക്കിയത്)
• (ചിക്കൻ മാരിനേറ്റ് ചെയ്യുന്നതിന് വേണ്ട ചേരുവകൾ – ചോളം വേവിച്ച വെള്ളം, സോയ സോസ്​)
• വെളുത്തുള്ളി – 4 എണ്ണം
• മുളക് ചതച്ചെടുത്തത് – 1–2 എണ്ണം
• മുളപ്പിച്ച പയർ – 3 കപ്പ്
• സവാള – 3 എണ്ണം
• മല്ലിയില – 1/2 കപ്പ്
• നിലക്കടല – 1/3 കപ്പ് (വറുത്ത് തരിയായി പൊടിച്ചത്)
• ചിക്കൻ സ്​റ്റോക്ക് – 1/4 കപ്പ്
• വെജിറ്റബിൾ ഓയിൽ – 2 ടേബ്ൾ സ്​പൂൺ
• നാരങ്ങ – 2 കഷണങ്ങൾ
• ഉള്ളി – 2 എണ്ണം
• സ്​പ്രിങ് ഒനിയൻ – 10 ഗ്രാം
• ഉപ്പ് – പാകത്തിന്

പട് തായ് സോസിനുവേണ്ട ചേരുവകൾ:

• പുളി പേസ്​റ്റ് – 3/4 ടേബ്ൾ സ്​പൂൺ (1/4 കപ്പ് ചൂടുവെള്ളത്തിൽ ലയിപ്പിച്ചത്)
• ഫിഷ് സോസ്​ – 3 ടേബ്ൾ സ്​പൂൺ
• ചിക്കൻ സ്​റ്റോക്ക് – 1/4 കപ്പ്
• ചില്ലി സോസ്​ – 1–3 ടേബ്ൾ സ്​പൂൺ (സോസിനു പകരം മുളക് ചതച്ചത് തരുതരുപ്പാക്കിയത് ഉപയോഗിച്ചാലും മതി)
• ബ്രൗൺ ഷുഗർ – 3 ടേബ്ൾ സ്​പൂൺ

തയാറാക്കുന്ന വിധം:

ആദ്യം തായ് സോസ്​ തയാറാക്കിയെടുക്കുക. പുളി പേസ്​റ്റ്, ചിക്കൻ സ്​റ്റോക്ക്, ഫിഷ് സോസ്​, ചില്ലി സോസ്​, ബ്രൗൺ ഷുഗർ എന്നീ ചേരുവകൾ പാനിലൊഴിച്ച് തിളപ്പിച്ചെടുക്കുക. മധുരവും ചവർപ്പും കലർന്ന രുചിയായിരിക്കും ഇതിന്. മധുരം കൂടുതൽ വേണമെങ്കിൽ അൽപം പഞ്ചസാരയും മധുരം കൂടുതലാണെങ്കിൽ കുറച്ച് പുളി പേസ്​റ്റും ചേർത്തുകൊടുക്കാം.

റൈസ്​ നൂഡിൽസ്​ അൽപം ഉപ്പുചേർത്ത് പാകത്തിന് വേവിച്ച് തണുത്ത വെള്ളമൊഴിച്ച് ഈറ്റിയെടുക്കുക. തണുത്ത വെള്ളമൊഴിച്ച് കഴുകിയാൽ നൂഡിൽസ്​ ഒട്ടിപ്പിടിക്കില്ല. ചോളം വേവിച്ച വെള്ളവും സോയ സോസും ചേർത്ത് ചിക്കൻ മാരിനേറ്റ് ചെയ്തുവെക്കുക. അടുത്തതായി പാൻ ചൂടാക്കി എണ്ണയൊഴിച്ച് വെളുത്തുള്ളി അരിഞ്ഞതും മുളക് ചതച്ചതും സവാളയുമിട്ട് മൂപ്പിക്കുക. ശേഷം മാരിനേറ്റ് ചെയ്ത ചിക്കൻ ചേർക്കുക.

ചിക്കൻ വാട്ടിയ ശേഷം അൽപം ചിക്കൻ സ്​റ്റോക്ക് ചേർത്തു കൊടുക്കാം. ചിക്കൻ നന്നായി വെന്തശേഷം നൂഡിൽസും തായ് സോസും ചേർത്തു കൊടുക്കുക. രണ്ട് തവികളോ അല്ലെങ്കിൽ മറ്റൊരു പാനോ ഉപയോഗിച്ച് നൂഡിൽസ്​ മുറിയാത്ത വിധം ഇളക്കി യോജിപ്പിക്കുക (സാലഡ് ഇളക്കുന്നതുപോലെ). സോസും മറ്റു ചേരുവകളും യോജിക്കുന്നതിനായി നൂഡിൽസ്​ അഞ്ചു മിനിറ്റ് വേവിച്ചെടുക്കുക. സോസ്​ മുഴുവനായും വറ്റുകയാണെങ്കിൽ അൽപം എണ്ണ തൂവിക്കൊടുക്കാം.

ശേഷം മുളപ്പിച്ച ചെറുപയർ ചേർത്തിളക്കുക. ഒരു മിനിറ്റുകൂടി വേവിച്ച ശേഷം ഫിഷ് സോസ്​ ചേർക്കുക. നിലക്കടല പൊടിച്ചതും മല്ലിയിലയും തൂവി വാങ്ങാം. പ്ലേറ്റിലേക്ക് മാറ്റി നാരങ്ങ കഷണങ്ങൾ കൊണ്ട് അലങ്കരിച്ച് വിളമ്പാം. (നൂഡ്ൽസ്​ തയാറാക്കുമ്പോൾ മുഴുവനായും വരണ്ടതാകാതിരിക്കാൻ ശ്രദ്ധിക്കണം. നൂഡിൽസിന്‍റെ വേവും അധികമാവരുത്.)