മുരിങ്ങയിലയും കപ്പളങ്ങയും കൊണ്ട് രുചികരമായ തോരൻ തയാറാക്കാം

കപ്പളങ്ങ, ഒാമക്ക, കർമൂസ, കറുമത്തി എന്നിങ്ങനെ കേരളത്തിലുടനീളം പല പേരുകളിലാണ് 'പപ്പായ' അറിയപ്പെടുന്നത്. കപ്പളങ്ങയും മുരിങ്ങയിലയും ചേർത്ത് രുചികരമായ തോരൻ തയാറാക്കാം.

ചേരുവകൾ:

• കപ്പളങ്ങ/പപ്പായ തൊലിയും കുരുവും കളഞ്ഞ് ഗ്രേറ്റ് ചെയ്തത് - 2 കപ്പ്
• മുരിങ്ങയില കഴുകി ഉതിർത്ത് എടുത്തത് -4 കപ്പ്
• ഉപ്പ് - പാകത്തിന്
• മഞ്ഞൾപൊടി - 3/4 ടീസ്പൂൺ
• തേങ്ങ ചിരവിയത് - 2 കപ്പ്
• മുളകുപൊടി - 1 ടീസ്പൂൺ
• ജീരകം - 1/4 ടീസ്പൂൺ
• വെളുത്തുള്ളി - 3 അല്ലി (തൊലി കളഞ്ഞത്)
• എണ്ണ - 2 ടീസ്പൂൺ
• കടുക്, ഉഴുന്ന് - 1/4 ടീസ്പൂൺ വീതം
• ഉണക്കമുളക് - 2 എണ്ണം (രണ്ടായി മുറിച്ചത്)

തയാറാക്കുന്ന വിധം:

ചീനച്ചട്ടി അടുപ്പത്ത് വെച്ച് എണ്ണ ഒഴിച്ച് ചൂടാക്കുക. ഉണക്കമുളക്, കടുക്, ഉഴുന്ന് എന്നിവയിട്ട് കടുക് പൊട്ടുമ്പോൾ കപ്പളങ്ങയും മുരിങ്ങയിലയും ഉപ്പും മഞ്ഞളും ചേർക്കുക. വെള്ളം അൽപം വീതം ചേർത്ത് ഇവ വേവിക്കുക. ഈ നേരം കൊണ്ട് തേങ്ങയും മുളകുപൊടിയും ജീരകവും വെളുത്തുള്ളിയും നന്നായി ചതച്ചെടുക്കുക. കഷ്ണം നന്നായി വെന്ത് കഴിഞ്ഞാൽ ഈ അരപ്പിട്ട് നന്നായി ഇളക്കി വാങ്ങിവെക്കുക. രുചികരമായ മുരിങ്ങയില-കപ്പളങ്ങ തോരൻ ചോറിനൊപ്പം വിളമ്പുക.